သျှမ်းပြည်တောင်ပိုင်း ဟိုပုံးမြို့နယ် မဲနယ်တောင် ဒေသအတွင်းနေထိုင်သူများသည် ပအိုဝ်းပြည်သူ့စစ် (PNO)ထံ စစ်မှုထမ်းကြေး မထည့်လျှင် ကျေးရွာမှ နှင်ထုတ်မည် ဟု ဒေသခံများကို ခြိမ်းခြောက်နေကြောင်း သတင်းရရှိသည်။

စစ်ကော်မရှင်က ပြီးခဲ့သည့် ၂၀၂၄ ခုနှစ်မှစ၍ စစ်မှုထမ်းဥပဒေကို အတည်ပြုပြီးနောက် သျှမ်းပြည်နယ် အပါအဝင် မြန်မာတစ်နိုင်ငံလုံးတွင် ပေါ်တာဆွဲခြင်း၊ အလှည့်ကျ မဲနှိုက်ခြင်း၊ စစ်မှုမထမ်းနိုင်လျှင် ငွေကြေးလစဉ် ထည့်နေကြရသည်။

စစ်အာဏာသိမ်းပြီးနောက် မဲနယ်တောင်ဒေသ အတွင်း စစ်ရေးပဋိပက္ခဒဏ်အပြင် သဘာဝပတ်ဝန်းကျင်ဒဏ် ဖြစ်သည့် ရေကြီးမှုဒဏ်ကိုလည်းခံရကာ စိုက်ပျိုးရေးလုပ်ကိုင်မှု ခက်ခဲနေသည့်ကြား PNO ထံ နှစ်နှစ်ဆက်တိုက် စစ်မှုထမ်းကြေး ထည့်ခဲ့ရသည်။

ထို့ကြောင့် ယခုနှစ်အတွင်း ဘက်ပေါင်းစုံ ခက်ခဲမှုကြား စစ်ကော်မရှင်အတွက် တစ်အိမ်လျှင် ကျပ်ငွေ ငါးသောင်းနှင့် PNO အတွက် လက်နက်ဖိုး၊ ကျည်ဆံဖိုးနှင့် စားသောက်စရိတ်အတွက် တစ်အိမ်လျှင် ကျပ်ငွေ ငါးသောင်း ထပ်မံထည့်ရသည်။

“ ကျနော်တို့ မှာက စစ်ဒဏ်ရော ရေဘေးဒဏ်ရော ခံရတာ ဘာမှ စိုက်ပျိုးလို့မရဘူး။ ဒါကြားထဲ PNO ရော စစ်တပ်ကိုရော စစ်မှုထမ်းကြေးထပ်ပေးရတယ်။ ကျနော်တို့ မပေးနိုင်ရင် ရွာကနေ မောင်းထုတ် အရေးယူမှာ ကြောက်တယ်။ လကုန်ရင် အကြွေးရှင်က အကြွေးလာတောင်းသလိုပဲ” ဟု မဲနယ်တောင် ဒေသခံ အမျိုးသားတစ်ဉီးက သျှမ်းသံတော်ဆင့် ကိုပြောသည်။

ထိုမဲနယ်တောင်ဒေသအတွင်းရှိ စငေါကျေးရွာအုပ်စုနှင့် စံဖူးကျေးရွာအုပ်စုသည် ၂၀၂၄ခုနစ် စက်တင်ဘာလအတွင်း မိုးသည်းထန်ရွာသွန်းမှုကြောင့် ရေဘေးသင့် ဒဏ်ခံခဲ့ရကာ ယနေ့ချိန်အထိ နလန်မထူနိုင်သေးကြောင်းလည်း ၎င်းက ဆိုသည်။

စစ်ကော်မရှင်နှင့် PNO တို့ အပြိုင်အဆိုင် စစ်မှုထမ်းကောက်ယူလာမှုကြောင့် လူငယ်များသည် မဲနယ်တောင်ဒေသကို စွန့်ခွာပြီး နယ်စပ်ဒေသသို့ပြောင်းရွှေ့အလုပ်လုပ်ကိုင်ကြသည်။

ထို့ကြောင့် စစ်မှုထမ်းရန် လူငယ်မရှိသည့် နောက်ပိုင်း ၎င်းတပ်ဖွဲ့များသည် စစ်မှုထမ်းကြေးဟု နာမည်ထပ်မံပြောင်းလဲ ကောက်ယူလာကြသည်။

“ လူငယ်တွေမရှိတော့။ လူကြီးတွေ ဆီကို စစ်မှုထမ်းကြေးကောက်တယ်။ အလုပ်ကမရှိ စားစရာမရှိကြား PNO နဲ့ စစ်တပ်ကို နေ့စားလိုက်ပြီး ထည့်ရတာပဲ။ လတိုင်းမထည့်နိုင်ကြဘူး” ဟု အသက် ၄၀အရွယ်ရှိ မဲနယ်တောင်ဒေသ အမျိုးသားတစ်ဉီးက သျှမ်းသံတော်ဆင့်ကိုပြောသည်။

ပြီးခဲ့သည့် ၂၀၂၄ ခုနှစ် အောက်တိုဘာလတွင် ရေးဘေးသင့်သူများကို ဂျပန်နိုင်ငံ အဖွဲ့အစည်း တစ်ခုမှ တစ်အိမ်လျှင်ကျပ် ငါးသောင်းလာရောက်လှူဒါန်းခဲ့သော်လည်း PNA တပ်သားများက လာရောက်သိမ်းယူသွားကြောင်း သိရသည်။

ပြီးခဲ့သည့် ယခုနှစ် ဖေဖော်ဝါရီ (၁၇)ရက်မှ စပြီး PNO/PNA တပ်သားများသည် ဟိုပုံးမြို့နယ်ရှိ ကျေးရွာများထဲသို့ အသုံးမပြုသော စက်များ၊ လက်ကြိတ်စက်များ၊ ရေအားဖြင့် အလိုအလျောက်မောင်းထောင်းသည့် စက်၊ ဆိုင်ကယ်များရှိသည့်နေအိမ်များကို လစဉ် အခွန်(ဆက်ကြေး)လိုက်လံကောက်ယူနေပြီး၊ မပေးဆောင်နိုင်လျှင် နေအိမ်ဖယ်ရှားသွားမည်ဟု အမိန့်ထုတ်ပြန်ခဲ့သည်။