သျှမ်းပြည်မြောက်ပိုင်းနှင့် မန္တလေးတိုင်းနယ်စပ်ရှိ မိုးကုတ်၊ မိုးမိတ်မြို့များထဲသို့ စစ်ကော်မရှင်တပ်များ ပြန်လည်ဝင်ရောက်နိုင်ရေးအတွက် TNLA က စစ်အင်အား ဖြန့်ကြက်ချထားကာ လုံခြုံရေး ယူပေးနေကြောင်း ဒေသခံများပြောဆိုမှုအရ သိရသည်။

တအာင်း(ပလောင်) အမျိုးသားလွတ်မြောက်ရေးတပ်မတော် TNLA က တပ်ဆုတ်ခွာမည်ဟု ကြေညာထားသည့် မိုးကုတ်နှင့် မိုးမိတ်မြို့များထဲသို့ စစ်ကော်မရှင်တပ်များ ပြန်လည်ဝင်ရောက်လာပါက လုံခြုံရေး ယူပေးနိုင်ရန်အတွက် ယခု နိုဝင်ဘာလ နောက်ဆုံးပတ်မှ စတင်၍ TNLA ဘက်က စစ်အင်အားများကို မြို့ပတ်လည်တွင် တိုးမြှင့်ချထားကာ လုံခြုံရေးယူနေသည်ဟု ဒေသခံများက ပြောသည်။

“TNLA က တပ်ဆုတ်မယ်ပြောပေမယ့် စစ်တပ်ဝင်လာရင် လုံခြုံရေးယူဖို့ အင်အား ထပ်တိုးထားတယ်။ မန်ဖွယ်နဲ့ မန်အုံ မြို့ပြင်လိုနေရာတွေရော၊ မြို့ထဲမှာပါ စစ်တပ်ကို လုံခြုံရေးယူပေးဖို့ အများကြီးပဲ အင်အားစုထားတာ။ စစ်တပ်က ဘယ်ဘက်က ဝင်လာမလဲ မသိရသေးဘူး၊ တချို့ကလည်း အထက်ပိုင်းကနေ လာမယ်လို့လည်း ပြောနေကြတယ်” – ဟု မိုးမိတ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

မိုးကုတ်နှင့် မိုးမိတ် နှစ်မြို့လုံးတွင် TNLA နှင့် စစ်ကော်မရှင်ကြား ဆက်ဆံရေးရုံး ဖွင့်လှစ်ထားကြောင်း သိရပြီး ယနေ့ (နိုဝင်ဘာလ ၂၅ ရက်) နောက်ဆုံးထား၍ TNLA လက်အောက်ခံ ရဲတပ်ဖွဲ့နှင့် အခြားရုံး ဝန်ထမ်းများ မြို့ထဲမှ ဆုတ်ခွာနေကြောင်း မိုးမိတ်ဒေသခံများက ပြောသည်။

လက်ရှိ မိုးကုတ်နှင့် မိုးမိတ်မြို့များတွင် စစ်ကောင်စီတပ် ပြန်လည်ဝင်ရောက်လာပါက TNLA ဘက်မှ လုံခြုံရေးယူပေးရန် စစ်အင်အား ဖြည့်တင်းနေခြင်းနှင့် ပတ်သက်၍ TNLA ပြောရေးဆိုခွင့်ရှိသူ လွေးယေဦး ထံ မေးမြန်းအတည်ပြုနိုင်ရန် သျှမ်းသံတော်ဆင့်မှ ဆက်သွယ်ခဲ့သော်လည်း ယခင်က လက်ခံဖြေကြားခဲ့သည့် ဖုန်းနံပါတ်မှာ “တပ်ဆင်ထားခြင်းမရှိပါ” ဖြုတ်ချထားသည်။

“TNLA ရဲနဲ့ သူ့ရုံးဝန်ထမ်းတွေတော့ ၂၅ ရက်နေ့ နောက်ဆုံးထားပြီး မြို့ထဲက ထွက်နေကြပြီ။ တချို့လည်း ၂၅ ရက်နေ့ အပြီးထွက်ဖို့ ပြောကြလို့ မနေ့ကတည်းက ပစ္စည်းသိမ်းပြီး ထွက်နေကြပြီ။ နောင်ချို၊ ကျောက်မဲလို စစ်တပ်ပြန်ရပြီးရင် ဟိုလူဖမ်း ဒီလူဖမ်း အဲလိုလုပ်မှာ ကြောက်လို့ အများကြီး ပြေးကြတယ်။ စိုးရိမ်တာကတော့ PDF နဲ့ တိုက်ပွဲထပ်ဖြစ်မှာ ကြောက်တာ” – ဟု မိုးမိတ်ဒေသခံ ၎င်းအမျိုးသားက ဆက်ပြောသည်။

လာမည့် နိုဝင်ဘာလ ၃၀ ရက်တွင် စစ်ကောင်စီတပ်ကို TNLA ဘက်က လုံခြုံရေးယူပေးကာ မိုးကုတ်မြို့ထဲသို့ အတူဝင်ရောက်မည်ဟု သိရပြီး မိုးကုတ်မြို့သိမ်းတိုက်ပွဲတွင် အတူပါဝင် တိုက်ခိုက်ခဲ့ကြသည့် တော်လှန်ရေးအင်အားစု PDF တပ်ဖွဲ့များမှာ မြို့ပြင်ဘက်သို့ ဆုတ်ခွာထားရကြောင်း မိုးကုတ်ဒေသခံများက ပြောသည်။

“စစ်တပ်ကို TNLA က လုံခြုံရေးယူပေးပြီး မိုးကုတ်ကို ၃၀ ရက်နေ့မှာ ခေါ်လာမယ်။ PDF တွေကိုတော့ သေနတ်မဖောက်ရဘူး၊ စစ်အင်အား မဖြည့်ရဘူးလို့ ပြောထားတာ ကြားတယ်။ အခု မြို့ထဲမှာလည်း မျက်နှာစိမ်းတွေ အများကြီး ရောက်လာတယ်။ သူတို့ (TNLA) ဆက်ဆံရေးရုံးက ဆိုင်းဘုတ် မတင်ထားတော့ လူမသိကြတာ” – ဟု မိုးကုတ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

အခြားတစ်ဖက်တွင် မိုးကုတ်မြို့သိမ်းတိုက်ပွဲတွင် အတူပါဝင် တိုက်ခိုက်ခဲ့ကြသည့် တော်လှန်ရေး အင်အားစု PDF တပ်ဖွဲ့များကို TNLA ဘက်က နိုဝင်ဘာလ ၁၆ ရက်နေ့၌ ခေါ်ယူတွေ့ဆုံခဲ့ပြီး စစ်ကော်မရှင်တပ် ပြန်လည်ဝင်ရောက်လာပါက သေနတ်ပစ်ဖောက်ခြင်း၊ တိုက်ခိုက်ခြင်း မပြုလုပ်ရန် ပြောဆိုခဲ့ကြောင်း သတင်းများ ထွက်ပေါ်နေသည်။

TNLA နှင့် စစ်ကောင်စီ ကိုယ်စားလှယ်များ ပြီးခဲ့သည့် နိုဝင်ဘာလ ၁၂ ရက်နေ့တွင် လားရှိုးမြို့ပေါ်၌ ထပ်မံတွေ့ဆုံခဲ့ပြီး မိုးကုတ်နှင့် မိုးမိတ်မြို့တို့မှ တပ်ဆုတ်မည့် အစီအစဉ်များ ဆွေးနွေးခဲ့ကြောင်း သိရသည်။

အောက်တိုဘာလ ၂၇-၂၈ ရက်နေ့များတွင် တရုတ်နိုင်ငံ၏ ကြားဝင်စေ့စပ်မှုကြောင့် TNLA နှင့် စစ်ကောင်စီ ကိုယ်စားလှယ်တို့ တရုတ်နိုင်ငံ ကူမင်းမြို့၌ (၉) ကြိမ်မြောက် တွေ့ဆုံဆွေးနွေးခဲ့ပြီး အပစ်အခတ်ရပ်စဲရေး လက်မှတ်ရေးထိုးခဲ့သည်။ သဘောတူ သတ်မှတ်ထားသည့် ကာလတွင် မိုးကုတ်နှင့် မိုးမိတ်မြို့နယ်များမှ TNLA တပ်ဆုတ်ခွာပေးမည် ဖြစ်ကြောင်း TNLA သတင်းနှင့် ပြန်ကြားရေးဌာနမှ အောက်တိုဘာလ ၂၉ ရက်နေ့တွင် တရားဝင် ထုတ်ပြန်ထားသည်။

ပြီးခဲ့သည့် နိုဝင်ဘာလ ၆ ရက် ညပိုင်းတွင် TNLA တပ်ဆုတ်ခွာမည်ဟု ကြေညာထားသည့် မိုးကုတ်မြို့၌ တော်လှန်ရေးအင်အားစုများနှင့် ဒေသခံပြည်သူများက စစ်အာဏာရှင်စနစ် ဆန့်ကျင်ရေးနှင့် စစ်ကောင်စီ ဘက်မှ မြို့ထဲသို့ ပြန်လည်ဝင်ရောက်လာမည်ကို လုံးဝလက်မခံရေးအတွက် သံပုံးတီး ဆန္ဒပြခဲ့ကြသည်။