သျှမ်းပြည်မြောက်ပိုင်း မြို့တော် လားရှိုးမြို့တွင် စစ်ရေးမတည်ငြိမ်မှုများကြားမှပင် လားရှိုးတက္ကသိုလ် ပြန်လည်ဖွင့်လှစ်နိုင်ရေးအတွက် စစ်ကော်မရှင် လက်အောက်ခံ တာဝန်ရှိသူများက ပြင်ဆင်နေကြောင်း ဒေသခံ ကျောင်းသူ ကျောင်းသားများ ပြောပြချက်အရ သိရသည်။

တရုတ်ကြားဝင်စေ့စပ်မှုဖြင့် ကိုးကန့်တပ်ဖွဲ့ MNDAA ထံမှ စစ်ကောင်စီ ပြန်လည်ထိန်းချုပ် ရယူထားသည့် လားရှိုးမြို့တွင် မြို့ပေါ်ရှိ လားရှိုးတက္ကသိုလ်၌ နေ့သင်တန်း ကျောင်းသား/သူများအတွက် လာမည့် နိုဝင်ဘာလ ၂၄ ရက်နေ့မှ စတင်၍ ပြန်လည်ဖွင့်လှစ် သင်ကြားသွားမည်ဟု လားရှိုးဒေသခံများက ပြောသည်။

“၂၄ ရက်နေ့ စဖွင့်မယ်လို့ ပြောတယ်၊ အဲဒီနေ့မှပဲ ကျောင်းသား ရှိ/မရှိ သိရမှာပါ။ ပြန်ဖွင့်ဖို့ သန့်ရှင်းရေး တွေတော့ လုပ်နေတယ်။ တက္ကသိုလ်ထဲမှာ လက်နက်ကြီးတွေ၊ ဗုံးတွေကျလို့ လူတွေလည်း အများကြီး သေထားတော့လေ။ ကျောင်းဆောင်တွေ ပြန်ပြင်ထားတယ်ဆိုပေမယ့် အနည်းအကျဉ်းပဲ၊ အကုန်လုံးတော့ အဆင်သင့် မဖြစ်လောက်သေးဘူး” – ဟု လားရှိုးမြို့ခံ ပညာရေးဝန်ထမ်းတစ်ဦးက သျှမ်းသံတော်ဆင့်ကို ပြောသည်။

သျှမ်းပြည်မြောက်ပိုင်း စစ်ရေးပဋိပက္ခများကြောင့် လားရှိုးမြို့ရှိ တက္ကသိုလ်များသည် နှစ်နှစ်ကြာ ပိတ်ထားခဲ့ရပြီးနောက်၊ နိုဝင်ဘာ ၁၇ ရက်နေ့မှစ၍ ကျောင်းဝင်မှတ်ပုံတင်ခြင်းကို လားရှိုးတက္ကသိုလ်၌ ပြန်လည်လက်ခံ ဆောင်ရွက်ပေးနေကြောင်း တက္ကသိုလ်အသိုင်းအဝိုင်းက ဆိုသည်။

“တချို့ကျောင်းသားတွေလည်း အဆောင်မှာ ရောက်နေတာရှိတယ်။ တချို့လည်း မလာသေးဘူး။ ကျောင်းပြန်ဖွင့်မယ့်ရက်ကို ကျောင်းအဝင်ဝမှာ ဗီနိုင်းချိတ်ထားတယ်။ မူဆယ်၊ နမ့်ခမ်း ဘက်ကလည်း ကျောင်းလာတက်ကြမယ့်သူတွေ ရှိတယ်။ တချို့ သူငယ်ချင်းတွေလည်း စီးပွားရေးနောက်လိုက်ရင်း အလုပ်လုပ်ကြတော့ ကျောင်းပြန်မတက်တာ များပါတယ်” – ဟု လားရှိုးမြို့တွင် ရောက်ရှိနေသည့် လူငယ်တစ်ဦးက ပြောသည်။

လက်ရှိတွင် စစ်ကောင်စီတပ်နှင့် ကိုးကန့်တပ်ဖွဲ့ (MNDAA) တို့အကြား စစ်ရေးမငြိမ်မသက် ဖြစ်နေစဉ်ကာလအတွင်း လားရှိုးမြို့တွင် တက္ကသိုလ် ပြန်လည်တက်ရောက်ရမည့် ကျောင်းသား/သူများမှာ လမ်းခရီးလုံခြုံရေး၊ နေထိုင်ရေးနှင့် စားသောက်ရေးအတွက် ကုန်ဈေးနှုန်း မြင့်မားမှုတို့ကိုလည်း စိုးရိမ်ပူပန်နေကြောင်း သိရသည်။

အလားတူ လားရှိုးမြို့သည် စစ်ကောင်စီလက်အောက်ခံ ရွေးကောက်ပွဲကော်မရှင် (UEC) က ကျင်းပမည့် ရွေးကောက်ပွဲ ပထမပိုင်းတွင် ပါဝင်နေခြင်းကြောင့် တက္ကသိုလ်တက်ရောက်မည့် ကျောင်းသား/သူများကို ကြိုတင်မဲပေးခိုင်းခြင်းများ ရှိလာမည်ကိုလည်း စိုးရိမ်နေကြသည်။

လတ်တလောတွင် အစိုးရနည်းပညာ အထက်တန်းကျောင်း (GTI) ကို စစ်ကောင်စီ ထိန်းချုပ်ထားသည့် လားရှိုးမြို့ပေါ်ရှိ အထက (၁) စာသင်ကျောင်းအနီး ပြောင်းရွှေ့ဖွင့်လှစ်ထားသော်လည်း ကျောင်းတက် ရောက်သူ အနည်းငယ်သာ ရှိကြောင်း သိရသည်။

သို့သော် လားရှိုးမြို့ပေါ်ရှိ ပညာရေးဒီဂရီကောလိပ်၊ သူနာပြုနှင့် သားဖွားသင်တန်းကျောင်းတို့အပြင် ကိုးကန့်တပ်ဖွဲ့ (MNDAA) ထိန်းချုပ်ထားသည့် လားရှိုးမြို့ အပြင်ဘက် ဟိုပိတ်ကျေးရွာရှိ လားရှိုးနည်း ပညာတက္ကသိုလ်နှင့် မယ်ဟန်ကျေးရွာရှိ လားရှိုးကွန်ပျူတာတက္ကသိုလ်များမှာ ပြန်လည်ဖွင့် လှစ်နိုင်ခြင်း မရှိသေးကြောင်း သိရသည်။

သျှမ်းပြည်မြောက်ပိုင်းတွင် ညီနောင်မဟာမိတ်တပ်များနှင့် စစ်ကောင်စီတပ်အကြား ဖြစ်ပွားခဲ့သည့် “၁၀၂၇ စစ်ဆင်ရေး”အတွင်း လုံခြုံရေး စိုးရိမ်မှုကြောင့် လားရှိုးမြို့ရှိ တက္ကသိုလ်များတွင် နေ့သင်တန်း တက်ရောက်နေသော ကျောင်းသား/သူများကို အခြားမြို့များနှင့် ပြည်မရှိ တက္ကသိုလ်များသို့ ပြောင်းရွှေ့တက်ရောက်ရန် ၂၀၂၃ နှစ်ကုန်ပိုင်းတွင် ညွှန်ကြားခဲ့သည်။

ထို့ကြောင့် လားရှိုးမြို့တွင် ဖွင့်လှစ်ထားသည့် လားရှိုးတက္ကသိုလ်၊ နည်းပညာတက္ကသိုလ်နှင့် ကွန်ပျူတာတက္ကသိုလ်များတွင် နေ့သင်တန်း တက်ရောက်နေသည့် ကျောင်းသား/သူများမှာ သျှမ်းပြည်အတွင်းရှိ တောင်ကြီးနှင့် ပင်လုံတက္ကသိုလ်ဘက်အပြင် မန္တလေး၊ ရန်ကုန် စသည့် မြို့ကြီးများဘက်သို့ပါ ကျောင်းပြောင်းရွှေ့ တက်ရောက်ခဲ့ရသည်။

ယမန်နှစ် ၂၀၂၄ ဇူလိုင်လတွင် ကိုးကန့်တပ်ဖွဲ့ (MNDAA) နှင့် မဟာမိတ်တပ်များ၏ လားရှိုးမြို့သိမ်းတိုက်ပွဲ အတွင်း အရှေ့မြောက် တိုင်းစစ်ဌာနချုပ် (ရမခ) အနီးရှိ လားရှိုးတက္ကသိုလ်ဝင်းထဲ လက်နက်ကြီးနှင့် ရှော့တိုက်ဒုံးများ ကျရောက်ပေါက်ကွဲမှုကြောင့် ဆောက်လုပ်ပြီးစ ဘွဲ့နှင်းသဘင်ခန်းမဆောင် အပါအဝင် စာသင်ဆောင် အများအပြား ထိခိုက်ပျက်စီးခဲ့ရသည်။