သျှမ်းပြည်မြောက်ပိုင်း ကွတ်ခိုင်မြို့တွင် အသက် (၈) နှစ်အရွယ်ရှိ မိန်းကလေးငယ်တစ်ဦးကို သတ်ဖြတ်ခဲ့သည့် တရားခံများ ထွက်ပြေးလွတ်မြောက်နေဆဲဖြစ်ကြောင်း ဒေသခံများက ပြောသည်။
ပြီးခဲ့သည့် အောက်တိုဘာလ ၂ ရက် နေ့လယ် ၃ နာရီခွဲအချိန်က ကွတ်ခိုင်မြို့ ရပ်ကွက် (၈) တွင် နေထိုင်သော အသက် (၈) နှစ်အရွယ် ကျောင်းသူတစ်ဦးသည် စာသင်ပြီးကျောင်းအပြန် ဂေါက်ကွင်းလမ်းခုလတ်တွင် ရောက်နေချိန် အသတ်ခံရခြင်း ဖြစ်သည်။
အဆိုပါအလောင်းကို ဂေါက်ကွင်းအနီးရှိ ချုံထဲတွင် တွေ့ရှိခဲ့ပြီး ၎င်း၏ လည်ပင်းတွင် ဓားဒဏ်ရာဒဏ်ချက် တွေ့ရှိခဲ့ကြောင်း ကွတ်ခိုင်မြို့ဒေသခံများက ပြောသည်။
“အခုထိတရားခံကို ဖမ်းမမိသေးဘူး၊ သံသယကွင်းဆက်ရှိတဲ့လူတွေကို မေးမြန်းစစ်ဆေးနေတယ်။ ပြစ်မှုကျူးလွန်သူ နှစ်ယောက်က ပြစ်မှုကျူးလွန်စဉ်မှာ မက်စ် (Mask) အမည်းရောင်တပ်ထားတယ်” ဟု ဖြစ်စဉ်ကိုသိရှိသူ ကွတ်ခိုင်မြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ထို့ပြင် အသတ်ခံရသည့် မိန်းကလေး၏ နားတွင်ဆင်မြန်းထားသော ရွှေနားကပ် ၁ ရံ ပျောက်ဆုံးလျှက်ရှိပြီး မိန်းကလေးတွင် ဆွဲပေးထားသော ရွှေဆွဲကြိုးအတုလေးပါ ပျောက်ဆုံးနေသဖြင့် လုယက်မှုဖြစ်နိုင်ကြောင်း ဒေသခံအချို့က ခန့်မှန်းယူဆကြသည်။
သို့သော်လည်း အဆိုပါမိန်းကလေးကို အမျိုးသားတစ်ဦးက အဓမ္မပြုကျင့်ပြီး သတ်ဖြတ်ခဲ့ခြင်း ဖြစ်ကြောင်း TNLA က ယနေ့ အောက်တိုဘာလ ၄ ရက်နေ့တွင် သတင်းထုတ်ပြန်ထားသည်။
အဆိုပါဖြစ်စဉ်နှင့် ပတ်သက်၍ တအာင်း(ပလောင်)အမျိုးသားလွတ်မြောက်ရေးတပ်မတော် (TNLA) ပြန်ကြားရေး တာဝန်ခံ လွေးယေဦးကို သျှမ်းသံတော်ဆင့်က မေးမြန်းခဲ့သော်လည်း ပြန်လည်ဖြေကြားခြင်း မရှိသေးပေ။
ထိုအခင်းဖြစ်ပွားသည့်နေရာကို TNLA ၏ မြို့နယ်ရဲတပ်ဖွဲ့မှ သွားရောက်စစ်ဆေးခဲ့ပြီး ပြစ်မှုကျူးလွန်သူ တရားခံကိုလည်း အရေးယူနိုင်ရန် ဆက်လက်ရှာဖွေစုံစမ်းနေဆဲဖြစ်ကြောင်း ထုတ်ပြန်ချက်တွင် TNLA ကဆိုထားသည်။
လက်ရှိတွင် တရားခံများပေါ်ပေါက်ရေးအတွက် သက်ဆိုင်ရာက စုံစမ်းနေလျှက်ရှိပြီး ကလေးသူငယ်များကို ရွှေ၊ လက်ဝတ်ရာတနာ စသည့် တန်ဖိုးရှိပစ္စည်းများကို ဆင်ယင်ပေးခြင်း မလုပ်ကြရန် ဒေသခံတစ်ဦးကလည်း တိုက်တွန်းထားသည်။
Leave a Comments