သျှမ်း-မန္တလေးနယ်စပ် မိုးကုတ်နှင့် မိုင်းလုံမြို့အကြား စစ်ကော်မရှင်တပ်က လေကြောင်းဗုံးဖြင့် ထပ်မံကြဲချ တိုက်ခိုက်ခဲ့ကြောင်း စုံစမ်းသိရသည်။
ယမန်နေ့ (အောက်တိုဘာ ၁၂ ရက်) ညနေ ၅ နာရီကျော်တွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် မိုးကုတ်မြို့နှင့် မိုင်းလုံမြို့အကြား စစ်ကော်မရှင်တပ်က လေကြောင်းဖြင့် ဗုံး ၃ လုံး ကြဲချတိုက်ချုက်ခဲ့ရာ လယ်ကြီးကျေးရွာအနီး ဗုံးတစ်လုံးနှင့် ပဇီကျေးရွာအနီး ဗုံးနှစ်လုံး ကျရောက်ပေါက်ကွဲခဲ့ကြောင်း ဒေသခံများက ပြောသည်။
“အခု ဗုံးကြဲခံရတဲ့ လယ်ကြီးရွာက မိုးကုတ်နဲ့ မိုင်းလုံ ကြားထဲမှာ ရှိတာ။ နောင်ချိုဘက်ကနေ လာရင်လည်း အဲ့ရွာမှာ လမ်းဆုံလမ်းခွလို ဖြစ်နေတာ၊ စစ်ဆေးရေးဂိတ်လည်း ရှိတော့ အဲ့နားလေး ကြဲချင်တာလား မသိဘူး။ ထိခိုက်မှုကတော့ ပဇီရွာမှာ အိမ်ထိတယ်ပြောတယ်၊ အတိအကျတော့ မပြောတတ်ဘူး”ဟု မိုးကုတ်မြို့နယ် ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ယခုဗုံးကြဲခံရသည့် ဖြစ်စဉ်နှင့် ပတ်သက်၍ စစ်ကော်မရှင်တပ်မှ ဂျက်ဖိုက်တာဖြင့် မိုင်းလုံမြို့အနီးရှိ လယ်ကြီးရွာအနီး ပေါင် (၂၅၀) ဗုံးတစ်လုံး၊ ပဇီကျေးရွာအတွင်း ပေါင် (၂၅၀) ဗုံးနှစ်လုံး ကြဲချတိုက်ခိုက်ခဲ့ရာ နေအိမ်(၄) လုံး ထိခိုက်ပျက်စီးခဲ့ကြောင်း TNLA သတင်းနှင့် ပြန်ကြားရေးဌာနမှ ယမန်နေ့တွင် ထုတ်ပြန်ထားသည်။
မိုးကုတ်မြို့နယ်ထဲ ပါရှိသည့် လယ်ကြီးကျေးရွာသည် ပြင်ဦးလွင်-မိုးကုတ်လမ်းနှင့် မိုးကုတ်-ကျောက်မဲလမ်း လမ်းဆုံတွင် တည်ရှိပြီး နောင်ချိုမြို့ဘက်မှ မြေပြင်စစ်ကြောင်းထိုးလာသည့် စစ်ကော်မရှင်တပ်ဖွဲ့များသည် TNLA ၊ PDF ပူးပေါင်းတပ်ဖွဲ့များနှင့်လည်း တိုက်ပွဲပြင်းထန်လျက်ရှိသည်။
အလားတူ အောက်တိုဘာ ၇ ရက် နေ့လယ်ပိုင်းတွင် TNLA ထိန်းချုပ်ထားသည့် မိုင်းလုံမြို့အနီး ပဇီကျေးရွာအုပ်စု မိုက်ဟုန်းကျေးရွာကို စစ်ကော်မရှင်တပ်မှ လေကြောင်းဖြင့် ပေါင် (၂၅၀) ဗုံးနှစ်လုံး ကြဲချတိုက်ခိုက်ခဲ့ရာ အမျိုးသမီး ၅ ဦးနှင့် ကလေးငယ်တစ်ဦး အပါအဝင် ပြည်သူ (၁၀) ဦး သေဆုံးခဲ့ပြီး ၃ ဦး ထိမှန်ဒဏ်ရာ ရရှိခဲ့သည်။
လက်ရှိတွင် စစ်ကော်မရှင်တပ်သည် သျှမ်း-မန္တလေးနယ်စပ်ရှိ မိုးကုတ်လမ်းပိုင်းကို လေကြောင်းဖြင့် ဆက်တိုက် ဗုံးကြဲတိုက်ခိုက်နေပြီး မန္တလေး-မိုးကုတ်လမ်းကိုလည်း အင်အားအလုံးအရင်းဖြင့် စစ်ကြောင်းထိုးနေခြင်းကြောင့် တိုက်ပွဲနေ့စဉ်ဖြစ်ပွားနေကြောင်း သိရသည်။
Leave a Comments