သျှမ်းပြည်တောင်ပိုင်း ပင်လောင်းမြို့နှင့် အင်းလေးဒေသတွင် ခရမ်းချဉ်သီးဈေးကျ သဖြင့် စိုက်ပျိုးသူများ အရှုံးပေါ်နေသည်ဟု စုံစမ်းသိရသည်။

ဇူလိုင်လတုန်းက ခရမ်းချဉ်သီး ၁ပိဿာ (၂၀၀၀)ကျပ်နှင့် (၂၅၀၀) ကျပ်သာရှိပြီး ယခု (ဩဂုတ်လ)တွင် တစ်ပိဿာဈေးနှုန်း (၃၀၀) ကျပ်ဈေးဖြင့် ရောင်းချနေရကြောင်း အရှုံးများစွာပေါ်နေသည်ဟု ပင်လောင်းဒေသခံ ခရမ်းချဉ်သီးစိုက်ပျိုးသူ အမျိုးသားတစ်ဦးက သျှမ်းသံတော်ဆင့်ကိုပြောသည်။

ပင်လောင်းစစ်ရှောင်ပြည်သူများအတွက်ပါ သွားရောက်လှူဒါန်းပေးခြင်းရှိလည်းရှိသည်။

‘’ အရင်လလောက်မှ တစ်ပိဿာ (၂၀၀၀)ကျပ် နဲ့ (၂၅၀၀) ကျပ်တောင်ရောင်းရတယ်။ ဒီလ တစ်ပိဿာဈေး (၃၀၀) ကျပ်ပေးပြီးရောင်းရတယ် အရမ်းရှုံးတယ်။ အဲလောက်မှမပေးရင် ဝယ်နေကြဒိုင်တွေက မဝယ်တော့ဘဲ တစ်ခြားနေရာကို သွားဝယ်တယ် ‘’ ဟု ၎င်းကပြောသည်။

အင်းလေးဒေသတွင် ခရမ်းချဉ်သီးအများဆုံး စိုက်သည့် ကေလာကျေးရွာနှင့် ကျေးစားကျေးရွာတို့သည် ခရမ်းချဉ်သီး တစ်ပြိုင်တည်း စိုက်ကြပြီး တစ်ချိန်တည်းထွက်ကြရာ အထွက်များပြီး ဝယ်ယူသူနည်းသည့်အတွက် ဈေးနှုန်းကျဆင်းဖြစ်ကြောင်း အင်းလေးဒေသ ခရမ်းချဉ်သီး စိုက်ပျိုးသူ အမျိုးသမီးတစ်ဦးက ပြောသည်။

‘’ အင်းလေးဒေသထဲဆို အထွက်များပြီး ဝယ်လိုအားလည်းသိပ်မရှိဘူး။ စိုက်ပျိုးဖို့ ဓာတ်မြေဩဇာပါသုံးရတော့ အမြတ်မကျန် အရင်းတောင်ပြန်မရဘူး။ ဒီလဆို ၄၀၀ ကျပ်နဲ့ ၅၀၀ ကျပ်ဈေးနဲ့ရောင်းနေရတာပေါ့ ‘’ ဟု ၎င်းကပြောသည်။

ယခုကဲ့သို့ကုန်ဈေးနူန်းတက်လာခြင်းသည် စက်သုံးဆီများပြတ်လပ်ခြင်းကြောင့် သယ်ယူပို့ဆောင်ရေးအတွက်ပါ ခက်ခဲနေကြောင်း သျှမ်းပြည်လူထုက ပြောသည်။

ငွေဈေးမတည်ငြိမ်မှုများကြောင့် ဘတ်ငွေသာလျှင် ကိုင်ဆောင်ထားကြပြီး စက်သုံးဆီများလည်း ပြတ်လပ်နေတာကြောင့် ကုန်ပစ္စည်းများ ပြတ်လပ်သွားမည်ကို စိုးရိမ်နေကြောင်း အဆိုပါ ဒေသခံတစ်ဦးကထပ်လောင်းပြောသည်။

အလုပ်သင် သတင်းထောက် နန်းဆိုင်ခမ်း ရေးသားသည်။