သျှမ်းပြည်နယ်တောင်ပိုင်း ၊ ပင်းလောင်းမြို့နယ် နောင်တရားဒေသဘက်တွင် ခရမ်းချဉ်ဈေးကွက်မရှိသဖြင့် အမှည့်လွန်ခရမ်းချဉ်သီးများကို လမ်းမပေါ်တွင် စွန့်ပစ်ထားရကြောင်း သတင်းရရှိသည်။

ပြီးခဲ့သည့် ဩဂုတ်လနောက်ဆုံးပတ်မှ စပြီး ခရမ်းချဉ်ဈေးနူန်းကျဆင်းလာကာ ခရမ်းချဉ်သီးတစ်ပိဿလျှင် (ကျပ်ငွေ ၂၀၀ မှ ၃၀၀ )အတွင်းသာ ရရှိသောကြောင့် ခရမ်းစိုက်ပျိုးသူများအရှုံးဖြင့် ရင်ဆိုင်နေရပြီး ရောင်းရန်မမီတော့သည့် ခရမ်းချဉ်သီးများကို လမ်းဘေးတွင်စွန့်ပစ်ထားရကြောင်းသိရသည်။

“ ဈေမရှိတာကတစ်ကြောင်း အပင်တွေ ရောဂါကျနေတာက တကြောင်း အသီးတွေ ဝါပြီး ပုတ်ကုန်တာကတစ်ကြောင်းနဲ့ ဆိုတော့ ခရမ်းချဉ်သီးတွေ သွန်ပစ်ကုန်တယ်။ မြေဩဇာဈေးတွေကလည်း နှစ်ဆလောက်တက်သွားတော့ ဝယ်မသုံးနိုင်တော့ဘူး။ ဒီတိုင်း ခရမ်းချဉ်တစ်ခင်းလုံးပစ်ထားလိုက်ရတယ်။”ဟု နောင်တရားဒေသခံတစ်ဦးက သျှမ်းသံတော်ဆင့်ကိုပြောသည်။

ထိုကဲ့သို့ ခရမ်းချဉ်ဈေးနူန်းကျဆင်းမှုသည် ဒေါ်လာဈေးနူန်းမြင့်တက်တာကြောင့် မြေဩဇာဈေးနူန်းများလည်း နှစ်ဆလောက်တက်သွားကာ ဝယ်မသုံးနိုင်တာကြောင့် ခရမ်းချဉ်ခင်းများကို စွန့်ပစ်ထားရပြီး အသီးများများကိုပါ စွန့်ပစ်နေရကြောင်း ၎င်းအမျိုးသားက ဆက်ပြောသည်။

အကြွေးစနစ်ဖြင့် ပိုက်ဆံချေးငှား၍ စိုက်ပျိုုးရေးလုပ်ကိုင်လို့ရသော်လည်း အကြွေးပေးသည့်သူများမှာ ရင်းနှီးသည့် သူများကိုသာ ချေးငှားပေးတာကြောင့် စိုက်ပျိုးရေးတောင်သူများ ငွေကြေးဆိုင်ရာ အခက်ခဲနှင့်ရင်ဆိုင်နေရသည်။

“ ကုန်စိမ်းက မြတ်ရင်လည်း အများကြီးမြတ်တယ်။ ရှုံးရင်လည်းအများကြီးရှုံးတယ်။ အစောပိုင်းခရမ်းချဉ်ရောင်းတဲ့သူဆို့ ဈေးကောင်းရတယ်။ ခုရက်ပိုင်းရောင်းတဲ့သူကတော့ ရှုံးတာပေါ့လေ။ နောင်တရားအရှေ့ဘက်မှာ‌တော့ ဆေးတွေမဖြန်းနိုင်ကျလို့ တစ်ခင်းလုံး ပစ်ထားလိုက်ရတယ်။ အရင်းပြန်မရတော့ ဘယ်လိုပြန်စိုက်ရမလဲ တောင်မသိတော့ဘူး”ဟု ခရမ်းချဉ်စိုက်ပျိုးသည့် တောင်သူတစ်ဦး ပြောသည်။

ခရမ်းချဉ်သီးများမှာ ကုန်စိမ်းဖြစ်၍ အချိန်ကြာမြင့်စွာ သိုလှောင်လို့မရတာကြောင့် တောင်သူများ ရသည့်ဈေးနှင့်သာ အမြန်ရောင်းထုတ်နေရပြီး ယခုရက်ပိုင်းအတွင် ခရမ်းချဉ်ဈေးနှုန်း (ကျပ်ငွေ ၅၀၀ မှ ၆၀၀ )အထိ ပြန်လည် တက်လာကြောင်းသိရသည်။

အင်းလေးဒေသဘက်တွင် ခရမ်းချဉ်သီးစိမ်းတစ်ပိဿလျှင် ကျပ်ငွေ ၈၀၀ နှင့် အမှည့်လျှင်ကျပ်ငွေ ၉၀၀ အထိ ရှိလာကြောင်းသိရသည်။

အလုပ်သင် သတင်းထောက် နန်းလရောင် ရေးသားသည်။