သျှမ်းပြည်တောင်ပိုင်း၊ ပင်လောင်းမြို့နယ်၊ အောင်ပန်း၊ကလော ၊ပင်းတယ၊ရွာငံဘက်မှ ခရမ်းချဉ်သီးတစ်ပိဿ ကျပ် (၂၀၀)အထိ ဈေးကျကာ လမ်းဘေးလွှင့်ပစ်နေရသည့် အဆင့်ရောက်နေကြောင်း သတင်းရရှိသည်။

ပြီးခဲ့သည့် ဇွန်လ ပထမ ပတ်မှစပြီး ခရမ်းချဉ်သီး တစ်ပိဿလျှင် ငွေကျပ် (၂၀၀)အထိ ကျဆင်းခဲ့ပြီး ဈေးများ မငြိမ်သည့်အပြင် ဝယ်သူလည်း မရှိသဖြင့် ခရမ်းချဉ်ပွဲစားနှင့် တောင်သူများက လမ်းဘေး စွန့်ပစ်နေရကြောင်း ခရမ်းချဉ်သီး ရောင်းဝယ်သူများကပြောသည်။

ခရမ်းချဉ်သီးဈေးမတည်ငြိမ်မှုကြောင့် ခရမ်းချဉ်သီး ဝယ်၍သိုလှောင်ထားသည့် ပွဲစားများသည် အရှုံးပေါ်နေပြီး ခရမ်းချဉ်စိုက်တောင်သူ များမှာလည်း အရှုံးပေါ်နေကြောင်း ခရမ်းချဉ်သီး ရောင်းဝယ်သူ အမျိုးသားတစ်ဉီးက သျှမ်းသံတော်ဆင့်ကိုပြောသည်။​

“ဝယ်ပြီး လှောင်တုန်းက တစ်ပိဿ တစ်ထောင်နဲ့ ပြန်ရောင်းတော့ ကျပ် (၂၀၀)တဲ့ မကျန်တော့ဘူး ဘာမှ မကျန်ဘူး၊ ခရမ်းချဉ်သီးက ပုတ်ကုန်တော့ သွန်ပစ်ရတယ်၊ကုန်စိမ်းဆိုတော့ အကြာမခံဘူးလေ၊ အခုတော့ တစ်ပိဿ ကျပ်(၅၀၀) တက်လာပြီ ဒါပေမဲ့ မငြိမ်ဘူး ပြန်ကျတယ်။”ဟု ၎င်းအမျိုးသားကပြောသည်.

လက်ရှိ သျှမ်းတောင်တွင် ခရမ်းချဉ်သီး ဈေးနှုန်းသည် ကျပ်(၂၀၀)အထိကျဆင်းနေပြီး အမြင့်ဆုံးဈေးနှုန်းသည် ကျပ်(၅၀၀)အထိသာ ရရှိသောကြောင့် တောင်သူများအရင်းနှီး ပြန်မရဘဲ အရှုံးပေါ်နေကြသည်။

ခရမ်းချဉ်သီး စိုက်ပျိုးလျှင် အရင်းနှီးများပြီး လူအင်အားပါ များစွာအသုံးပြုရသောကြောင့် ယခုလက်ရှိ ပေါက်ဈေးဖြင့် တွက်ခြေမကိုက်ကြောင်းနှင့် ရင်းနှီးထားသော မြေဩဇာ၊ အပင်ဆေးဖြန်းဖိုး၊ နေ့စားခ စသည့် ကုန်ကျစရိတ်များ သည် ပြန်မကာမိကြောင်း ခရမ်းချဉ်စိုက် တောင်သူတစ်ဦးလည်း သျှမ်းသံတော်ဆင့်ကို ပြောသည်။

“ခရမ်းချဉ်ခင်းထဲကို သိန်း (၈၀)ဖိုးလောက် ရင်းထားတာ၊ သိန်း(၃၀)တောင် ပြန်မရဘူး၊ တစ်ပိဿမှ နှစ်ရာတဲ့ ဒါတောင်ဝယ်သမားမရှိဘူး၊ ခရမ်းချဉ်သီးက အကြာထားမခံတော့ အမှိုက်ပုံထဲ အကုန်သွားသွန် ပစ်ရတယ်၊ ဒီနှစ်တောင်သူတွေ အရမ်းရှုံးတယ်။”ဟု ခရမ်းချဉ်စိုက် တောင်သူတစ်ဦးက ပြောသည်။

ထို့အပြင် ခရမ်းချဉ်သီးဈေးကျဆင်းရခြင်းသည် လမ်းပန်းဆက်သွယ်ရေး အခက်အခဲ နှင့် လမ်းတလျောက်ရှိ စစ်ဆေးရေးဂိတ်တွင် ငွေအမြောက်အမြားပေးရခြင်းနှင့် ခရမ်းချဉ်သီးထွက်နှုန်းများခြင်းကြောင့် ဈေးကျဆင်းခြင်းဖြစ်ကြောင်း ၎င်းတောင်သူကဆိုသည်။

ပြီးခဲ့သည့် ၂၀၂၄ – ၂၀၂၅ ခုနှစ်တွင် ခရမ်းချဉ်သီး တစ်ပိဿလျှင် ၁၅၀၀ ကျပ် မှ ၂၀၀၀ ဝန်းကျင် အထိ ဈေးရခဲ့သည်။

အလားတူ သျှမ်းပြည်တောင်ပိုင်းတွင် စိုက်ပျိုးသည့် ဂေါ်ဖီထုပ်၊ ပန်းဂေါ်ဖီနှင့် အာလူး စသည့် ရာသီပေါ် သီးနှံများလည်း တောင်သူများ နှစ်စဉ် အရှုံးခံကာ ရောင်းချနေရပြီး အချို့တောင်သူများသည် ကုန်စည်ပို့ဆောင်ခ ကုန်ကျမည်ကို စိုးရိမ်သဖြင့် လွှင့်ပစ်လိုက်ရသည့်အဆင့် ရောက်ရှိခဲ့ကြောင်း သိရသည်။