ချင်းမိုင်မြို့အတွင်း သျှမ်းလူငယ်ဂိုဏ်းတစ်ခုမှ ဓားဖြင့် တိုက်ခိုက် ခုတ်လိုက်မှုကြောင့် လက်ပြတ်သွားသည့် အသက် (၁၄)နှစ်အရွယ် မိန်းကလေး၏ လက်ပြန်ဆက်ကုသမှု အောင်မြင်စွာ ပြုလုပ်နိုင်ကြောင်း သတင်းရရှိသည်။

ပြီးခဲ့သည့် သြဂုတ် ၁၆ရက်တွင် ထိုင်းနိုင်ငံ ချင်းမိုင်မြို့အတွင်း သျှမ်းလူငယ်ဂိုဏ်း ၏ တိုက်ခိုက်မှုကြောင့် ကျောင်းသား ၃ဦး ပြင်းထန်စွာ ဒဏ်ရာရရှိခဲ့ပြီး အသက် ၁၄နှစ်အရွယ် မိန်းကလေး လက်ပြတ်ဆုံးရှုံးခဲ့ရသည်။

ထို လက်ပြတ်သွားသည့် အမျိုးသမီးသည် စက်တင်ဘာလတွင် လက်ပြန်ဆက် ခွဲစိတ်ကုသပြီး လက်ရှိမှာ နေအိမ်တွင် ပြန်လာနိုင်ပြီဖြစ်ကြောင်း ထိုင်းသတင်းဌာနများ၏ ဖော်ပြချက်အရသိရသည်။

လက်ပြတ်သွားသည့် မိန်းကလေးငယ်ကို ချင်းမိုင်တက္ကသိုလ်၊ Maharaj Nakron Chiang Mai ဆေးရုံသို့ အရေးပေါ်အခြေအနေပို့ဆောင်ခဲ့ရပြီး၊ နာရီပေါင်း ၂၀ နီးပါး ကြာမြင့် ခွဲစိတ်ကုသမှု အပြီးအောင်မြင်စွာ ပြန်လည်ဆက်နိုင်ခဲ့ကြောင်း ထိုင်းသတင်းဌာနများတွင် ဖော်ပြထားသည်။

ဆက်လက်ပြီး ၂၄ ရက်ကြာ ကုသမှုခံယူပြီးနောက် ပြီးခဲ့သည့်သောကြာနေ့က ဆေးရုံမှ ဆင်းခွင့်ရခဲ့ကြောင်း Maharaj Nakron Chiagn Mai မှ ဆရာဝန်များက သတင်း ထုတ်ပြန်ခဲ့သည်။

“ပြန်ဆက်ထားတဲ့ လက်မှာ သွေးလည်ပတ်မှုကောင်းမွန်ပြီး တစ်ရှူးသေဆုံးတာ သို့မဟုတ် ပိုးဝင်ခြင်းလက္ခဏာတွေ မရှိပါဘူး။ ဒဏ်ရာခြောက်သွေ့သွားပြီဖြစ်ပြီး လူနာလည်း ကုထုံးတွေကတစ်ဆင့် ပြန်လည်ထူထောင်ရေးအဆင့်ကို ရောက်ရှိသွားပါပြီ” ဟု ဟု ဆေးပညာဌာန ဒေါက်တာ နာရိန်းချိုတီရို့စ်နီရာမစ်က ထုတ်ပြန်ချက်တွင် ပြောကြားခဲ့သည်။

မိန်းကလေးမှာ လက်ချောင်းအဆစ်အချို့ကို လှုပ်ရှားနိုင်ပြီဖြစ်သော်လည်း အာရုံခံစားမှုအားလုံး ပြန်လည် မရရှိရသေးကြောင်းဖော်ပြထားသည်။

မိန်းကလေး၏ စိတ်ကျန်းမာရေးအတွက် ဆရာဝန်များမှ နီးကပ်စွာစောင့်ကြည့်နေပြီး တိုးတက် ကောင်းမွန်လာကြောင်း ၎င်းက ထပ်လောင်းပြောသည်။

ထို ကျောင်းသား ၃ဦး ထိခိုက်ဒဏ်ရာရရှိမှုနှင့် မိန်းကလေးငယ် လက်ပြတ်သည်အထိ ကျူးလွန်ခဲ့သည့် သံသယရှိသူ သျှမ်းလူငယ်ဂိုဏ်း အဖွဲ့ဝင် ၁၅ဦးကိုလည်း ထိုင်းရဲတပ်ဖွဲ့က ဖမ်းဆီးခဲ့ပြီး တရားစွဲဆိုထားသည်။

ထို့အပြင် တိုက်ခိုက်မှု၏ နောက်ဆက်တွဲအဖြစ် တရားမဝင် မြန်မာရွှေ့ပြောင်းအလုပ်သမား ၁၅၀ ဦးကျော်ဖမ်းဆီးခံခဲ့ရပြီး အသက် ၁၄ နှစ်မှ ၃၁ နှစ်အထိ သျှမ်းလူငယ်များပါဝင်ကြောင်းသိရသည်။

မြန်မာနိုင်ငံအတွင်း မတည်ငြိမ်မှုများကြောင့် ထိုင်းနိုင်ငံအတွင်းသို့ အလုံးအရင်းဖြင့်ပြောင်းရွေ့ခိုလှုံလာမှုများ များပြားလာချိန်တွင် ယခုကဲ့သို့ ဖြစ်ရပ်သည် ရွေ့ပြောင်းလူငယ်များအပေါ် စီစစ်အရေးယူမှုများ ပိုမိုများပြားလာလျက်ရှိသည်။

ဓာတ်ပုံ/ ကိုးကား – ဘန်ကောက်ပို့စ်