ထိုင်း-မြန်မာနယ်စပ် တာချီလိတ်မြို့နယ်တွင် ငွေကျပ် ၁ ဒသမ၆ ဘီလီယံကျော်တန်ဖိုးရှိသော အိုက်စ် (မက်သ်အဖက်တမင်း) ၂၀၇ ကီလိုနှင့်အတူ အမျိုးသား ၇ ဦးကို ဖမ်းမိရမိကြောင်း စစ်ကော်မရှင်လက်အောက်ခံ မူးယစ်/ ရဲတပ်ဖွဲ့က ယမန်နေ့ (အောက်တိုဘာ ၈) ရက်တွင် သတင်းထုတ်ပြန်သည်။

အဆိုပါမူးယစ်ဆေးဝါးများကို အောက်တိုဘာလ ၄ ရက်နေ့ နံနက် ၉ နာရီအချိန်က တာချီလိတ်မြို့နယ် ဖန်မင်ကျေးရွာအုပ်စု မယ်ယန်းကျေးရွာရှီ စိုင်းရှဲန်တွီ၏ နေအိမ်အား သတင်းအရ ဝင်ရောက်ရှာဖွေခဲ့ရာ အမျိုးသား ၇ ဦးနှင့်အတူ အိုက်စ် (မက်သ်အဖက်တမင်း) ၂၀၇ ကီလိုကို ဖမ်းဆီးရမိခြင်းဖြစ်ကြောင်း သိရသည်။

ထို့ပြင် TOYOTA FORTUNER ယာဉ် ၁ စီး၊ HONDA CIVIC ယာဉ် ၁ စီး၊ TOYOTA CROWN ယာဉ် ၁ စီး၊ ISUZU D-MAX ယာဉ် ၁ စီးတို့ကိုလည်း သိမ်းဆည်းရမိကြောင်း ထုတ်ပြန်ချက်တွင် ရေးသားဖော်ပြထားသည်။

ဖမ်းဆီးရမိသော အမျိုးသား ၇ ဦးတွင် စိုင်းရှဲန်တွီ၊ ဖိလစ် (ခ) အကိန်၊ အိုက်မောင်၊ စိုင်းဝန်း၊ အိုက်အွန်ကျောက်၊ စိုင်းရှဲန်ဖနှင့် စိုင်းလောင်နွဲ့တို့ ဖြစ်ကြကြောင်း သိရသည်။

ကွင်းဆက်စစ်ဆေးဖော်ထုတ်ချက်အရ ဖမ်းဆီးရမိသော အိုက်စ် (မက်သ်အဖက်တမင်း) များ၏ ပိုင်ရှင်ဖြစ်သူမှာ တာချီလိတ်မြို့နယ် မိုင်းဖုန်း (ခ) ကျေးရွာအုပ်စု ဟိုခိုကျေးရွာတွင်နေထိုင်သူ စိုင်းမွန်းဖြစ်ပြီး ၎င်းကို နေအိမ်အတွင်း ဝင်ရောက်ရှာဖွေခဲ့ရာ ထွက်ပြေးတိမ်းရှောင်လျက်ရှိကြောင်း သိရသည်။

လက်ရှိတွင် ဖမ်းဆီးရမိသူများကို မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေအရ အရေးယူထားပြီး ကွင်းဆက်ပြစ်မှုကျူးလွန်သူများအား ဆက်လက်ဖော်ထုတ်လျက်ရှိကြောင်း သိရသည်။

အလားတူ အောက်တိုဘာလ ၂ ရက်နေ့တွင်လည်း တာချီလိတ်မြို့နယ် ဝိန်းကျောက်ရပ်ကွက်တွင် လမ်းလျှောက်လာသူ ဟိန်းထက်စိုးစံ (ခ) ကိုးထပ်အား စစ်ဆေးရှာဖွေရာ ၎င်းထံမှ စိတ်ကြွရူးသွပ်ဆေးပြား ၄,၃၀၀ ပြား (ဒေသကာလပေါက်ဈေး တန်းဖိုးငွေကျပ် ၃၀.၁ သိန်း) ကို တွေ့ရှိသိမ်းဆည်းရမိခဲ့ကြောင်း သိရသည်။