သျှမ်းပြည် မူဆယ်မြို့နယ် မုံးကိုးမြို့တွင် ရာဇဝတ် ကျူးလွန်သူ (၅)ဉီးကို ကိုးကန့်တပ်ဖွဲ့ MNDAA မှ အများပြည်သူရှေ့ သေဒဏ်အပါအဝင် ထောင်ဒဏ်ချမှတ်ခဲ့ကြောင်း စုံစမ်းသိရသည်။

ယနေ့ (နိုဝင်ဘာလ ၁၁ ရက်) နံနက်ပိုင်းတွင် မူဆယ်မြို့နယ် မုံးကိုးမြို့၌ ကိုးကန့်တပ်ဖွဲ့ MNDAA မှ “အထူးဒေသ(၁) ရာဇဝတ်မှုစီရင်ခြင်း အခမ်းအနား” အမည်ဖြင့် လူသတ်မှုနှင့် မုဒိမ်းမှု ကျူးလွန်ခဲ့သူ အမျိုးသား (၅) ဦးတို့ကို သေဒဏ် အပါအဝင် ထောင်ဒဏ်ချမှတ်ခဲ့ကြောင်း အဆိုပါ ကြားနာပွဲသို့ တက်ရောက်ခဲ့သူ ဒေသခံ အမျိုးသားတစ်ဦးက ပြောသည်။

“၃ ယောက်က သေဒဏ် ပေးခံရတယ်။ အဲ့ထဲမှာ သျှမ်းပါတယ်၊ ဗမာပါတယ်၊ တရုတ်ပါတယ်။ ကျန်တဲ့ ၂ ယောက်က ထောင်ဒဏ် ၁၄ နှစ်နဲ့ ၁၀ နှစ်စီ ချလိုက်တယ်။ လူသတ်မှု ကျူးလွန်တဲ့ ၃ ယောက်က သေဒဏ်ပေးခံရတာ၊ အလုပ်သမားကို ရိုက်တဲ့အမှုနဲ့ ကွတ်ခိုင်မှာ အလုပ်သမား အချင်းချင်း မုဒိမ်းမှု ကျူးလွန်တာက ထောင်ဒဏ်”ဟု မုံးကိုးဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

မုံးကိုးမြို့တွင် သေဒဏ်ချမှတ်ခံရသူ (၃) ဦးမှာ အလုပ်ရှင်နှင့် လောပန်းတစ်ဦးတို့ကို လူသတ်မှုကျူးလွန်ခဲ့ပြီး ပန်ဆိုင်းမြို့ဘက် ထွက်ပြေးတိမ်းရှောင်ခဲ့သူ တစ်ဦး၊ နမ့်စွမ်ကျေးရွာဘက်တွင် သေနတ်ပစ်ခတ်မှု ကျူးလွန်ခဲ့သူတစ်ဦးနှင့် ဆွေမျိုးများကို ဓားဖြင့် လူသတ်မှု ကျူးလွန်ခဲ့သူတစ်ဦး တို့ဖြစ်ကြောင်း MNDAA အရာရှိများမှ ဖတ်ကြားခဲ့သည်ဟု ကိုယ်တိုင်တက်ရောက် နားထောင်ခဲ့သူများထံမှ သိရသည်။

ထို့အတူ ဟိုပန်မြို့မှ လားရှိုးမြို့တွင် ဆေးလိပ်ဆိုင် လာဖွင့်ခဲ့သည့် အလုပ်ရှင်မှ အလုပ်သမားကို ရိုက်နှက်မှု၊ ကွတ်ခိုင်မြို့ အုတ်စက်ရုံတစ်ခုတွင် အလုပ်သမား အချင်းချင်းကြား ဖြစ်ပွားခဲ့သည့် မုဒိမ်းမှု တို့ကို ကျူးလွန်ခဲ့သူ နှစ်ဦးအား MNDAA မှ ထောင်ဒဏ် (၁၀) နှစ်အထက် ချမှတ်ခဲ့ကြောင်း မုံးကိုးဒေသခံများက ပြောသည်။

ပြီးခဲ့သည့် စက်တင်ဘာလ ၂၇ ရက်တွင်လည်း ကိုးကန့်တပ်ဖွဲ့ MNDAA ထိန်းချုပ်ထားသည့် သိန္နီမြို့နယ် ပန်လော့ဈေးတွင် ကိုးကန့်တပ်ဖွဲ့ MNDAA စစ်ရေးအုပ်ချုပ်မှုကော်မတီမှ ဖမ်းဆီးရမိထားသော လူသတ်မှု၊ လက်နက်ကိုင် လုယက်မှုနှင့် ပြန်ပေးဆွဲ ငွေညစ်မှု ကျူးလွန်သူ (၇) ဦးကို အများပြည်သူရှေ့ သေဒဏ်ချမှတ်ခဲ့ကြောင်း ဒေသခံများထံမှ သိရသည်။

အလားတူ ဧပြီလ ၁၀ ရက်နေ့တွင်လည်း လားရှိုးမြို့မှ တပ်မဆုတ်ခင် ကိုးကန့်တပ်ဖွဲ့ MNDAA မှ မုဒိမ်းမှုကျူးလွန်သူ တစ်ဦးကို တစ်သက်တစ်ကျွန်း ထောင်ဒဏ်နှင့် လူသတ်မှု၊ ခိုးမှု၊ လုယက်မှု ကျူးလွန်သူ (၇) ဦးကို သေဒဏ်များ အများပြည်သူရှေ့ စီရင်ချက် ချမှတ်ခဲ့သည်။

ထို့နောက်တွင် သေဒဏ်ချမှတ်ခံရသူ (၇) ဦးထဲမှ (၅) ဦးကို လားရှိုးလေယာဉ်ကွင်းဘက်သို့ MNDAA ခေါ်ဆောင်သွားပြီး အသင့်တူးဖော်ထားသည့် မြေကျင်းများရှေ့တွင် သေနတ်ပစ်ခတ်ကာ ချက်ချင်းကွပ်မျက်ခဲ့ကြောင်း ဒေသခံများက ပြောဆိုသည်။

ယမန်နှစ် ၂၀၂၄ ဧပြီလနှင့် ဒီဇင်ဘာလတို့တွင် ကိုးကန့်တပ်ဖွဲ့ MNDAA ထိန်းချုပ်ထားသည့် လောက်ကိုင်မြို့တွင် ပြန်ပေးဆွဲမှု၊ ငွေညှစ်မှု၊ မုဒိမ်းမှုနှင့် လူသတ်မှု စသည့် ရာဇဝတ်မှု ကျူးလွန်သူများကို သေဒဏ် အပါအဝင် တစ်သက်တစ်ကျွန်းထောင်ဒဏ်များ လူစုလူဝေးရှေ့မှောက် နှစ်ကြိမ်တိုင်တိုင် စီရင်ချက် ချမှတ်ခဲ့သည်။

ထိုသို့ သေဒဏ်ချမှတ်ခဲ့စဉ်က ဥရောပသမဂ္ဂ EU မှ အပြင်းထန်ဆုံး ရှုတ်ချပြီး သေဒဏ်ချမှတ်မှုကို ပြင်းပြင်းထန်ထန် ဆန့်ကျင်ကန့်ကွက်ကြောင်း မြန်မာနိုင်ငံဆိုင်ရာ ဥရောပသမဂ္ဂရုံးက ထုတ်ပြန်ခဲ့သည်။