Sunday, July 21, 2024

ချင်းမိုင်မြို့ တရားမဝင် ဖွင့်လှစ်ထားသည့် စားသောက်ဆိုင်အတွင်း မြန်မာနိုင်ငံသား (၁၁) ဦး ဖမ်းဆီးရမိ

Must read

ထိုင်းနိုင်ငံ ချင်းမိုင်မြို့တွင် တရားမဝင် ဖွင့်လှစ်ထားသည့် တရုတ်စားသောက်ဆိုင်၌ ထိုင်းအာဏာပိုင်များ ဝင်ရောက် စစ်ဆေးချိန် တရားမဝင် အလုပ်လုပ်နေသည့် မြန်မာနိုင်ငံသား (၁၁) ဦး ဖမ်းဆီးရမိခဲ့ကြောင်း စုံစမ်းသိရှိရသည်။

Photo – Chiangmai Immigration

ပြီးခဲ့သည့် ဇူလိုင် (၇) ရက်တွင် အဆိုပါ စားသောက်ဆိုင်ကို ဝင်ရောက်စစ်ဆေးရာ တရားမဝင် မြန်မာနိုင်ငံသား (၁၁) ဦးထဲက (၁) ဦးဟာ ဆိုင်မန်နေဂျာ တာဝန်ယူထားပြီး၊ ကျန်သည့် (၁၀) ဦးသည် တရားမဝင် မြန်မာရွှေ့ပြောင်းအလုပ်သမားများ ဖြစ်ကြသည်။

“ဆိုင်ရှင်က တရုတ်ဖြစ်မယ်ထင်တယ်။ ကျမတို့ သွားစားတုန်းက ဆိုင်ရှင်ဖြစ်မယ်လို့ ယူဆရတဲ့ သူလည်း တရုတ်စကားတွေပဲ ပြောကြတာ။ ထိုင်းစကားတောင် သူတို့မပြောတတ်ဘူး”ဟု ၎င်းဆိုင်ကို သွားရောက်စားဖူးသည့် မြန်မာနိုင်ငံသား တစ်ဦး က ပြောသည်။

ထိုင်းနိုင်ငံ ဥပဒေအရ ထိုင်းလူမျိုး ထိုင်းနိုင်ငံသားကတ် ကိုင်ဆောင်ထားသူမှ လွဲပြီး စီးပွားရေး လုပ်ပိုင်ခွင့် မရှိကြောင်း ပြဌာန်းထားသည်။

အဆိုပါ ဖမ်းဆီးခံထားရသည့် တရားမဝင် မြန်မာနိုင်ငံသားများသည် ၎င်းဆိုင်မှာ တစ်လလျှင် လုပ်အားခ ၈ ထောင်ဘတ် ရရှိပြီး ၎င်းစားသောက်ဆိုင်မှာ (၁) နှစ်နီးပါးခန့် အလုပ်ဝင်လုပ်နေပြီဖြစ်ကြောင်း သိရှိရသည်။

“ထိုင်းမှာက မြန်မာရွှေ့ပြောင်းအလုပ်သမားတွေ ကိုယ်တိုင် ရာထူးကြီးတဲ့နေရာ ရယူထားလို့မရဘူး။ အလုပ်လုပ်မယ်ဆိုရင် အထောက်အထားပြည့်စုံမှုရှိရမယ်။ အလုပ်လုပ်ခွင့်ကတ်တွေ ရှိထားရမယ်” ဟု ထိုင်းနိုင်ငံတွင်း နှစ်ရှည်စွာ နေထိုင်ခဲ့သူ တစ်ဦး ကပြောသည်။

ထိုင်းနိုင်ငံ တရားမဝင် ရောက်လာသည့် ရွှေ့ပြောင်း အလုပ်သမားများကို ထိုင်းအစိုးရ အလုပ်သမား ရေးရာရုံးမှ Work Permit ကိုပြုလုပ်ရန် စာရင်းထည့်သွင်း နိုင်ပြီဖြစ်ကြောင်း ဇူလိုင် ၅ ရက်တွင် ထုတ်ပြန်ခဲ့သည်။

ပုံမှန်အားဖြင့် Work Permit ကို ပြုလုပ်ရန်အတွက် ဘတ်ငွေ ၁ သောင်း အထိ ကုန်ကျလေ့ရှိပြီး၊ Work Permit ပြုလုပ်ပေးမည့် နိုင်ငံများမှာ မြန်မာနိုင်ငံ၊ ကမ္ဘောဒီးယား၊ လာအို နှင့် ဗီယက်နမ် နိုင်ငံသားများ ဖြစ်ကြသည်။

စစ်အာဏသိမ်းပြီးနောက် မြန်မာနိုင်ငံသားများသည် ထိုင်းနိုင်ငံသို့ တရားမဝင်ပြောင်းရွှေ့လာသူ သိန်းချီရှိကြောင်းသိရသည်။

Leave a Comments

- Advertisement -spot_img

Latest article