စျေးကွက် ကောင်းလာနိုင်သည် ဆိုသည့် မျှော်လင့်ချက်ဖြင့် သျှမ်းပြည်တောင်ပိုင်း ပင်လောင်းမြို့နယ်မှ တောင်သူများသည် ခရမ်းချဉ်သီးစိုက်ပျိုးခဲ့သော်လည်း စျေးကွက် မရကာ လမ်းဘေးတွင် သွန်လိုက်ရသည့် အခြေအနေသို့ ထပ်မံရောက်ရှိနေရကြောင်း သတင်းရရှိသည်။

ပြီးခဲ့သည့် အောက်တိုဘာ ဒုတိယပတ်မှ စပြီး ခရမ်းချဉ်သီး စျေးနှုန်းသည် တပိဿလျှင် ၄၀၀ကျပ်နှင့် ၅၀၀ကျပ်ထိ ထိုးကျဆင်းလာခဲ့သည်။

ခရမ်းချဉ်သီးများသည် ကြာရှည်သိုလှောင်မရသည့် အမျိုးအစားဖြစ်သည်အပြင် ဝယ်ယူမည့်သူများလည်း မရှိသည့်အတွက် လမ်းဘေးတွင် စွန့်ပစ်လိုက်ရသည့်အဆင့်ဖြစ်သွားသည်။

“ခရမ်းချဉ်သီးက အကြာကြီးထားလို့မရဘူး။ ပြန်ရောင်းတဲ့သူတွေလည်း ကားခနဲ့ ဆို အမြတ်မရဘူး။ လမ်းဘေးမှာ သွားပစ်ထားတာ။ အိမ်တွက်ကလည်း တပိဿဝယ်ရင် တပတ်လောက်စားရတတော့ အများကြီးလည်း မဝယ်ဘူး” ဟု ပင်လောင်းဒေသခံ စိုက်ပျိုးရေးလုပ်ကိုင်သူ အမျိုးသားတစ်ဦးက ပြောသည်။

ပြီးခဲ့သည့် မေလတွင် ခရမ်းချဉ်သီး တစ်ပိဿလျှင့် ငွေကျပ် သုံးထောင်ကျော်အထိ စျေးရခဲ့သည်။

ထို့ကြောင့် ခရမ်းချဉ်သီး စျေးကွက် ကောင်းမည်ဆိုသည့် မျှော်လင့်ချက်ဖြင့် တောင်သူများသည် အကြွေးယူပြီး စိုက်ပျိုးခဲ့ကြောင်း၊ လက်ရှိအခြေအနေအရ စျေးမရသည့်အတွက် အရင်း ကျပ်ငွေသိန်း ၅၀ မရတော့ကြောင်း အသက် ၄၀ အရွယ်ရှိ ရပ်စောက်မြို့နယ်မှ အမျိုးသားတစ်ဉီးက သျှမ်းသံတော်ဆင့်ကိုပြောသည်။

“ ခရမ်းချဉ်သီးစျေးကောင်းရရင် ဒီနှစ်သားကို ရှင်ပြုပေးမလို့၊ အခုစျေးလည်းမရ အရင်းလည်း ရှုံးပြီ။ ဒီနှစ် ဘာလုပ်လုပ် မမြတ်ဘူး” ဟု ၎င်းက ဆိုသည်။

ဆက်လက်ပြီး စိုက်ပျိုးသီးနှံများတွင် အသုံးပြုသည့် ဓာတ်မြေသြဇာသည်လည်း တနှစ်ထက် တနှစ် စျေးနှုန်းတက်လာသည်။

“အချို့ အလုံးလှဖို့ ဓာတ်မြေသြဇာများများထည့်တဲ့သူဆိုရင်ပိုဆိုးတယ်။ အခု တောင်သူတွေက အရင်းရော အကြွေးပါလုံးပါးပါးကုန်ပြီ” ဟု ၎င်းက ထပ်လောင်းပြောသည်။

အလားတူ သျှမ်းပြည်တောင်ပိုင်းတွင် ကြက်သွန်ဖြူစျေးနှုန်းများလည်း ထိုးကျနေပြီး ကြက်သွန်ဖြူ အသေးစား တပိဿလျှင့် ၂၉၀၀ ကျပ် ရရှိခဲ့သော်လည်း လက်ရှိအချိန်တွင် တစ်ပိဿလျှင် ကျပ်ငွေ ၈၀၀ သာကျန်ရှိကြောင်း အောင်ပန်း ကုန်စည်ရောင်းဝယ်ရေးဌာနတွင် စုံစမ်းသိရသည်။

ပြီးခဲ့သည့်နှစ် ၂၀၂၄ခုနစ် သြဂုတ် ပထမတွင်လည်း ပင်လောင်းမြို့၊ ရပ်စောက်မြို့နှင့် ဟဲဟိုးဘက်တွင် ခရမ်းချဉ်သီးစိုက်ပျိုးသူများသည် တပိဿလျှင် ငွေကျပ် ၂၀၀မှ ငွေကျပ် ၃၀၀ ထိသာရရှိခဲ့ပြီး လမ်ဘေး စွန့်ပစ်ခဲ့ရသည်။