သျှမ်းပြည်မြောက်ပိုင်းနှင့် မန္တလေးနယ်စပ်ရှိ မိုးကုတ်မြို့မှ မိုးမိတ်မြို့ဘက်သို့ ချီတက်လာသည့် စစ်ကော်မရှင်တပ်နှင့် ထိတွေ့တိုက်ပွဲ ဖြစ်ပွားခဲ့ကြောင်း စုံစမ်းသိရသည်။

TNLA တပ်ဆုတ်ခွာမည်ဟု ကြေညာထားသည့် မိုးကုတ်မြို့ထဲသို့ စစ်ကော်မရှင်တပ်များ အင်အားထောင်နှင့်ချီ ပြန်လည်ဝင်ရောက်ခဲ့ပြီးနောက် ယမန်နေ့ (နိုဝင်ဘာလ ၃၀ ရက်) ၌ မိုးမိတ်မြို့ဘက်သို့ စစ်ကော်မရှင်တပ် ဆက်လက်ထွက်ခွာသွားစဉ် KIA နှင့် PDF ပူးပေါင်းတပ်ဖွဲ့များက ည ၈ နာရီခန့်တွင် ကြားဖြတ်တိုက်ခိုက်ခဲ့ကြောင်း KIA ပြောရေးဆိုခွင့်ရှိသူ ဗိုလ်မှူးကြီးနော်ဘူက အတည်ပြုသည်။

“မနေ့က ည ၈ နာရီ ဝန်းကျင်လောက်မှာ မိုးကုတ်ကနေ မိုးမိတ်ဘက်ကို သွားတဲ့ လမ်းပေါ်မှာ တိုက်ပွဲဖြစ်တယ်ဆိုတာ အဲ့လောက်ပဲ ကြားပါတယ်။ အဲ့ဒီ စစ်ကြောင်းတွေကတော့ မိုးမိတ်မှာ ထိုင်ဖို့ တက်လာတဲ့ စစ်ကြောင်းလား ဒါမှမဟုတ် မိုးကုတ်က လုံခြုံရေးလွှတ်တဲ့ အဖွဲ့တွေနဲ့ တွေ့တာလား အဲ့ဒီ အသေးစိတ် အခြေအနေကိုတော့ ပြန်တော့ မကြားဖြစ်ပါဘူး” ဟု ဗိုလ်မှူးကြီးနော်ဘူ က သျှမ်းသံတော်ဆင့်ကို ဖြေကြားသည်။

စစ်ကော်မရှင်တပ်သည် TNLA လုံခြုံရေးဖြင့် မိုးကုတ်မြို့ထဲသို့ နိုဝင်ဘာလ (၂၉) ရက် ညပိုင်းတွင် ပြန်လည်ဝင်ရောက်ခဲ့ပြီးနောက် ယမန်နေ့တွင် တော်လှန်ရေးအင်အားစု PDF တပ်ဖွဲ့များ တပ်စွဲထားသည့် မိုးကုတ်အနောက်ပိုင်း မြို့ပြင်နေရာများအထိ တပ်စခန်းအခြေစိုက်ရန် လုပ်ဆောင်လာခြင်းကြောင့် PDF တပ်ဖွဲ့များနှင့် ထိတွေ့တိုက်ပွဲ ပြင်းထန်ခဲ့ကြောင်း မိုးကုတ်ဒေသခံများက ပြောသည်။

ကချင်လွတ်လပ်ရေးတပ် KIA ထိန်းချုပ်ထားသည့် မဘိမ်းမြို့နယ်နှင့် စစ်ကော်မရှင်တပ် ပြန်လည်ဝင်ရောက်လာသည့် မိုးမိတ်မြို့နယ်တို့မှာ နယ်နိမိတ်ချင်း ထိစပ်နေခြင်းကြောင့် စစ်ကောင်မရှင်တပ်နှင့် PDF များ တိုက်ပွဲဖြစ်ပွားပါက စစ်ရေးအရ ဝင်ရောက်ကူညီမည်ဟု ဗိုလ်မှူးကြီး နော်ဘူ က ဆက်ပြောသည်။

“KIA ကတော့ ဝင်တိုက်တဲ့ အစီအစဉ်ကတော့ မရှိလောက်ဘူးလို့ ကျွန်တော် ပြောတာပေါ့နော်။ ဒါပေမဲ့ PDF တွေနဲ့ တိုက်ပွဲဖြစ်ရင်တော့ မိုးမိတ်ကတော့ ကျွန်တော်တို့နဲ့ ဆက်စပ်နေတဲ့ ဒေသ ဖြစ်နေတယ်၊ မြို့ ဖြစ်နေတယ်။ ဒါကြောင့် ကျွန်တော်တို့လည်း စစ်ရေးအရကတော့ ဝင်ကူတဲ့ အနေအထားတော့ ရှိလောက်ပါတယ်”ဟု KIA ပြောရေးဆိုခွင့်ရှိသူ ဗိုလ်မှူးကြီး နော်ဘူ က ထပ်လောင်းပြောသည်။

မိုးကုတ်မြို့မှတဆင့် မိုးမိတ်မြို့သို့ ချီတက်သွားသည့် စစ်ကော်မရှင်တပ် ယာဉ်တန်းသည် မိုးမိတ်မြို့ထဲသို့ ယမန်နေ့ ညပိုင်းတွင် ရောက်ရှိခဲ့ပြီး ယနေ့ (ဒီဇင်ဘာလ ၁ ရက်) နံနက်ပိုင်းတွင် မြို့နေရာအနှံ့တွင် နေရာယူ တပ်စွဲထားကြောင်း ဒေသခံများထံမှ သိရသည်။

ထိုသို့ စစ်ကော်မရှင်တပ်များ ပြန်လည်ဝင်ရောက်လာပြီးနောက် မိုးမိတ်မြို့အနီးရှိ TNLA တပ်ဖွဲ့ဝင်အချို့မှာ တပ်ဆုတ်ခွာသွားပြီး မြို့အုပ်ချုပ်ရေးကို ဒီဇင်ဘာလကုန်အထိ စစ်ကော်မရှင်တပ်နှင့် ပူးတွဲလုပ်ဆောင်သွားမည်ဟု ဒေသခံများမှ ပြောဆိုနေကြသော်လည်း သျှမ်းသံတော်ဆင့်မှ သီးခြားအတည်ပြုနိုင်ခြင်း မရှိသေးပေ။

ယမန်နှစ် ၂၀၂၄ ဇန်နဝါရီလအတွင်း မိုးမိတ်မြို့ရှိ စစ်ကော်မရှင်တပ်စခန်း၊ ရဲစခန်းများကို ကချင်လွတ်လပ်ရေးတပ် KIA နှင့် PDF ပူးပေါင်းတပ်ဖွဲ့များ တိုက်ခိုက်သိမ်းပိုက်နိုင်ခဲ့ပြီး ရက်ပိုင်းအကြာတွင် ပြန်လည်လက်လွှတ်ခဲ့ရသည်။

မိုးမိတ်မြို့နယ်တွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA အပြင် ကချင်လွတ်လပ်ရေးတပ် (KIA) ၊ ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) ၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF) နှင့် ပြည်သူ့ကာကွယ်ရေးတပ်ဖွဲ့ PDF များလည်း သွားလာလှုပ်ရှားနေသည်။