သျှမ်းပြည် ဆီဆိုင်မြို့နယ် နောဝ်ထောင်ကျေးရွာအတွင်း ပအိုဝ်းပြည်သူ့စစ်PNO တပ်သားကို ဝက်အကောင်ကြီး မပေးသည့် ဒေသခံတစ်ဉီးကို သတ်လိုက်ကြောင်း သတင်းရရှိသည်။

ပြီးခဲ့သည့် အောက်တိုဘာ ပထမပတ်တွင် ဆီဆိုင်မြို့နယ် နောဝ်ထောင်ကျေးရွာတွင် PNO တပ်သားတစ်ဉီးက အသက် (၆၀)အရွယ်ရှိ ဒေသခံ ခွန်လှ (အမည်လွှဲ)ထံ ဝက်တစ်ကောင် တောင်းရာမှ ၎င်းဒေသခံသည် ဝက်အကောင်ကြီးမပေးဘဲ အသေးတစ်ကောင်ကိုပေးသဖြင့် မကျေနပ်ကာ သေနတ်ဖြင့် ပစ်သတ်လိုက်ကြောင်း အဆိုပါ သတင်းကို သိရှိသည့် အမျိုးသားတစ်ဉီးက သျှမ်းသံတော်ဆင့်ကိုပြောသည်။

“ ဒီနောဝ်ထောင်ကျေးရာမှာက PNO တပ်သားတွေ နယ်မြေစိုးမိုးထားတာ။ အခုက ဝက်လာတောင်းတာ အကြီးမပေးဘဲ အသေးတစ်ကောင်ပေးလိုက်တာနဲ့ သေနတ်နဲ့ပစ်သတ်လိုုက်တာပဲ။ သတင်းကို လည်းဖုံးထားတယ်”ဟု ၎င်းက ဆိုသည်။

ဒေသခံတစ်ဦးကို PNO တပ်သားက သေနတ်ဖြင့် ပစ်သတ်လိုက်သည့်ကိစ္စနှင့်ပတ်သက်ပြီး သတင်းမပျံ့ရန် လည်း ခြိမ်းခြောက်ထားကြောင်း သိရသည်။

ထို့အပြင် နောဝ်ထောင်ကျေးရွာတွင် နေထိုင်သည့် ဒေသခံများကို တော်လှန်ရေးတပ်ဖွဲ့ဝင် PDF များနှင့် ဆက်သွယ်ခြင်း၊ ထောက်ပံ့ကူညီနေခြင်းများတွေ့ပါက လုံခြုံရေးအတွက် တစ်ရွာလုံးကို အရေးယူဆောင်ရွက်ခြင်းများ ပြုလုပ်လျှင် အရေးယူသွားမည်ဟုလည်း PNO ဘက်က ခြိမ်းခြောက်ထားသည်။

“PNOက တစ်ရွာလုံးကို ကင်းလှည့်ကြည့်နေတာ၊ PDFနဲ့ ပတ်သက်တာတို့ ကူညီထောက်ပံ့တာတို့ လုပ်မယ်ဆိုရင် လုံခြုံရေးအာမ မခံဘူးလို့ ပြောတယ်။ သူတို့ကိုပဲ ကြောက်နေရတာ။ ထမင်းထုတ်တွေလည်း ပို့ခိုင်းတယ်၊ သူတို့ မထင်ရင် မထင်သလို ရွာသားတွေကိုလည်း ရိုက်နှက်တာတို့လုပ်တယ်။”ဟု နောဝ်ထောင်ကျေးရွာ ဒေသခံအမျိုးသား က ထပ်လောင်းပြောသည်။

ပြီးခဲ့သည့် ဩဂုတ်လ ၉ ရက်တွင် ဆီဆိုင်မြို့နယ် နောင်ထောင်ကျေးရွာ၌ စစ်ကော်မရှင်တပ်နှင့် ၎င်း၏လက်အောက်ခံ PNO တို့နှင့် ပအိုဝ်းအမျိုးသားလွတ်မြောက်ရေးတပ်တော် PNLA တို့ တိုက်ပွဲပြင်းထန်စွာ ဖြစ်ပွားခဲ့ပြီး နောင်ထောင်အပါအဝင် အနီးနားကျေးရွာများကိုPNO/PNA ပြည်သူ့စစ် တို့က သိမ်းယူလိုက်သည်။

ထိုသို့ သိမ်းယူပြီး နောက် ဩဂုတ်လ ၉ ရက်တွင် ဆီဆိုင်မြို့နယ် ကုလားလမ်း ကျေးရွာရှိ ပြည်သူနေအိမ်များကို စစ်ကော်မရှင်နှင့် PNOပြည်သူ့စစ်တို့က မီးရှို့ဖျက်ဆီးခဲ့သောကြောင့် နေအိမ်၂၄ အိမ်ထက်မနည်း မီးလောင်ခဲ့ကြောင်း သိရသည်။

နောင်ထောင်ကျေးရွာသည် ဆီဆိုင်မြို့နှင့် ၁၂ မိုင်ကျော်ကွာဝေးသည်။

နောင်ထောင်ကျေးရွာအတွင်းရှိ စျေးကြီးသည် အရှေ့ဘက် မောက်မယ်ဒေသအတွင်းရှိ ကျေးရွာများနှင့် တောင်ရှေ့ အုပ်စုကျေးရွာများက အားထားနေရသည့် စျေးတစ်ခုဖြစ်သော်လည်း ပြီးခဲ့သည့် သြဂုတ် ၁၄ရက်တွင် စျေးဆိုင်များကို ဖျက်ရန် PNO/PNA က အမိန့်ပေးခဲ့သည်။