သျှမ်းပြည် – မန္တလေးနယ်စပ် မိုးကုတ်မြို့ကို စစ်ကော်မရှင်တပ်က လေကြောင်းဖြင့် ဗုံးကြဲတိုက်ခိုက် သွားခဲ့ကြောင်း စုံစမ်းသိရသည်။
ယနေ့ (အောက်တိုဘာ ၂၁ ရက်) နေ့လည် ၃ နာရီဝန်းကျင်တွင် တအာင်း(ပလောင်) အမျိုးသား လွတ်မြောက်ရေးတပ်မတော် TNLA ထိန်းချုပ်ထားသည့် မိုးကုတ်မြို့အရှေ့ပိုင်း ဘုရားငါးဆူ အနီးတဝိုက်ကို စစ်ကော်မရှင်တပ်က လေကြောင်းဖြင့် ဗုံးနှစ်လုံးကြဲ သွားခဲ့ကြောင်း မိုးကုတ်မြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“တော်တော်လေးလန့်သွားတယ်ဗျာ။အသံကတော့ တော်တော်လေးနီးတယ်။လေယာဉ်ကို သေချာတောင် မြင်လိုက်ရတယ်။နှစ်ခေါက်လောက်ကို ပတ်ပြီးတော့ ကြဲချသွားတာ။ ထိခိုက်တာ တွေတော့ သေချာ မသိရသေးဘူး မထိစေနဲ့လို့ပဲ ဆုတောင်းနေရတာ”ဟု မိုးကုတ်မြို့ဒေသခံ အမျိုးသားတစ်ဦးက ပြောသည်။
မိုးကုတ်မြို့ကို စစ်ကော်မရှင်တပ်မှ လေးကြောင်းတိုက်ခိုက်မှုတွင် လူထိခိုက်ဒဏ်ရာရရှိမှုကို သျှမ်းသံတော်ဆင့်မှ ဆက်လက်စုံစမ်းနေသည်။
ပြီးခဲ့သည့် ( အောက်တိုဘာလ ၁၆ ရက်) TNLA ထိန်းချုပ်ထားသည့် မိုးကုတ်မြို့အရှေ့ပိုင်း အထက်ညောင်ကုန်းရွာကို စစ်ကော်မရှင်တပ်က လေကြောင်းဖြင့် ပေါင် (၂၅၀) ဗုံးနှစ်လုံး ထပ်မံကြဲချ တိုက်ခိုက်ခဲ့ရာ ကြက်ခြံနှင့်နေအိမ်များ ထိခိုက်ပျက်စီးခဲ့ကြောင်း သိရသည်။
စစ်ကော်မရှင်တပ်သည် TNLA ထိန်းချုပ်ထားသည့် မိုင်းလုံ၊ မိုင်းငေါ့၊ နမ္မတူ၊ နမ့်ဆန်နှင့် မန်တုံမြို့နယ်များပါ လေကြောင်းဗုံးကြဲ တိုက်ခိုက်နေခြင်းကြောင့် တရုတ်-မြန်မာ နယ်စပ်အနီးရှိ နမ့်ခမ်းမြို့ဘက်လည်း လေကြောင်းအန္တရာယ် သတိထားနေရကြောင်း ဒေသခံများက ပြောသည်။
Leave a Comments