ထိုင်းနိုင်ငံအတွင်းသို့ မှောင်ခိုတင်သွင်းလာသည့် သန်းနှင့်ချီရှိသော မူးယစ်ဆေးဝါးအများအပြားကို ယခုရက်ပိုင်း၌ နယ်စပ်ဒေသတလျှောက်တွင် ဆက်တိုက်ဖမ်းဆီးရမိကြောင်း သတင်းသိရှိရသည်။

အောက်တိုဘာလ ၆ ရက် နေ့လယ် ၁၂ နာရီအချိန်က မယ်ဆိုင်-မယ်ချန်း လမ်းမပေါ်တွင် မောင်းနှင်လာသည့် မသင်္ကာဖွယ် ယာဉ်တစ်စီးနှင့် ဆိုင်ကယ်တစ်စီးကို ထိုင်းရဲတပ်ဖွဲ့များက ကြားဖြတ်ဖမ်းဆီးခဲ့ရာ ဆာလာအိတ်ဖြင့် ထုပ်ပိုးထားသော စိတ်ကြွဆေးပြား ကိုးသိန်း (၉၀၀,၀၀၀) ခန့်ကို အမျိုးသား ၂ ဦးနှင့်အတူ ဖမ်းဆီးရမိကြောင်း ထိုင်းသတင်းဌာနတွင် ရေးသားဖော်ပြထားသည်။

ထိုဖမ်းဆီးရမိသော အမျိုးသား ၂ ဦးသည် မြန်မာနိုင်ငံသား ဖြစ်ကြပြီး၊ ၎င်းတို့ ၂ ဦးအနက် ၁ ဦးသည် ထိုင်းနိုင်ငံ မယ်ဆိုင်မြို့တွင်နေထိုင်ပြီး အလုပ်သမားကတ် ကိုင်ဆောင်ထားသူ အသက် ၂၁ နှစ်အရွယ် လီမူဖြစ်ကြောင်း သိရသည်။

အလားတူ အောက်တိုဘာလ ၄ ရက် ည ၈ နာရီခန့်တွင်လည်း ချင်းတောင်းခရိုင်အတွင်းရှိ တောလမ်းမှတဆင့် မူးယစ်ဆေးဝါးများ မှောင်ခိုတင်သွင်းလာသည့် မူးယစ်မှောင်ခိုသမားများနှင့် ထိုင်းအာဏာပိုင်တို့အကြား အပြန်အလှန် ပစ်ခတ်မှုဖြစ်ပွားခဲ့ကြောင်း သိရသည်။

ပစ်ခတ်မှုအတွင်း မူးယစ်မှောင်ခိုသမား ၁ ဦးသေဆုံးပြီး စိတ်ကြွဆေးပြား စုစုပေါင်း လေးသိန်း (၄၀၀,၀၀၀) ခန့်ကို သိမ်းဆည်းရမိကြောင်း ထိုင်းသတင်းဌာနတွင် ရေးသားဖော်ပြထားသည်။

အဆိုပါသေဆုံးသွားသည့် မူးယစ်မှောင်ခိုသမား ၁ ဦးသည် ထိုင်းနိုင်ငံ ချင်းတောင်းခရိုင်ရှိ ရွာတစ်ရွာတွင် နေထိုင်သည့် ထိုင်းလူမျိုးဖြစ်ကြောင်း သိရသည်။

ပြီးခဲ့သည့် အောက်တိုဘာလ ၅ ရက် နံနက် ၄ နာရီကျော်တွင်လည်း ချင်းမိုင်ခရိုင်သို့ မှောင်ခိုတင်သွင်းမည့် စိတ်ကြွဆေးပြား ခြောက်သန်းကျော် (၆,၄၉၈,၀၀၀) ပြားကို Phrae ခရိုင်၊ Den Chai မြို့နယ်ရှိ စစ်ဆေးရေးဂိတ်တစ်ခုတွင် ဖမ်းဆီးရမိကြောင်း သိရသည်။

အောက်တိုဘာလ ၄ ရက်မှ ၆ ရက်အတွင်း ထိုင်းနိုင်ငံအတွင်းသို့ မှောင်ခိုတင်သွင်းလာသည့် မူးယစ်ဆေးဝါးများကို အာဏာပိုင်များက လိုက်လံပိတ်ဆို့ဖမ်းဆီးခဲ့ရာတွင် သံသယရှိသူ ၁၀ ဦးကို ဖမ်းဆီးရမိပြီး စိတ်ကြွဆေးပြား ၁၅ ဒသမ ၇၈ သန်း၊ မက်သာဖက်တမင်း ၂၃၅ ကီလိုဂရမ်နှင့် မူးယစ်ဆေးဝါး ရောင်းဝယ်ဖောက်ကားမှု လုပ်ငန်းများကို သိမ်းဆည်းရမိကြောင်း ယနေ့ အောက်တိုဘာလ ၈ ရက်နေ့က ပြုလုပ်သည့် သတင်းစာရှင်းလင်းပွဲတွင် တာဝန်ရှိသူများက ပြောကြားခဲ့ကြောင်း သိရသည်။