သျှမ်းပြည်တောင်ပိုင်း ရွာငံမြို့နယ် မြိုင်ကျေးရွာတွင် အမျိုးသားတစ်ဉီးကို ဒလန်ဟုဆိုကာ အမည်မသိ လက်နက်ကိုင်မှ ဓားဖြင့်ထိုးသတ်ခဲ့ကြောင်းသတင်းရရှိသည်။

ပြီးခဲ့သည့် နိုဝင်ဘာလ ၂၆ ရက် ညပိုင်းတွင် ရွာငံမြို့နယ် မြိုင်ကျေးရွာတွင်နေထိုင်သည့် အသက် ၃၀ အရွယ်ရှိ အမျိုးသားတစ်ဦးကို ဒလန်ဟုဆိုကာ ၎င်း၏ အမျိုးသမီး ရှေ့မှောက်တွင် အမည်မသိ လက်နက်ကိုင်တပ်ဖွဲ့မှ ဓားဖြင့် ထိုးသတ်ခဲ့ကြောင်း ရွာငံဒေသခံ အမျိုးသမီးတစ်ဉီးက သျှမ်းသံတော်ဆင့်ကို ပြောသည်။

“အမျိုးသမီးကို ဒူးထောက်ခိုင်းပြီး အမျိုးသားကိုတော့ သူ့ရဲ့ရှေ့မှာပဲ လည်ပင်းကို ဓားနဲ့ ထိုးသတ်သွားတာ။ အမျိုးသမီးကိုတော့ မသတ်ဘူး။ ဒလန်ဆိုပြီး သတ်သွားတာပဲ” ဟု ၎င်းအမျိုးသမီးက ပြောသည်။

အဆိုပါ အသတ်ခံရသည့် အမျိုးသားသည် စိုက်ပျိုးရေးလုပ်ငန်းဖြင့် အသက်မွေးဝမ်းကျောင်း ပြုနေသူဖြစ်ပြီး၊ မိသားစုကို ရှာဖွေကျွေးမွေးနေသူ ဖြစ်ကြောင်း ဒေသခံများက ပြောသည်။

ရွာငံမြို့နယ်အတွင်း လွန်ခဲ့သည့် ၂၀၂၄ ခုနစ်မှ ယခုနှစ် ၂၀၂၅ ခုနစ် နိုဝင်ဘာလတွင်း ဒလန်ဟုစွပ်စွဲကာ အသတ်ခံရသည့် အရပ်သားနှင့် အုပ်ချုပ်ရေးမှူး ၁၃ ဦး အထိ ရှိလာပြီဖြစ်ကြောင်း သျှမ်းသံတော်ဆင့် ကောက်ယူထားသည့် စာရင်းအရ သိရသည်။

ရွာငံမြို့နယ်အတွင်း စစ်ကော်မရှင်လက်အောက်ခံ အုပ်ချုပ်ရေးမှူး တာဝန်ယူသူများ၊ စစ်ကော်မရှင်နှင့် ပူးပေါင်းသူများ မကြာခဏ လုပ်ကြံခံနေရသဖြင့် ဒေသခံများလည်း စိုးရိမ်ထိတ်လန့်မှု ဖြစ်နေကြသည်။

“စစ်တပ်လည်း ကြောက်ရ၊ PDF ကိုလည်း ကြောက်ရ ဘယ်အဖွဲ့နဲ့မှကို မပတ်သက်ရဲတာ။ ဒီလိုပဲ ဒေသခံတွေက ကြားခံဆိုတော့ သတိရှိရှိနဲ့ လိုက်လျောညီထွေအောင် နေထိုင်ရတာပေါ့။ PDF လို့လည်း စွပ်စွဲလို့ မရဘူး၊ သူတို့လည်း ဖြစ်ကောင်း ဖြစ်နိုင်တယ်။ ပျူစောထီးတွေက အမြင်ကပ်ပြီး သတ်တာတို့၊ သူတို့သတ်ပြီး တော်လှန်ရေး အဖွဲ့ကို လွှဲချတာလည်း ဖြစ်နိုင်တယ်”ဟု ရွာငံမြို့နယ် မြိုင်ကျေးရွာအုပ်စုမှ ဒေသခံ အမျိုးသားတစ်ဦးက ပြောသည်။

ပြီးခဲ့သည့် အောက်တိုဘာလ ၅ ရက်တွင်လည်း ရွာငံမြို့နယ် တပ်ကုန်းကျေးရွာမှ အုပ်ချုပ်ရေးမှူး တစ်ဦးနှင့် မြသိန်းတန်ကျေးရွာမှ အရပ်သားတစ်ဦးကို ရွာငံမြို့ ဝက်သတ်ခုံတွင် အမည်မသိလက်နက်ကိုင် အဖွဲ့မှ ဓားဖြင့် ထိုးသတ်သွားခဲ့သည်။

စစ်ကော်မရှင် အာဏာသိမ်းပြီးနောက် ရွာငံမြို့နယ် အခြေစိုက် လက်နက်ကိုင် တော်လှန်ရေးတပ်များ ပေါ်လာပြီး စစ်ကော်မရှင်တပ်နှင့် မကြာခဏ ထိတွေ့မှု ဖြစ်ကာ စစ်ကော်မရှင်တပ်မှ စစ်ကြောင်းထိုးကာ ရွာသားများကို မကြာခဏ ဖမ်းဆီး စစ်ဆေးလေ့ရှိသည်။

လက်ရှိ ရွာငံမြို့နယ်တွင် စစ်ကော်မရှင်တပ်၊ ၎င်း၏လက်အောက်ခံ ပျူစောထီးတပ်၊ ပအိုဝ်းပြည်သူ့စစ် PNO တပ်နှင့် ဓနုအမျိုးသားလွတ်မြောက်ရေးတပ်ဦး DPLF/DPLA အပြင် ဓနုပြည်နယ်အမျိုးသားလွတ်မြောက်ရေး တပ်မတော်(DSNDA) တို့ အခြေစိုက်ထားကြောင်း သိရသည်။