သျှမ်းပြည် နမ္မတူမြို့ပေါ်သို့ စစ်ကော်မရှင်တပ်က ဂျက်ဖိုက်တာဖြင့် ထပ်မံဗုံးကြဲ တိုက်ခိုက်ခဲ့ရာ ပုဗ္ဗာရုံဘုန်းကြီးကျောင်း ထိမှန်ပြီး ကျောင်းဆောင်များ ပျက်စီးခဲ့ကြောင်း စုံစမ်းသိရသည်။
ယနေ့ (အောက်တိုဘာ ၇ ရက်) နံနက် ၆ နာရီခွဲခန့်တွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် နမ္မတူမြို့ပေါ် စစ်ကော်မရှင်တပ်က ဂျက်ဖိုက်တာဖြင့် ၃ ကြိမ်မြောက် ထပ်မံဗုံးကြဲ တိုက်ခိုက်ခဲ့ခြင်းကြောင့် ပုဗ္ဗာရုံပရိယတ္တိ ရွှေကျင်ကျောင်းတိုက်ပေါ် ကျရောက်ပေါက်ကွဲခဲ့ပြီး ကျောင်းဆောင်များ အားလုံးနီးပါး ထိခိုက်ပျက်စီးသွားကြောင်း ဒေသခံများက ပြောသည်။
နမ္မတူမြို့ပေါ် ယမန်နေ့ (အောက်တိုဘာ ၆ ရက်) သီတင်းကျွတ်လပြည့်နေ့တွင် လေကြောင်းဗုံးကြဲခံရပြီးနောက် Starlink စတားလင့် အင်တာနက်ဝိုင်ဖိုင်များ အသုံးပြုခွင့်ကို ကန့်သတ်ထားခြင်းကြောင့် ယနေ့ လေကြောင်းဗုံးကြဲခံရမှုအတွင်း ထိခိုက်ပျက်စီးမှု အသေးစိတ်ကို မသိရသေးဘဲ သျှမ်းသံတော်ဆင့်မှ ဆက်လက်စုံစမ်းနေသည်။
ယခုထပ်မံ ဗုံးကြဲခံရသည့် နမ္မတူမြို့ ပန်ဟိုက်ရပ်ကွက် နယ်မြေ(၈)တွင် အောက်တိုဘာ ၂ ရက် နံနက်ပိုင်းကလည်း လေကြောင်းဖြင့် ဗုံးကြဲတိုက်ခိုက်ခံရခြင်းကြောင့် စစ်ဘေးရှောင် ၄ ဉီး သေဆုံးခဲ့ပြီး ၅ ဦးထက်မနည်း ထိခိုက်ဒဏ်ရာ ရရှိခဲ့ကြောင်း ဒေသခံများထံမှ သိရသည်။
လက်ရှိတွင် ကျောက်မဲမြို့ကို ပြန်လည်ထိန်းချုပ်နိုင်ခဲ့သည့် စစ်ကော်မရှင်တပ် စစ်ကြောင်းများသည် TNLA ထိန်းချုပ်ထားသည့် သီပေါမြို့ဘက်သို့ မြေပြင်စစ်ကြောင်း ဆက်လက်ချီတက်လျက်ရှိရာ သီပေါမြို့နှင့် (၁၀) အကွာခန့်တွင် ရောက်ရှိနေပြီး ၄ ရက်အတွင်း လေကြောင်းတိုက်ခိုက်မှု ၅ ကြိမ်ထက်မနည်း ပြုလုပ်ထားကြောင်း ဒေသခံများထံမှ သိရသည်။
Leave a Comments