ထိုင်းနိုင်ငံ ချင်းမိုင်ခရိုင် ချင်းမိုင် – ချင်းရိုင်းကြား ပြည်ထောင်စု ကားလမ်းမပေါ်တွင် မတော်တဆ ယာဉ်တိုက်မှုဖြစ်ပွား၍ ဆယ်ကျော်သက်အရွယ်ရှိ သျှမ်းလူငယ် ၂ ဦး သေဆုံးခဲ့ရကြောင်း စုံစမ်းသိရသည်။
ပြီးခဲ့သည့် ဒီဇင်ဘာ ၃၁ ရက် ညနေ ၇ နာရီကျော် အချိန်က ချင်းရိုင်းမြို့နယ် အတွင်းရှိ ပြည်ထောင်စု ကားလမ်းမပေါ်တွင် မတော်တဆ ယာဉ်တိုက်မှုဖြစ်ပြီး အသက် (၁၅) နှစ် အရွယ် စိုင်းလောဝ်ဆိုင် နှင့် စိုင်းယုံး ညီအစ်ကိုနှစ်ဦး သေဆုံးခဲ့ရကြောင်း ချင်းမိုင်မြို့ ရွှေ့ပြောင်းအလုပ်သမား ကူညီရေးအသင်းမှ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။
“ သူတို့ ညီအစ်ကို နှစ်ယောက်က အလုပ်ကအပြန် နှစ်သစ်ကူးပွဲ သွားလည်တာဗျ။ နှစ်သစ်ကူးပွဲက မရှိဘူးဆိုပြီး အိမ်ကိုပြန်လာတယ်။ လုံနောက်ရွာကို ရောက်တဲ့အခါမှာ ကားတစ်စီးနဲ့ ဝင်တိုက်မိတာဗျာ။ ကားက သူတို့ရှေ့ကို ဖြတ်မောင်းတဲ့အခါမှာ သူတို့က ဝင်တိုက်တာဗျာ။ နှစ်ယောက်စလုံးက ဆိုင်ကယ် ဦးထုပ်မဆောင်းတော့ စိုင်းယုံး ကတော့ ပွဲချင်းပြီး ဆုံးသွားတယ်။ တစ်ယောက်က လူနာတင်ကားပေါ်မှာ ဆုံးသွားတယ် “ ဟု ၎င်း အမျိုးသားတစ်ဦးက ပြောသည်။
အဆိုပါ ယာဉ်တိုက်မှုခင်း နှင့် ပတ်သက်ပြီး လက်ရှိမှာ သက်ဆိုင်ရာ ထိုင်းရဲတပ်ဖွဲ့က နှစ်ဦးနှစ်ဖက်ကို စစ်ဆေးမေးမြန်းခြင်း ပြုလုပ်နေကြောင်း သိရသည်။
ထို့အပြင် ထိုင်းနိုင်ငံသို့ ရောက်ရှိနေသည့် မြန်မာရွှေ့ပြောင်းအလုပ်သမားထဲမှ လူငယ်များသည် ယာဉ်စည်းကမ်း၊ လမ်းစည်းကမ်းကို လိုက်နာပြီး မောင်းပေးစေလိုရန် ၎င်းက တိုက်တွန်းထားသည်။
“ ဆိုင်ကယ်စီးရင် ဖြည်းဖြည်းမောင်းကြပါ။ ဆိုင်ကယ် ဦးထုပ်အမြဲဆောင်းပါ။ ပြီးတော့ လိုင်စင်၊ အာမခံကြေး မှန်မှန်ဆောင်ပါ။ တကယ်လို့ ယာဉ်တိုက်မှု ဖြစ်လာလျှင် ဆေးကုသမှု စရိတ်တွေ၊ အသက်အာမခံကြေးတွေ ပြန်ရပါမယ် “ လို့ ၎င်းက တိုက်တွန်းထားသည်။
ထိုင်းနိုင်ငံ ချင်းမိုင်မြို့မှာ ယာဉ်တိုက်မှု မကြာခဏ ဖြစ်ပွားလေ့ရှိရာ ထိုထဲတွင် မြန်မာရွှေ့ပြောင်းအလုပ်သမားများ ပါဝင်လေ့ရှိနေကြောင်း သိရသည်။
