သျှမ်းပြည်တောင်ပိုင်း၊ ရွာငံမြို့နယ်မှ စစ်ဘေးရှောင်များ အရေပြားရောဂါဖြစ်ပွားပြီး ဆေးဝါးအကူညီများစွာ လိုအပ်နေကြောင်း သတင်းရရှိသည်။

ပြီးခဲ့သည့် စက်တင်ဘာလ ၁၃ ရက်တွင် စစ်ကော်မရှင်တပ်သည် ရွာငံမြို့နယ် ရနဲကျေးရွာ အုပ်စုအတွင်း စစ်ကြောင်းထိုးဝင်ရောက်ပြီး အရပ်သားနေအိမ် ၂၃ လုံးနှင့် စပါးကျီတို့ကို မီးရှို့ဖျက်ဆီးခဲ့ကြောင်း ဓနုပြည်နယ်အမျိုးသားလွတ်မြောက်ရေး တပ် DSNDA က စက်တင်ဘာလ ၂၆ ရက်စွဲဖြင့် ထုတ်ပြန်ထားသည်။

အဆိုပါ ရနဲကျေးရွာအုပ်စုမှ ကျောက်တောကျေးရွာကို စစ်ကော်မရှင်က စပါးကျီအပါဝင် နေအိမ်များကို မီးရှို့ဖျက်ဆီးခဲ့ခြင်းကြောင့် ဒေသခံ ၈၀၀ နီးပါး နီးစပ်ရာ တောတောင်ထဲသို့ စစ်ဘေးတိမ်းရှောင်ခဲ့ကြရသည်။

စစ်ဘေးတိမ်းရှောင်နေစဉ်အတွင်း မိုးအဆက်မပြတ်ရွာသွန်းခြင်းကြောင့် နေထိုင်စရာမရှိခြင်း၊ စားနပ်ရိက္ခာမလုံလောက်သည့်အပြင် ကလေးသူငယ်နှင့် သက်ကြီးရွယ်အိုများ ယားနာဖြစ်ပွားနေကြောင်း သိရသည်။

“စစ်ရှောင်ရတာဆိုတော့ တစ်နေရာတည်းမှာ မဟုတ်ဘူး။ ဟိုပြေးလိုက်ဒီပြေးလိုက်နဲ့ နေနေရတာ။ မိုးကလည်းရွာတာရယ် နေရတာ အဆင်မပြေတာနဲ့ဆို ယားနာတွေဖြစ်နေကြတာ။ဆေးက မရှိဘူး ဒီနားက လူကြီးတွေပြောတဲ့ သစ်ဥတွေလိုက်ရှာပြီး ကုနေကြတာ။စားဖို့မရှိလို့ ဆန်တစ်ဗူးကို လူငါးယောက်စာ ပြုတ်သောက်နေရတယ်။”ဟု DSNDAမှ သတင်းနှင့် ပြန်ကြားရေး တာဝန်ခံတစ်ဦး က ပြောသည်။

လက်ရှိ စစ်ရှောင်များသည် အရေပြားရောဂါဖြစ်ပွားနေရပြီး အနာနှင့်ဆေးမတည့်မှုကြောင့် ပိုဆိုးလာကာ တစ်ဦးနှင့်တစ်ဦး ကူးစက်မှုများရှိလာသည်။

ထိုအရေပြားရောဂါသည် အသက် ၂ နှစ်ကလေးမှစ၍ သက်ကြီးရွယ်အိုများအထိ ကူးစက် ဖြစ်ပွားနေသည်။

ဆက်လက်ပြီး ရွာငံမြို့ပေါ်နှင့် ၆ မိုင်ခန့်သာ ကွာဝေးသည့်‌ ကျေးရွာများတွင် စစ်ကော်မရှင်တပ်က အင်အားအလုံးရင်းဖြင့် စစ်ကြောင်းထိုးနေသောကြောင့် ခြံတွင် သီးနှံများ ရိတ်သိမ်းရန်အတွက် တစ်အိမ်လျှင် လူတစ်ဦးသာ သွားရောက်ရိတ်သိမ်းရကြောင်း ဒေသခံများက ပြောသည်။

“ ခြံမှာ ပဲသီးတို့ ကွမ်းသီးတို့ သွားခူးမယ်ဆိုရင် တစ်အိမ် တစ်ယောက်ပဲ သွားရတယ်။ သွားမယ်ဆိုရင်လည်း စာတင်ရတယ်။ ထောက်ခံစာယူသွားရတယ်။ ကွမ်းသီးခြံနားက စစ်တပ်က စစ်ကြောင်းထိုးနေတာ ကိုယ်သွားတာနဲ့ဆို အဖမ်းခံရမှာလည်း ကြောက်တယ်။”ဟု ရွာငံ ဒေသခံ အမျိုးသမီးတစ်ဦးက ပြောသည်။

ထို့အပြင် သဖန်းပင်ကျေးရွာ၊ ပါယ်ကင်းကျေးရွာ နှင့် လင်းဝေးကျေးရွာ တို့တွင်လည်း စစ်ကော်မရှင်မှ နေ့စဉ်နီးပါး စစ်ကြောင်းထိုး ဝင်ရောက်နေသောကြောင့် ဒေသခံများ အသွားအလာ သတိထားနေရကြောင်း ၎င်းက ဆက်ပြောသည်။

“စစ်ကြောင်းတစ်ခါလာရင် ကား ၅ စီးကျော်တယ်။ သူတို့လာရင် ဘယ်နား သွားနေရမှန်းကို မသိဘူး။ ကြောက်လွန်းလို့ PDF တွေကိုလည်း ကြောက်ရတယ်။ ခေတ်ကာလ မကောင်းတော့ လှုပ်တောင်မလှုပ်ရဲဘူး။”ဟု အသက် ၃၀ ကျော်အရွယ် အမျိုးသမီးတစ်ဦးက ပြောသည်။

ရွာငံမြို့နယ်အတွင်း စစ်ကော်မရှင်နှင့် PNO တပ်တို့စစ်ကြောင်းထိုးလာတိုင်း အမျိုးသား သာမက အမျိုးသမီးများကိုပါ ဖမ်ဆီးခြင်း၊ ရိုက်နှက်ခြင်းနှင့် အမျိုးသားများကို လူသားဒိုင်းအဖြစ် အချိန်မရွေးခေါ်ဆောင် ခြင်းတို့ ပြုလုပ်နေသည်။

ပြီးခဲ့သည့် စက်တင်ဘာလ ၁၄ ရက်တွင် စစ်ကော်မရှင်တပ်သည် ရွာငံမြို့နယ် အလယ်ချောင်ကျေးရွာကို စစ်ကြောင်းထိုးလာပြီး အမျိုးသမီးနှစ်ဉီးနှင့် အမျိုးသား (၈)ဉီးတို့ကို ဖမ်းဆီးခဲ့ပြီး၊ စက်တင်ဘာ ၂၁ ရက်တွင်လည်း တပင်ပျော်ကျေးရွာအုပ်စုထဲသို့ ထပ်မံစစ်ကြောင်းထိုးကာ ဒေသခံ(၁၀)ဦးကို ဖမ်းဆီးခဲ့သည်။

လာမည့် ဒီဇင်ဘာလတွင် စစ်ကော်မရှင် ပြုလုပ်ကျင်းပမည့် ရွေးကောက်ပွဲအပိုင်း ၁ ထဲတွင် ရွာငံမြို့နယ် မပါဝင်သော်လည်း စစ်ကော်မရှင်တပ်က နယ်မြေရှင်းလင်းရေး နေ့စဉ်နီးပါး ပြုလုပ်နေကြောင်း ဒေသခံများထံမှ သိရသည်။