ထိုင်းနိုင်ငံ ဘန်ကောက်မြို့မြောက်ဘက်ရှိ Pathum Thani ခရိုင်မှ Talaad Thai ဈေးသို့ တင်ပို့မည့် မက်သာဖက်သမင်း ၄၆၉ ကီလိုဂရမ်ကို ချင်းမိုင်မြို့ရှိ ကတ်မိန်းမိုင်ဈေး (Muang Mai Market) တွင် ဖမ်းဆီးရမိကြောင်း ထိုင်းသတင်းဌာနတွင် ဖော်ပြသည်။

ယနေ့ (နိုဝင်ဘာလ ၁၁) ရက်တွင် မူးယစ်ဆေးဝါး နှိမ်နင်းရေးနှင့် ရဲအဖွဲ့များသည် မူးယစ်ဆေးဝါးရောင်းဝယ်မှု သံသယရှိသူတစ်ဦးကို ဖမ်းဆီးခဲ့ပြီး မက်သာဖက်တမင်း ၄၆၉ ကီလိုဂရမ်ကို ဖမ်းဆီးခဲ့ကြောင်း ချင်းမိုင်အခြေစိုက် သတင်းတစ်ခုဖြစ်သည့် Chiang Mai News သတင်းဌာနတွင် ရေးသားဖော်ပြသည်။

ယင်းဖမ်းဆီးမှုသည် ပြီးခဲ့သော နိုဝင်ဘာလ ၆ ရက်တွင် ချင်းမိုင်မြို့ ကတ်မိန်းမိုင်ဈေး (Muang Mai Market)ရှိ ကုန်စည်ပို့ဆောင်ရေး ဂိတ်တစ်ခုတွင် ဝင်ရောက်ဖမ်းဆီးရမိပြီးနောက် ထပ်မံဖော်ထုတ်နိုင်ခဲ့ခြင်း ဖြစ်ကြောင်း ဆိုသည်။

စုံစမ်းစစ်ဆေးမှုများအရ မစ္စတာဒါနိုင်း (Danai) နှင့် ၎င်း၏ အပေါင်းအပါများဖြစ်သည့် မစ္စတာဆမ် (Sam) နျင့် မစ္စတာချိုင် (Chai) တို့သည် ခြင်းတောင်း ၁၀၆ ခုအနက် ၆၂ ခုအတွင်း ဝှက်ထားသော မက်သာဖက်သမင်း ၄၆၉ ကီလိုဂရမ်ကို သယ်ယူနေစဉ် ဖမ်းဆီးရမိခဲ့ကြောင်း ဆိုသည်။

ယခုနှစ်အစောပိုင်းတွင်လည်း မယ်ဟောင်ဆောင်ခရိုင် Khun Yuam မြို့နယ်တွင် စိတ်ကြွမူးယစ်ဆေးဝါး ၆၀၀ ကီလိုဂရမ်ကို ဖမ်းဆီးရမိပြီး ဆက်လက်စုံစမ်းစစ်ဆေးမှုများအရ ချင်းမိုင်နှင့် မယ်ဟော်ဆောင် ခရိုင်တွင် လှုပ်ရှားနေသော “Kawin Cowboy Kaew” နှင့် “Kamnan Tui” တို့၏ ကွန်ရက်များဖြစ်ကြောင်း Chiang Mai News သတင်းဌာနတွင် ရေးသားဖော်ပြထားသည်။

၎င်းတို့သည် ချင်းမိုင်နှင့် မယ်ဟော်ဆောင် ခရိုင်တွင် စိုက်ပျိုးရေးထွက်ကုန်များကြား မူးယစ်ဆေးဝါးများ ဝှက်၍ လုပ်ကိုင်နေကြသူများ ဖြစ်ကြောင်းဆိုသည်။

ထိုင်းအာဏာပိုင်းများကလည်း မူးယစ်ဆေးဝါး ပို့ဆောင်ရန် စေခိုင်းသူကို ဖော်ထုတ်ပြီး ဥပဒေအရေ အရေးယူရန် ထပ်မံစုံစမ်းစစ်ဆေးမှုများ ပြုလုပ်သွားမည်ဟု ပြောဆိုထားသည်။

ထိုင်းနိုင်ငံအတွင်း ဖမ်းဆီးရမိသော မက်သာဖက်သမင်း အများစုကို တတိယနိုင်ငံသို့ တင်ပို့ပြီး ပြည်တွင်း၌ တစ်ကီလိုဂရမ်လျှင် ဘတ်ငါးသိန်း (၅၀၀,၀၀၀) ခန့် တန်ဖိုးရှိကြောင်း သိရသည်။ ထိုမူးယစ်ဆေးဝါးများကို အင်ဒိုနီးရှား၊ သြစတြေးလျ၊ နယူးဇီလန်၊ ဂျပန်၊ ထိုင်ဝမ်နှင့် ဟောင်ကောင်အပါအဝင် တတိယနိုင်ငံများသို့ ရောက်ရှိပါက ဈေးနှုန်း ၁၀ တိုးမြှင့်လာကြောင်း ဆိုသည်။