သျှမ်းပြည်အရှေ့ပိုင်း တာချီလိတ်မြို့တွင် မိုးအဆက်မပြတ် ရွာသွန်းမှုကြောင့် မယ်ဆိုင်ချောင်းရေ မြင့် တက်လာပြီး မြို့ပေါ်ရပ်ကွက်အချို့တွင် ရေဝင်နေသည့်အပြင် လျှပ်စစ်မီးနှင့် အင်တာနက်လည်း မှန်မှန်မရ ကြောင်း ဒေသခံများ ပြောပြချက်အရ သိရသည်။

ယနေ့ (၂၀၂၅ နိုဝင်ဘာ ၁၉ ရက်) နံနက်ပိုင်းတွင် တာချီလိတ်မြို့ရှိ တာလော့ရပ်ကွက်နှင့် အနီးတစ်ဝိုက်ရှိ ရပ်ကွက်အချို့၌ မယ်ဆိုင်ချောင်းရေ မြင့်တက်မှုကြောင့် ရေထပ်ဝင်နေကြောင်း တာချီလိတ်မြို့ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

“မီးတွေကလည်း ပြတ်နေတာ၊ လိုင်းတွေလည်း သိပ်မကောင်းဘူး။ မနေ့ကလည်း မိုးတွေဆက်တိုက်ရွာတယ်။ မနက်ကတော့ တာလော့ရပ်ကွက်တွေဘက်က စပြီး ရေတက်နေတာ။ တချို့ရပ်ကွက်က လမ်းကြားတွေမှာလည်း ရေတွေတက်နေတယ်” – ဟု ၎င်းဒေသခံအမျိုးသားက ပြောသည်။

ယမန်နေ့ (နိုဝင်ဘာလ ၁၈ ရက်) နေ့လယ် ၂ နာရီဝန်းကျင်တွင် တာချီလိတ်မြို့နယ်၊ မိုင်းဖုန်းကျေးရွာအုပ်စု၊ ဟိုခိုရွာအနီး သွယ်တန်းထားသည့် လျှပ်စစ်ဓာတ်တိုင်ကို ယာဉ်မတော်တဆ ဝင်တိုက်မိခြင်းကြောင့် ဓာတ်အားပြတ်တောက်မှု ဖြစ်ပွားခဲ့သည်။ ထို့ကြောင့် တာချီလိတ်မြို့နှင့် အနီးအနားရှိ ကျေးရွာများတွင် လျှပ်စစ်မီး ပြတ်တောက်နေကြောင်း သိရသည်။

ပြီးခဲ့သည့် အောက်တိုဘာ ၁၆ ရက်တွင်လည်း တာချီလိတ်မြို့၌ မယ်ဆိုင်ချောင်း ရေမြင့်တက်မှုကြောင့် ရေကြီးရေလျှံမှုများ ကြုံတွေ့ခဲ့ရကြောင်း သိရသည်။

သျှမ်းပြည်တောင်ပိုင်း တောင်ကြီး၊ ကလော၊ အောင်ပန်း၊ ပင်လောင်း၊ ပေါင်းလောင်း၊ ဆီဆိုင်၊ လင်းခေး၊ မောက်မယ်၊ မိုးနဲ၊ နမ့်စန်၊ မိုင်းပန်၊ ကျိုင်းတောင်း၊ ကာလိ၊ ကွန်ဟိန်း တို့အပြင် သျှမ်းပြည်အရှေ့ပိုင်း မိုင်းတုံ၊ မိုင်းဆတ်၊ မိုင်းပျဉ်း၊ မိုင်းယောင်း၊ ကျိုင်းတုံ၊ ကျိုင်းလပ်၊ တာလေ၊ မိုင်းယု၊ တာချီလိတ် မြို့နယ်တို့တွင်လည်း မိုးများ ဆက်တိုက်ရွာနိုင်သေးကြောင်း မြန်မာ့မိုးလေဝသနှင့် ဇလဗေဒဦးစီးဌာန (မိုးဇလ) က ယမန်နေ့ (နိုဝင်ဘာ ၁၈ ရက်) တွင် ထုတ်ပြန်ထားသည်။