သျှမ်းပြည် ဖယ်ခုံ – ပင်လောင်းနယ်စပ်တကြောသို့ ရောက်ရှိနေသည့် စစ်ဘေးရှောင် ၅၀၀ ကျော် အတွက် ဆေးဝါး နှင့် အနွေးထည်များ အကူအညီလိုအပ်နေကြောင်း သတင်းရရှိသည်။

ပြီးခဲ့သည့် စက်တင်ဘာလ ဒုတိယပတ်တွင် ဖယ်ခုံမြို့နယ် အနောက်ဘက်ခြမ်း ဘောရန်ကျေးရွာ နှင့် အနီးတစ်ဝိုက်ရှိ ကျေးရွာများကို စစ်ကော်မရှင်တပ်နှင့် ပအိုဝ်းပြည်သူ့စစ် (PNO) ပူးပေါင်း စစ်ကြောင်း ထိုးမှုကြောင့် ကျေးရွာ (၁၀) ရွာမှ ဒေသခံ ၅၀၀၀ ဝန်းကျင် နီးစပ်ရာ ကျေးရွာ နှင့် တောတောင်အတွင်းသို့ ထွက်ပြေးတိမ်းရှောင် ခဲ့ရသည်။

ထိုထဲမှ ဖယ်ခုံ – ပင်လောင်း နယ်စပ်တကြောသို့ ရောက်ရှိလာသည့် စစ်ဘေးရှောင်လူဦးရေ ၅၀၀ ကျော်သည် ဆေးဝါး နှင့် အနွေးထည်များ အကူအညီ လိုအပ်နေကြောင်း စစ်ရေး သတင်းအရင်းမြစ် တစ်ဦးက သျှမ်းသံတော်ဆင့်ကို ပြောသည်။

“သူတို့ ရောက်နေတဲ့ နေရာက ခေါင်တဲ့နေရာဖြစ်နေတယ်။ သူတို့မှာရှိတဲ့ ဆေးဝါးတွေကလည်း နည်းတယ်။ ဆေးဝါးကတော့ အဓိကလိုအပ်နေတာ။အခု ဖျားတဲ့လူတွေကလည်း ရှိတယ်။ ဆောင်တွေ အနွေးထည်တွေကလည်း ပြေးလာကတည်းက မပါလာကြဘူး”ဟု စစ်ရေး သတင်းအရင်းမြစ် တစ်ဦးကပြောသည်။

လက်ရှိ နိုဝင်ဘာလ ဒုတိယပတ်အထိ ဘောရန်ကျေးရွာ အနီးတွင် စစ်ကောင်စီ ၊ လက်အောက်ခံ ပအိုဝ်းပြည်သူ့စစ် (PNO) နှင့် ကရင်နီတော်လှန်ရေးတပ်ပေါင်းစုတို့ စစ်ရေးတင်းမာမှုများရှိ နေကြောင်း ၎င်းက ဆက်ပြောသည်။

ပြီးခဲ့သည့် အောက်တိုဘာလ (၁၃) ရက်နေ့တွင် ဖယ်ခုံမြို့နယ် အနောက်ဖက်ခြမ်း ဘောရန်ကျေးရွာရှိ နေအိမ်များကို စစ်ကောင်စီတပ် နှင့် PNO တို့က မီးရှို့ ဖျက်ဆီးခဲ့သည်။