သျှမ်းပြည် ကျောက်မဲမြို့နယ်ရှိ မိုင်းငေါ့မြို့ကို စစ်ကော်မရှင်တပ်က လေကြောင်းဖြင့် ထပ်မံဗုံးကြဲ တိုက်ခိုက်ခဲ့ရာ သားအမိနှစ်ဦး သေဆုံးပြီး ဖခင်ဖြစ်သူ ဒဏ်ရာပြင်းထန်ကြောင်း စုံစမ်းသိရသည်။
ယမန်နေ့ (အောက်တိုဘာလ ၂၀ ရက်) ည ၈ နာရီကျော်တွင် ကျောက်မဲမြို့နယ်ရှိ တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် မိုင်းငေါ့မြို့ကို စစ်ကော်မရှင်တပ်က လေကြောင်းဗုံးကြဲ တိုက်ခိုက်ခဲ့ရာ ဈေးရပ်ကွက်အတွင်း ကျရောက်ပေါက်ကွဲခဲ့ပြီး နေအိမ်မီးလောင်သည့်အထဲ သားအမိ (၂) ဦး သေဆုံးသွားခဲ့ကြောင်း မိုင်းငေါ့ဒေသခံများက ပြောသည်။
“ဈေးတော့ မလောင်ဘူး၊ မနေ့ညက ဗုံးကျလို့ အိမ် ၂ လုံး မီးလောင်တယ်။ ဒီမနက် ၄ နာရီလောက်မှာ ဂတ်စ်အိုးပေါက်လို့ အိမ်တန်း ၄ လုံး ထပ်လောင်တယ်။ မီးထဲ ဆုံးသွားတာက သားအမိပါ၊ အမေဖြစ်သူရဲ့ အလောင်းကိုတော့ ရှာမရသေးဘူး”ဟု မိုင်းငေါ့ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
စစ်ကော်မရှင်တပ်၏ လေကြောင်းဗုံးကြဲခံရမှုကြောင့် မီးလောင်သေဆုံးခဲ့သည့် သားအမိ နှစ်ဦးမှာ မိခင်ဖြစ်သူ အသက် ၅၂ နှစ်အရွယ် ဒေါ်လင်းလင်းနှင့် သားဖြစ်သူ အသက် ၂၅ နှစ်အရွယ်ခန့် မောင်အဒူလဟင်း တို့ဖြစ်ပြီး ဖခင်ဖြစ်သူ အသက် (၅၂) နှစ်အရွယ် ဦးမူနား သည် ပြင်းထန်ဒဏ်ရာ ရရှိခဲ့ကာ နေအိမ် (၁၀) လုံးခန့် မီးလောင်ပျက်စီးခဲ့ကြောင်း ဒေသခံများထံမှ သိရသည်။
ကျောက်မဲမြို့ကို စစ်ကော်မရှင်တပ်က အောက်တိုဘာ (၁) ရက်တွင် ပြန်လည် ထိန်းချုပ်ခဲ့ပြီးနောက် မိုင်းငေါ့မြို့နှင့် မိုင်းလုံမြို့တို့ကို လေကြောင်းဖြင့် ဆက်လက်ဖိအားပေး တိုက်ခိုက်နေခြင်းကြောင့် ဒေသခံများလည်း လေကြောင်းအန္တရာယ် ရှောင်ရှားရန် ဘေးလွတ်ရာ ထွက်ပြေးတိမ်းရှောင်နေရပြီး စားနပ်ရိက္ခာ ပြတ်လပ်နေကြောင်း သိရသည်။
“အခုလည်း အဝင်အထွက် ပိတ်ထားတယ်၊ ဒေသခံက ရွာတွေမှာပဲ ရှောင်နေကြရတယ်လို့ ပြောတယ်။ ရှောင်ချင်ပေမဲ့ ပိတ်ထားတော့ ရွာတွေမှာပဲ နေနေကြရရှာတယ်။ အစားအသောက်တွေကလည်း လမ်းပိတ်ထားတော့ သယ်မရလို့ ဈေးတက်ပြီး တချို့ဟာတွေ ပြတ်နေပြီ”ဟု အဆိုပါ မိုင်းငေါ့ဒေသခံ အမျိုးသမီးက ဆက်ပြောသည်။
စစ်ကော်မရှင်တပ်သည် အောက်တိုဘာလ (၁) ရက်မှ (၂၀) ရက်အထိ လေကြောင်းဖြင့် TNLA ထိန်းချုပ်ထားသည့် နမ့်ဆန်၊ မန်တုံ၊ နမ္မတူ၊ မိုင်းငေါ့၊ မိုင်းလုံ၊ မိုးကုတ်နှင့် မိုးမိတ် စသည့် မြို့များတွင် စုစုပေါင်း (၃၀) ကြိမ်ထက်မနည်း ဗုံးကြဲချတိုက်ခိုက်ခဲ့သည်။
အဆိုပါ လေကြောင်းတိုက်ခိုက်မှုအတွင်း သံဃာတော် (၂) ပါး၊ ကလေး (၈) ဦး၊ အမျိုးသမီး (၁၉) ဦး အပါအဝင် အရပ်သားစုစုပေါင်း (၄၁) ဦး သေဆုံးခဲ့ပြီး အမျိုးသမီး (၁၇) ဦးနှင့် ကလေး (၁၁) ဦး အပါအဝင် အရပ်သား (၅၀) နီးပါး ထိခိုက်ဒဏ်ရာ ရရှိခဲ့ပြီး နေအိမ် (၁၃၈) အိမ်၊ စာသင်ကျောင်း (၃) ကျောင်းနှင့် ဘုန်းကြီးကျောင်း (၃) ကျောင်း ထိမှန်ပျက်စီးခဲ့ကြောင်း TNLA ထုတ်ပြန်ချက်အရ သိရသည်။
Leave a Comments