သျှမ်းပြည်မြောက်ပိုင်းနှင့် မန္တလေးနယ်စပ်ရှိ မိုးကုတ်မြို့၊ မိုးမိတ်မြို့တို့ကို စစ်ကော်မရှင်တပ်ထံ ပြန်လည်ပေးအပ်လိုက်ရခြင်းကြောင့် အမှန်တကယ် ပေးဆပ်နစ်နာသူများကို အနူးအညွတ် တောင်းပန်ပြီး ရင်ထဲ လှိုက်လှိုက်လှဲလှဲ နာကျင်ရကြောင်း TNLA အထွေထွေအတွင်းရေးမှူး ဗိုလ်ချုပ် တားဘုန်းကျော်က ပြောဆိုလိုက်သည်။

မိုးကုတ်မြို့နှင့် မိုးမိတ်မြို့ ပြန်ပေးလိုက်ရသည့်အပေါ် နိုင်ငံရေး ဖျာခင်းသူနှင့် ဘာမှန်းမသိ ဆဲချင်သူများကို ရှင်းပြချင်ကြောင်း “မိုးကုတ် ဋီကာ” ခေါင်းစဉ်ဖြင့် TNLA ဗိုလ်ချုပ် တာဘုန်းကျော် ၏ Mai Tea Land ဖေ့စ်ဘုတ် လူမှုကွန်ရက်ပေါ်တွင် ယမန်နေ့ (ဒီဇင်ဘာလ ၁ ရက်) ညသန်းခေါင်တွင် ရေးသားထားသည်။

မိုးကုတ်မြို့ကို တအာင်း(ပလောင်) ဘာသာစကားဖြင့် “မိုဂူႈ-လင်းလက်တဲ့ကျောက်”အဖြစ် တင်စားထားပြီး မြို့ထိန်းချုပ်နိုင်ရေးမှာ TNLA ၏ နိုင်ငံရေးပန်းတိုင်တစ်ခုအဖြစ် ရည်မှန်းထားပြီး ကံမကုန်သေးသည့် ကြိုးစားသူအတွက် ရလာဒ်ရှိစမြဲဟု ယုံကြည်ကြောင်း ဆိုထားသည်။

“အခုတော့ လက်ထဲရောက်တဲ့ ကိတ်မုန့်ကို မစားရပဲ ပုတ်ချခံလိုက်ရသလိုမျိုး အသည်းကွဲရပါတယ်” ဟု ဗိုလ်ချုပ် တာဘုန်းကျော်က ဥပမာပြုသည်။

နွေဦးတော်လှန်ရေးကို TNLA အနေဖြင့် (၁၀) နှစ်ကျော် တည်ဆောက်ထားသည့် အရင်းအမြစ်များဖြင့် အကောင်းဆုံး ပံ့ပိုးခဲ့ခြင်းကြောင့် သစ္စာဖောက်ဟု ပက်ပက်စက်စက် ပြောသူများကို တော်လှန်ရေးနှလုံး သေချာပြန်သုံးသပ်ပြီး အရှိတရား လက်ကိုင်ထားစေချင်ကြောင်း ရှင်းပြထားသည်။

“လက်သုံးချောင်းထောင်သူတွေကို လစဉ် ဆန်အိတ် ထောင်ကြီးပိုင်း ကျွေးမွေးမြှင့်တင် လေ့ကျင့်ထားတယ်။ ၃-၄ နှစ် ကာလအတွင်း ရဲဘော်အင်အားထောင်ချီ ပေးဆပ် အရင်းပြုခဲ့တယ်။ လက်နက်အကြွေး ဒေါ်လာဘီလီယံချီ အကြွေးတင်ခဲ့တယ်”ဟု မိုးကုတ်ဋီကာ အတွင်း ထည့်သွင်းရေးသားထားသည်။

“၁၀၂၇ စစ်ဆင်ရေး” နောက်ဆုံးတွင် TNLA တစ်ဖွဲ့တည်း အထီးကျန်ခဲ့ပြီး ထိန်းချုပ်ဒေသအတွင်း လေယာဉ်ဗုံးဒဏ်သင့်ရခြင်း၊ ကျည်မရှိ ဘတ်ဂျတ်မရှိ သေစရာ လူသူနည်းလာခြင်းကြောင့် မိုးကုတ်၊ မိုးမိတ်မြို့တို့နှင့် ညှိနှိုင်းပြီး အပစ်ရပ်ခဲ့ရကြောင်း ဆိုထားသည်။

လက်ရှိတွင် ပွဲမပြီးသေးသော်လည်း အဆဲတွေက စုံလွန်းလှကြောင်း၊ TNLA ကျွေးမွေးမြှင့်တင် လေ့ကျင့်ပေးခဲ့သူများမှ မိုးကုတ်မြို့ကို ပြန်သိမ်းသည်ကို မြင်ချင်ကြောင်း၊ TNLA ကို ဆဲသူများ မောရင်ဖြင့် နားနားပြီး ဆဲသလို စစ်အာဏာရှင်ကိုလည်း နားနားပြီး တိုက်ကြပါဟု ဗိုလ်ချုပ် တာဘုန်းကျော်က ရေးသားထားသည်။

ပြီးခဲ့သည့် နိုဝင်ဘာလ (၂၉) ရက်မှ စတင်ပြီး မိုးကုတ်မြို့နှင့် မိုးမိတ်မြို့များသို့ စစ်ကော်မရှင်တပ် အင်အားထောင်နှင့်ချီ TNLA လုံခြုံရေးဖြင့် ပြန်လည်ဝင်ရောက်လာခဲ့ပြီး မြို့သိမ်းတိုက်ပွဲများတွင် အတူပါဝင် တိုက်ခိုက်ခဲ့ကြသည့် တော်လှန်ရေးအင်အားစု PDF တပ်ဖွဲ့များမှာ မြို့ပြင်ဘက် ဆုတ်ခွာထားရသည်။

နိုဝင်ဘာလ (၃၀) ရက်တွင် တော်လှန်ရေးအင်အားစု PDF တပ်ဖွဲ့များ တပ်စွဲထားသည့် မိုးကုတ်အနောက်ပိုင်း မြို့ပြင်နေရာများအထိ စစ်ကော်မရှင်ဘက်မှ တပ်စခန်းအခြေစိုက်ရန် လုပ်ဆောင်လာခြင်းကြောင့် PDF တပ်ဖွဲ့များနှင့် နှစ်ရက်ဆက်တိုက် ထိတွေ့တိုက်ပွဲ ပြင်းထန်နေပြီး စစ်ကော်မရှင်တပ်က လက်နက်ကြီး ရမ်းသမ်းပစ်ခတ်နေကြောင်း မိုးကုတ်ဒေသခံများက ပြောသည်။