မြန်မာ-တရုတ်နယ်စပ် မူဆယ်မြို့ ဆင်ဖြူပေါက်အနီးရှိ နဂါးနှစ်ကောင် KTV မီးလောင်မှု ဖြစ်ပွားခဲ့ပြီး ၄ ဦး ထိခိုက်ဒဏ်ရာရရှိခဲ့ကြောင်း သိရသည်။
ယနေ့ (ဇွန်လ ၁၉ ရက်) မနက် ၉ နာရီခန့်တွင် တရုတ်-မြန်မာ မူဆယ်မြို့ဘက်ခြမ်း ဆင်ဖြူပေါက်အနီးရှိ နဂါးနှစ်ကောင် KTV ၌ မီးလောင်မှု ဖြစ်ပွားခဲ့ကြောင်း မီးသတ်တပ်ဖွဲ့ဝင်တစ်ဦးက သျှမ်းသံတော်ဆင့်ကို ပြောသည်။
“မီးက နံနက် ၉ နာရီကျော်လောက်က စလောင်တာပါ။ မီးကို အလွယ်တကူ မငြိမ်းသက်နိုင်လို့ အဆောက်အအုံကို ဖြိုချပြီးမှ ရေဖြန်းပြီး မီးငြိမ်းသက်နိုင်ခဲ့တယ်။ အခုအချိန်အထိလည်း မီးပြန်လောင် မလာအောင် ဆက်ပြီး မီးငြိမ်းသက်နေတုန်းပါ” ဟု မီးသတ်တပ်ဖွဲ့ဝင်တစ်ဦးက ပြောသည်။
မီးလောင်မှုကြောင့် ထိခိုက်ဒဏ်ရာသူ ၄ ဦး ရှိပြီး လက်ရှိအချိန်ထိ မီးငြိမ်းသက်နေရကြောင်းကို မူဆယ်မြို့ ဒေသခံ အမျိုးသားတစ်ဦးက ဆက်ပြောသည်။
“KTV ကလူပဲ မီးငြိမ်းရင်းနဲ့ အခိုးအငွေ့ကြောင့် ဒဏ်ရာရရှိကြတာ။အခန်းကလည်း အထပ်ထပ် လုပ်ထားပြီး ဖော့တွေလည်းပါတော့ မီးသက်ဖို့ခက်နေတာ။ခုထိလည်း မီးသွားငြိမ်းနေရတာ ဘယ်အခန်းကစပြီး ဘယ်လိုလောင်လည်းသေချာ မသိရသေးဘူး။”ဟု မူဆယ်မြို့ ဒေသခံ အမျိုးသားတစ်ဦးက ပြောသည်။
ထို မီးလောင်မှုကြောင့် ပျက်စီးဆုံးရှုံးမှုနှင့် လူထိခိုက်ဒဏ်ရာရရှိမှုများကို သျှမ်းသံတော်ဆင့်မှ ဆက်လက် စုံစမ်းနေသည်။
ပြီးခဲ့သည့် (မေလ ၂၇ ရက်)တွင်လည်း လားရှိုးမြို့အဝင်ရှိ ကိုးကန့်တပ်ဖွဲ့ MNDAA ထိန်းချုပ် လွယ်လွမ့်ကျေးရွာတွင် ဖွင့်လှစ်ထားသည့် “ခိုင်” သစ်သီးပွဲရုံရှိ ဂိုထောင်တစ်ခု မီးလောင်ကျွမ်းခဲ့ပြီး အနီးပတ်ဝန်းကျင်ရှိ ပြည်သူများမှ ဝိုင်းဝန်း မီးငြိမ်းသတ်ခဲ့ရသည်။
Leave a Comments