ထိုင်းနိုင်ငံ ချင်းမိုင်မြို့ အမ်းဖန်းကျောက် အမည်ရှိ စားသောက်ဆိုင်တွင် အုပ်စုလိုက်အဖွဲ့ မှ အမျိုးသားတစ်ဦးကို ဓားခုတ်ခဲ့ကြောင်း စုံစမ်း သိရှိရသည်။
ပြီးခဲ့သည့် ဇူလိုင် (၁) ရက်တွင် အသက် (၂၇) နှစ် အရွယ်ရှိ မြန်မာရွှေ့ပြောင်းအလုပ်သမား စိုင်းကျော် ဆိုသူသည် စားသောက်ဆိုင် စတိတ်စင်ပေါ် သီချင်းဆိုသူကို ကြည့်စဥ် တဖက်အုပ်စုအဖွဲ့ နှင့် မျက်လုံးချင်းဆုံခဲ့သည်။
ထိုနောက် စိုင်းကျော်မှ ဆိုင်အပြင်ခဏထွက်သွားပြီး ဖုန်းပြောနေစဥ် တဖက်အုပ်စုမှ အပြင်ထွက်လာပြီး ဓားဖြင့်ခုတ်လိုက်ကြောင်းသိရသည်။
“ကျနော်တောင် သူတို့ကို မသိဘူး။ ကျနော် အပြင်ထွက်ပြီး ဖုန်းဆက် စကားပြောစဥ်မှာ အဲ့လူက နောက်လိုက်လာမေးတယ်။ ခုနက ဘာကြောင့် သူ့မျက်နှာ ကြည့်လဲဆိုတာ မေးတယ်။ ကျနော် ဘာမှ မဖြေခင်မှာပဲ သူ့ သူငယ်ချင်းတွေကို ခေါ်ပြီး ကျနော်ကို ရိုက်နှက်ပြီး ဓား နဲ့ ကျနော်ရဲ့ လက်ဖဝါးကို ထိုးလိုက်တယ်” ဟု စိုင်းကျော် မှ မီဒီယာ တစ်ခုမှာ ဖြေကြားထားသည်။
အဆိုပါ အုပ်စုဖွဲ့ ရိုက်နှက်သည့် လူများသည် လွတ်မြောက်သွားခဲ့ကြောင်းလည်း သိရသည်။
“ကျနော် မျက်နှာ (၁) ယောက်ပဲ မှတ်မိတယ်။ ကျန်တာတော့ မမှတ်မိဘူး။ ရဲ တွေ ရောက်လာတော့ သူတို့ အားလုံးက ထွက်ပြေးသွားတယ်။ အားလုံး (၅) ယောက်တော့ရှိမယ်” ဟု ၎င်း က ပြောသည်။
လက်ရှိ ရိုက်နှက်ခံရသည့် အမျိုးသားသည် ရဲစခန်းတွင် အမှုဖွင့်ထားပြီး ထို အုပ်စုဖွဲ့ သောင်းကျန်းသည့် အဖွဲ့နာမည်မှာ ကြာနက် ( မောက်မိုဆီလမ်) အဖွဲ့ ဖြစ်ကြောင်း သိရှိရသည်။
မောက်မိုဆီလမ် အဖွဲ့သည် ယခုလို အုပ်စုဖွဲ့ သောင်းကျန်းမှုသည် ပထမကြိမ် မဟုတ်ကြောင်း သိရှိရသည်။
Leave a Comments