ထိုင်းနိုင်ငံမြောက်ပိုင်း ချင်းမိုင်မြို့ရှိ အဝေးပြေးကားဂိတ်တွင် ဘန်ကောက်သို့ မှောင်ခိုတင်ပို့ရန် ပြင်ဆင်နေသည့် စိတ်ကြွဆေးပြား ၁.၈ သန်းကျော်ကို သံသယရှိသူ သုံးဦးနှင့်အတူ ရဲတပ်ဖွဲ့က ကြားဖြတ်ဖမ်းဆီးရမိခဲ့ကြောင်း သိရသည်။

ယမန်နေ့ (မေလ ၁၄ ရက်) တွင် ချင်းမိုင်မြို့ မဲ့ပင်းရဲစခန်းမှ ရဲတပ်ဖွဲ့ဝင်များသည် အမှတ် (၃) အဝေးပြေးကားဂိတ်၊ အမှတ် ၁၀ ကားဆိုက်ရပ်ရာနေရာတွင် ဘန်ကောက်မြို့သို့ ထွက်ခွာရန် ပြင်ဆင်နေသည့် ဘတ်စ်ကားတစ်စီးကို ဝိုင်းရံပိတ်ဆို့ပြီး စစ်ဆေးမှုများ ပြုလုပ်ခဲ့ခြင်း ဖြစ်သည်။

အဆိုပါ စစ်ဆေးမှုအတွင်း ခရီးဆောင်အိတ်ကြီး နှစ်လုံးအတွင်း စနစ်တကျ ထည့်သွင်းသယ်ဆောင်လာသည့် စိတ်ကြွဆေးပြား အလုံးရေ ၁,၈၀၀,၀၀၀ ကို ရှာဖွေတွေ့ရှိခဲ့ခြင်း ဖြစ်သည်။

ရဲတပ်ဖွဲ့၏ ထုတ်ပြန်ချက်အရ ဖမ်းဆီးခံရသူများမှာ အသက် ၂၃ နှစ် နှင့် အသက် ၄၃ နှစ်အတွင်းရှိ ထိုင်းနိုင်ငံသား အမျိုးသား ၂ ဦးနှင့် အမျိုးသမီး ၁ ဦးတို့ ဖြစ်သည်။

၎င်းတို့သည် အဆိုပါမူးယစ်ဆေးဝါးများကို ဘန်ကောက်မြို့သို့ သယ်ဆောင်သွားရန် ကြိုးပမ်းခဲ့ခြင်းဖြစ်ကြောင်း ကနဦး စစ်ဆေးချက်များအရ သိရသည်။

လက်ရှိတွင် ဖမ်းဆီးရမိသူများကို မူးယစ်ဆေးဝါး တရားမဝင် လက်ဝယ်ထားရှိမှု၊ သယ်ဆောင်ဖြန့်ဖြူးမှုတို့ဖြင့် အမှုဖွင့် အရေးယူထားသည်။

ထိုင်းရဲတပ်ဖွဲ့သည် အဆိုပါ မူးယစ်ဆေးဝါးများ၏ ရင်းမြစ်နှင့် နောက်ကွယ်မှ ကြိုးကိုင်နေသည့် ဂိုဏ်းဝင်များကို ဖော်ထုတ်နိုင်ရန်အတွက် စုံစမ်းစစ်ဆေးမှုများ လုပ်ဆောင်နေကြောင်း သိရသည်။