သျှမ်းပြည် သီပေါမြို့မှ ထွက်ပြေးတိမ်းရှောင်လာသည့် စစ်ရှောင်များထဲမှ လားရှိုးဆေးရုံကြီးတွင် ဆေးကုသမှု ခံယူနေသည့် မိန်းကလေးငယ် တစ်ဦး သေဆုံးသွားကြောင်း သတင်းရရှိသည်။
ယမန်နေ့ (အောက်တိုဘာလ ၉ ရက်) ညနေ ၅ နာရီဝန်းကျင်တွင် လားရှိုးမြို့ ပြည်သူ့ဆေးရုံကြီးတွင် ဆေးကုသမှု ခံယူနေသည့် သီပေါမြို့စစ်ရှောင် အသက် (၁၃) အရွယ်ရှိ မိန်းကလေးငယ် တစ်ဦးသည် မွေးရာပါ ရောဂါကြောင့် သေဆုံးသွားခဲ့ကြောင်း Freedom Youth Organization – FYO ၏ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။
“ကလေးမလေးက မွေးရာပါ ရောဂါကြောင့် သီပေါမြို့က ပရဟိတတစ်ဖွဲ့က လားရှိုးဆေးရုံမှာ လာပို့ပြီး ဆေးကုသမှု ခံယူရင်းကနေ မနေ့ညနေက ဆုံးသွားတာ။ မိဘလည်း ဆုံးသွားတာ ကြာပြီလို့ သိရတယ်၊ ဆွေမျိုးတွေတော့ ရှိလောက်တယ် လိုက်မလာကြတာ နေမယ်”ဟု FYO ပရဟိတအဖွဲ့၏ တာဝန်ရှိသူတစ်ဦးက ပြောသည်။
ပြီးခဲ့သည့် အောက်တိုဘာလ ၆ ရက်တွင် သီပေါမြို့ရှိ လူမှုကူညီရေး ပရဟိတအဖွဲ့တစ်ခုမှ အဆိုပါ မိန်းကလေးကို လားရှိုးမြို့ ပြည်သူ့ဆေးရုံကြီးသို့ ဆေးကုသရန် ကူညီပို့ဆောင်ခဲ့ကြောင်း သိရသည်။
လားရှိုးဆေးရုံကြီးတွင် သေဆုံးသွားသည့် သီပေါစစ်ရှောင် မိန်းကလေးသည် အသက် (၁၃) နှစ်အရွယ် နန်းစိန်ညွန့် ဖြစ်ကြောင်း သိရပြီး ယနေ့ (အောက်တိုဘာလ ၁၀ ရက်)တွင် လားရှိုးဆေးရုံကြီး ရင်ခွဲရုံမှ ဘာသာပေါင်းစုံ သုဿာန်သင်္ချိုင်းသို့ ပို့ဆောင်ပေးခဲ့ကြောင်း သိရသည်။
ပြီးခဲ့သည့် စက်တင်ဘာလ ၄ ရက်တွင်လည်း လားရှိုးမြို့ရှိ ပြည်သူ့ဆေးရုံကြီး၌ ဆေးကုသမှု ခံယူနေသည့် ကျောက်မဲမြို့နယ် နောင်ပိန်တိုက်နယ် ပင်တိန်ရွာနေ အသက် (၆၀) ကျော်အရွယ်ရှိ ဦးမာလာ သည် နာတာရှည်ရောဂါအပြင် ဗုံးဆံထိမှန်ထားသည့် ဒဏ်ရာများကြောင့် သေဆုံးသွားခဲ့ကြောင်း သိရသည်။
လက်ရှိတွင် လားရှိုးမြို့ပေါ်ရှိ ဘုန်းကြီးကျောင်း၊ ဘုရားကျောင်းနှင့် ဂေဟာ (၂၆) နေရာတွင် နမ္မတူစစ်ဘေးရှောင် (၁၀၀၀) ကျော်၊ ကျောက်မဲ၊ နောင်ပိန်နှင့် သီပေါဘက်မှ စစ်ဘေးရှောင် (၂၀၀၀) နီးပါး၊ စုစုပေါင်း စစ်ဘေးရှောင်ဦးရေ (၃၀၀၀) ခန့် ရောက်ရှိနေပြီး ၎င်းတို့အတွက် စားဝတ်နေရေး အကူအညီများ အရေးတကြီး လိုအပ်နေကြောင်း စစ်ရှောင်ကူညီသူများက ပြောသည်။
ပုံစာ – လားရှိုးဆေးရုံကြီးတွင် သေဆုံးသွားခဲ့သည့် သီပေါစစ်ရှောင်မိန်းကလေး (ဓာတ်ပုံ-FYO)
Leave a Comments