သျှမ်းပြည် ကျောက်မဲမြို့နယ်ထဲရှိ မိုင်းငေါ့မြို့နှင့် မိုင်းလုံမြို့တို့ကို စစ်ကော်မရှင်တပ်က လေကြောင်းဗုံးကြဲ တိုက်ခိုက်ခဲ့ခြင်းကြောင့် ကလေးအပါအဝင် အရပ်သား (၁၂) ဦးထက်မနည်း သေဆုံးဒဏ်ရာရခဲ့ကြောင်း စုံစမ်းသိရသည်။
ယနေ့ (အောက်တိုဘာလ ၈ ရက်) နံနက် ၁၁ နာရီကျော်တွင် ကျောက်မဲမြို့နယ်ထဲရှိ တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် မိုင်းငေါ့မြို့ပေါ်သို့ စစ်ကော်မရှင်တပ်က လေကြောင်းဗုံးကြဲ တိုက်ခိုက်ခဲ့ရာ မန်လုံနှင့် အထက်တာလုံရပ်ကွက်ထဲ ကျရောက်ပေါက်ကွဲခဲ့ကြောင်း ဒေသခံများက ပြောသည်။
အဆိုပါ လေကြောင်းဗုံးကြဲခံရမှုကြောင့် မန်လုံရပ်ကွက်ဥက္ကဋ္ဌဖြစ်သူ အသက် (၅၀) ကျော်အရွယ် ဦးရွှေဟုန်နှင့် ဒေါ်လှရင်တို့ လင်မယားနှစ်ဦး ပွဲချင်းပြီး သေဆုံး၍ အမျိုးသားတစ်ဦး ထိခိုက်ဒဏ်ရာရကာ နေအိမ်အများအပြား ထိမှန်ပျက်စီးခဲ့ကြောင်း မိုင်းငေါ့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ဗုံးကြဲသွားတာ ၁၁ နာရီ နည်းနည်းကျော်တယ်၊ လင်မယားနှစ်ယောက် သေတယ်။ အခုသေတဲ့လူက ရပ်ကွက်ဥက္ကဋ္ဌ၊ အိမ်ကတော့ သေချာမသိသေးဘူး။ အထက်တာလုံလည်း အိမ်တစ်အိမ် ထိတယ်၊ တစ်ယောက် ဒဏ်ရာရတယ်။ အခုထိတာက မန်လုံနဲ့ အထက်တာလုံ၊ မန်လုံက အထိအခိုက် အများဆုံး ဒါနဲ့ဆို သုံးကြိမ်မြောက်ပဲ”ဟု မိုင်းငေါ့ဒေသခံ ၎င်းအမျိုးသားက သျှမ်းသံတော်ဆင့်ကို ပြောသည်။
ကျောက်မဲမြို့ကို စစ်ကော်မရှင်တပ်က အောက်တိုဘာ (၁) ရက်တွင် ပြန်လည် ထိန်းချုပ်ခဲ့ပြီးနောက် မိုင်းငေါ့မြို့နှင့် မိုင်းလုံမြို့တို့ကို လေကြောင်းဖြင့် ဆက်လက်ဖိအားပေး တိုက်ခိုက်နေခြင်းကြောင့် ဒေသခံများလည်း လေကြောင်းအန္တရာယ် ရှောင်ရှားရန် ဘေးလွတ်ရာ ထွက်ပြေးတိမ်းရှောင်နေရပြီး စားနပ်ရိက္ခာ ပြတ်လပ်နေကြောင်း သိရသည်။
“ကျောက်မဲဘက်လည်း သွားလို့မရ စျေးသည်တွေကို လုံး၀ ပေးမဝင်ဘူး။ အဝင်အထွက် ပေးမလုပ်လို့ စားနပ်ရိက္ခာလည်း ပြတ်နေတယ်။ လပြည့်နေ့က လေယာဉ်လာဝဲတော့ မန်လုံက လူတချို့ ရှောင်သွားကြတယ်၊ တချို့လည်း လက်ဖက်ခြံက တဲမှာ သွားနေကြတယ်”ဟု မိုင်းငေါ့ဒေသခံ အဆိုပါအမျိုးသားက သျှမ်းသံတော်ဆင့်ကို ဆက်ပြောသည်။
အလားတူ ယမန်နေ့ (အောက်တိုဘာလ ၇ ရက်) နေ့လယ် ၁၂ နာရီခွဲတွင် TNLA ထိန်းချုပ်ထားသည့် မိုင်းလုံမြို့အနီး ပဇီကျေးရွာအုပ်စု မိုက်ဟုန်းကျေးရွာကို စစ်ကော်မရှင်တပ်မှ လေကြောင်းဖြင့် ပေါင် (၂၅၀) ဗုံးနှစ်လုံး ကြဲချတိုက်ခိုက်ခဲ့ရာ အမျိုးသမီး ၅ ဦးနှင့် ကလေးငယ်တစ်ဦး အပါအဝင် ပြည်သူ (၁၀) ဦး သေဆုံးခဲ့ပြီး ၃ ဦး ထိမှန်ဒဏ်ရာ ရရှိခဲ့ကြောင်း TNLA သတင်းနှင့် ပြန်ကြားရေးဌာနမှ ယမန်နေ့တွင် ထုတ်ပြန်ထားသည်။
ထိုလေကြောင်းတိုက်ခိုက်မှုအတွင်း သေဆုံးခဲ့သူများမှာ မိုင်းလုံမြို့အနီး မိုက်ဟုန်းကျေးရွာနေ ဦးအိုက်ဆန်ကြာ (၃၇) နှစ်၊ ဦးစံပွင့် (၃၅) နှစ်၊ ဦးစိုင်းအောင်ဆာ (၂၉) နှစ်၊ ဦးအိုက်ထက် (၂၇) နှစ်၊ ဒေါ်အုန်းခင် (၄၅) နှစ်၊ ဒေါ်လှစိန် (၂၅) နှစ်၊ ဒေါ်အေးမေ (၃၉) နှစ်၊ ဒေါ်ခင်ပ (၂၉) နှစ်၊ ဒေါ်အေးတိတ် (၂၂) နှစ်နှင့် အသက် (၂) နှစ်အရွယ် စိုင်းအိုက်ဦး တို့ဖြစ်ပြီး နေအိမ် (၆) လုံးလည်း ထိမှန်ပျက်စီးခဲ့ကြောင်း TNLA ထုတ်ပြန်ချက်အရ သိရသည်။
Leave a Comments