သျှမ်းပြည်မြို့တော် တောင်ကြီးမြို့တွင် လောင်းကစားဝိုင်းများကို ပေါ်ပေါ်ထင်ထင် လုပ်ကိုင် လည်ပတ်နေကြောင်း သတင်းသိရသည်။
ယခုနှစ် ၂၀၂၅ နှစ်ဆန်းပိုင်းမှ စတင်ပြီး တောင်ကြီးမြို့ရှိ ဘုရားဖြူရပ်ကွက်နှင့် ပလီလင်းရွာတို့တွင် လောင်းကစားဝိုင်းများကို ပေါ်ပေါ်ထင်ထင် ဖွင့်လှစ်ပြီး လည်ပတ်လုပ်ကိုင်မှု ရှိနေကြောင်း လုံခြုံရေးအရ အမည်မဖော်လိုသည့် အုပ်ချုပ်ရေးအဖွဲ့ဝင်တစ်ဦးက သျှမ်းသံတော်ဆင့်ကို ပြောသည်။
“ဒီလိုမျိုး လောင်းကစားဝိုင်းတွေ ဖွင့်ဖို့က ဆိုင်ရာပိုင်ရာ လူကြီးတွေရဲ့ ခွင့်ပြုချက်နဲ့ ဖွင့်မှပဲ ရမှာပေါ့၊ ဒါတွေက ပိုက်ဆံပေးပြီး လိုင်းကြေးနဲ့ လုပ်ရတာပဲ။ မြို့ပေါ်မှာတော့ မရှိဘူး၊ ပလီလင်းနဲ့ ဘုရားဖြူ အစွန်တွေမှာ ရှိတာပါ။ အရင်ကတည်းက ရှိပါတယ်၊ ဒီနောက်ပိုင်းမှ လူပိုသိလာတာ”ဟု လုံခြုံရေးအရ အမည်မဖော်လိုသူ တောင်ကြီးမြို့မှ အုပ်ချုပ်ရေးမှူးတစ်ဦးက ပြောသည်။
တောင်ကြီးမြို့တွင် ဖွင့်လှစ်ထားသည့် ငါးပစ်ဂိမ်း၊ ဂျင်ဝိုင်း စသည့် လောင်းကစား လုပ်ငန်းအချို့သည် စစ်ကောင်စီနှင့် ၎င်းလက်အောက်ခံ ပအိုဝ်းပြည်သူ့စစ် (PNO) ထံ အခွန်အခ ပေးဆောင်၍ ခွင့်ပြုချက် ရယူပြီး ပေါ်ပေါ်ထင်ထင် လုပ်ကိုင်နေကြောင်း တောင်ကြီးမြို့ ဒေသခံများက ပြောသည်။
“လောင်းကစားဝိုင်းက ပေါ်တင်မဟုတ်လည်း သူဟာနဲ့ သူတော့ ရှိပါတယ်။ အရင်ကတည်းကလည်း ရှိတယ်။ အခုက လွတ်လွတ်လပ်လပ် ရဲတွေကိုရော အုပ်ချုပ်ရေးမှူးတွေကိုရော ပိုက်ဆံပေးပြီး ဖွင့်နေကြတာပေါ့။ ဂျင်ဝိုင်းတွေ ငါးဂိမ်းခုံတွေ ရှိတာ”ဟု တောင်ကြီးမြို့ ဒေသခံအမျိုးသားတစ်ဦးက ပြောသည်။
တောင်ကြီးမြို့တွင် ယခုကဲ့သို့ လောင်းကစားဝိုင်းများကို ပေါ်ပေါ်ထင်ထင် ဖွင့်လှစ်ခွင့်ပြုခြင်းကြောင့် နောက်ဆက်တွဲ အကျိုးဆက် အနေဖြင့် ခိုးဆိုးလုယက်မှုများ၊ ဓားပြတိုက်မှုများ တိုးမြှင့်လာမည်ကို ဒေသခံများက စိုးရိမ်ကြောင်း ၎င်းအမျိုးသားက ဆက်ပြောသည်။
“လောင်းကစားတွေက မလုပ်ရင် ကောင်းတာပေါ့၊ လောင်းကစားရှိရင်တော့ မြို့မှာကတော့ ခိုးမှုတွေ များမှာပဲ။ ပိုက်ဆံမရှိရင် ခိုးကြမှာပါ အဲ့ဒီလောင်းကစားသမားတွေက။အဲ့တာတွေပဲ စိုးရိမ်ရတာ”ဟု အဆိုပါ ဒေသခံအမျိုးသားက ထပ်လောင်းပြောသည်။
စစ်အာဏာသိမ်းပြီးနောက် တောင်ကြီးမြို့တွင် လူမျိုးပေါင်းစုံ ရွှေ့ပြောင်းရောက်ရှိ နေထိုင်လာပြီး ခိုးဆိုးလုယက်မှုများ၊ နည်းမျိုးစုံသုံး ငွေလိမ်လည်မှုများ၊ ဓားပြတိုက်မှုများ ကြုံတွေ့လာရသည်။
တောင်ကြီးမြို့အတွင်းသို့ လွိုင်ကော်မြို့နယ်၊ ပင်လောင်းမြို့နယ်၊ ဆီဆိုင်မြို့နယ်နှင့် သျှမ်းပြည်မြောက်ပိုင်း သိန္နီ၊ လားရှိုး၊ ကျောက်မဲ၊ သီပေါမြို့နယ်ဘက်မှ စစ်ဘေးရှောင်များအပြင် မြေပြန့်ဒေသဘက်မှ တက်လာသည့် စစ်ဘေးရှောင်များလည်း ရှိကြောင်း သိရသည်။
တောင်ကြီးမြို့သည် စစ်ကော်မရှင်တပ် အရှေ့ပိုင်း တိုင်းစစ်ဌာနချုပ် အခြေစိုက်သော်လည်း လက်ရှိတွင် ဒုစရိုက်သမား ပေါများသည့် ဒေသတစ်ခု ဖြစ်နေသည်။
Leave a Comments