သျှမ်းပြည်တောင်ပိုင်း ရွာငံမြို့နယ် မြင်းကျဒိုးကျေးရွာတွင် စစ်ကော်မရှင်လက်အောက်ခံ ပျူစောထီးခေါင်းဆောင်နှင့် ၎င်းလက်အောက်ငယ်သား အမျိုးသားတစ်ဦး ပစ်ခတ်တိုက်ခိုက်ခံရပြီး သေဆုံးသွားခဲ့ကြောင်း သတင်းရရှိသည်။

နိုဝင်ဘာလ ၂၉ ရက်တွင် ရွာငံမြို့နယ် မြင်းကျဒိုးကျေးရွာ၌ နေထိုင်သည့် အသက် ၆၀ ဝန်းကျင် ပျူစောထီးခေါင်းဆောင် ဦးဝင်းမြင့်နှင့် ၎င်း၏လက်အောက်ငယ်သား အမျိုးသားတစ်ဦးတို့ လိုက်ပါစီးနင်းလာသည့် အိမ်စီးကားကို ရွာငံ-အောင်ပန်း အမြန်လမ်းကြီး တစ်နေရာတွင် ဓနုပြည်နယ်အမျိုးသားလွတ်မြောက်ရေးတပ်ဖွဲ့ (DSNDA) က ပစ်ခတ်တိုက်ခိုက်ခဲ့ရာ ၂ ဦးလုံး သေဆုံးသွားခဲ့ကြောင်း သိရသည်။

“အဲဒီ ပျူစောထီးခေါင်းဆောင်က ရွာငံမှာ စကစနဲ့ ပေါင်းပြီး ပြည်သူအိမ်တွေ မွှေနှောက်တာတွေ၊ ပိုင်ဆိုင်မှု မတရား သိမ်းတာ ဖမ်းတာ အစုံလုပ်တယ်။ သူ့လက်အောက်ငယ်သားတွေလည်း မွေးထားတယ်၊ ကျနော်တို့ အဖွဲ့က ရှင်းလင်းလိုက်တာပါ”ဟု DSNDA တပ်ဖွဲ့မှ တာဝန်ရှိသူ တစ်ဦးက သျှမ်းသံတော်ဆင့်ကို ပြောသည်။

ထိုသို့ ပစ်ခတ်တိုက်ခိုက်ခံရပြီး သေဆုံးသွားသည့် ပျူစောထီးခေါင်းဆောင်နှင့် ၎င်းလက်အောက်ခံ အမျိုးသား တစ်ဦးတို့သည် ရွာငံမြို့နယ်အတွင်း ပြည်သူများကို စစ်ကော်မရှင် အလိုကျ ဖမ်းဆီးခြင်း၊ နှိပ်စက်ခြင်း ပြုလုပ်ပြီး တော်လှန်ရေးတပ်ဖွဲ့ဝင်များနှင့် နီးစပ်သူများကိုလည်း ရှာဖွေကာ စစ်ကော်မရှင်ထံ သတင်းပေးမှုများ ပြုလုပ်ခဲ့ကြောင်း ဆိုသည်။

ရွာငံမြို့နယ်တွင် နိုဝင်ဘာလ တစ်လအတွင်း စစ်ကော်မရှင်လက်အောက်ခံ ပျူစောထီး၊ အုပ်ချုပ်ရေးမှူး အပါအဝင် အရပ်သား ခြောက်ဦး အသတ်ခံခဲ့ရသည်။

ထို့အပြင် နိုဝင်ဘာလ ၂၇ ရက်တွင်လည်း ရွာငံမြို့နယ် နွားဘန်းကြီး ကျေးရွာမှ အမျိုးသားတစ်ဦးကို အမည်မသိ လက်နက်ကိုင်တပ်ဖွဲ့မှ လာရောက် သတ်ဖြတ်သွားသောကြောင့် ကျေးရွာအတွင်း စစ်ကော်မရှင်တပ်ဖွဲ့ဝင်များ ဝင်ရောက် စစ်ဆေးနေကြောင်း ဒေသခံများက ပြောဆိုသည်။

“ရွာသားတစ်ဦး အသတ်ခံရလို့ စစ်တပ်တွေ ရွာထဲ ဝင်မွှေနေတာ။ ဖုန်းလည်း လိုက်စစ်တာ တစ်အိမ်တက်ဆင်းကို မေးနေတာ။ သူတို့ တပ်စွဲနေတဲ့ ကြားထဲက ဖြစ်သွားတော့ သူတို့ စိတ်တိုနေတာ၊ ပြည်သူတွေကို ဖိနေတာ”ဟု ရွာငံမြို့နယ်မှ အမျိုးသားတစ်ဦးက ပြောသည်။

အဆိုပါ အသတ်ခံရသူ အမျိုးသားတစ်ဦးသည် အသက် ၄၀ ဝန်းကျင် ရှိပြီဖြစ်ပြီး မည်သူ လာရောက်သတ်ဖြတ်သွားသည်ကို အတိအကျ မသိရဘဲ ရန်ငြိုးရှိ၍ အသတ်ခံရသည်ဟု ဒေသခံများက မှတ်ချက်ပြုသည်။

ရွာငံမြို့နယ်တွင် စစ်ကော်မရှင် လက်အောက်ခံ အုပ်ချုပ်ရေးမှူး၊ ပျူစောထီးများနှင့် အရပ်သားများ မကြာခဏ အသတ်ခံနေရသောကြောင့် ကျေးရွာအတွင်း အုပ်ချုပ်ရေးမှူး တာဝန်ယူမည့်သူပင် မရှိတော့ကြောင်း သိရသည်။

“ရွေးကောက်ပွဲ နီးလာလို့လား မသိဘူး၊ ဒီလထဲ အသတ်ခံရတာ တော်တော်ကြားလာရတာ။ စစ်တပ်ဘက်ကလည်း ပြည်သူတွေကို အရမ်းဖိလာတယ်။ ဟိုဘက် ဒီဘက် ကြောက်နေရတာ၊ ပြည်သူတွေက လန့်နေရတာ”ဟု ရွာငံဒေသခံ အမျိုးသမီး တစ်ဦးက ပြောသည်။

ရွာငံမြို့နယ်တွင် လွန်ခဲ့သည့် ၂၀၂၄ ခုနှစ်မှစ၍ ယခု ၂၀၂၅ ခုနှစ် နိုဝင်ဘာလအတွင်း ဒလန်ဟု စွပ်စွဲကာ အသတ်ခံရသည့် အရပ်သားနှင့် အုပ်ချုပ်ရေးမှူး ၁၆ ဦးအထိ ရှိလာကြောင်း သျှမ်းသံတော်ဆင့် ကောက်ယူထားသည့် စာရင်းအရ သိရသည်။

လက်ရှိ ရွာငံမြို့နယ်တွင် စစ်ကော်မရှင်တပ်၊ ၎င်း၏လက်အောက်ခံ ပျူစောထီးတပ်၊ ပအိုဝ်းပြည်သူ့စစ် PNO တပ်နှင့် ဓနုအမျိုးသားလွတ်မြောက်ရေးတပ်ဦး DPLA/DPLF အပြင် ဓနုပြည်နယ် အမျိုးသားလွတ်မြောက်ရေးတပ်မတော် (DSNDA) တို့ အခြေစိုက် ထားကြောင်း သိရသည်။