သျှမ်းပြည် ကျောက်မဲမြို့နယ် မိုင်းတင်းကျေးရွာအုပ်စုရှိ စာသင်ကျောင်းထဲ ဝင်ရောက်တပ်စွဲခဲ့သည့် TNLA တပ်သားများကို ပြန်လည်ထွက်ခွာပေးရန် ဒေသခံများ ဆန္ဒပြတောင်းဆိုခဲ့ပြီး စစ်ဆေးရေးဂိတ်ကိုလည်း ဖယ်ရှားလိုက်ကြောင်း စုံစမ်းသိရသည်။

စက်တင်ဘာလ (၂၈) ရက် နံနက် ၇ နာရီခန့်မှ စတင်ပြီး ကျောက်မဲမြို့နယ် မိုင်းတင်းကျေးရွာအုပ်စုရှိ သံဃာတော်နှင့် ပြည်သူ စုစုပေါင်း (၅၀၀) ခန့်သည် TNLA ဝင်ရောက်တပ်စွဲခဲ့သည့် ပြိန်းခါးရွာ စာသင်ကျောင်းသို့ သွားရောက်ဆန္ဒထုတ်ဖော်ခဲ့ပြီး လေကြောင်းအန္တရာယ် စိုးရိမ်မှုကြောင့် ပြန်လည်ထွက်ခွာပေးရန် တောင်းဆိုခဲ့ကြောင်း ဒေသခံများက ပြောသည်။

“ပလောင်စစ်သားတွေ ရွာထဲဝင်လာတယ် ကြားလို့ လူကြီးတွေပဲ သွားပြောရင် သူတို့ နားမထောင်မှာစိုးလို့ ဘုန်းကြီးနဲ့ ရွာသားတွေပါ ခေါ်ပြီး ရွာက ထွက်ပေးဖို့ သွားတောင်းဆိုတာ။ စစ်တပ်က လေယာဉ်နဲ့ ဗုံးလာကြဲမှာကြောက်လို့ မြန်မြန်ထွက်ပေးဖို့ အခုလို တောင်းဆိုရတာလို့ ရှင်းပြပြီးတော့ ကောင်းကောင်းမွန်မွန်ပဲ ပြောဆိုကြတာ။ သူတို့လည်း ဘာမှမပြောပါဘူး ကောင်းကောင်းမွန်မွန်ပဲ ထွက်သွားပေးတယ်”ဟု ဆန္ဒထုတ်ဖော်ရာတွင် ကိုယ်တိုင်ပါဝင်ခဲ့သည့် မိုင်းတင်းရွာဒေသခံတစ်ဦးက သျှမ်းသံတော်ဆင့်ကို ပြောသည်။

ယင်းမတိုင်မီ စက်တင်ဘာလ (၂၇) ရက် ညပိုင်းတွင် ကျောက်မဲမြို့နှင့် (၇) မိုင်ခန့် ကွာဝေးသည့် မိုင်းတင်းကျေးရွာအနီး ပိန်းခါးရွာရှိ စာသင်ကျောင်းသို့ TNLA တပ်ဖွဲ့ဝင် အင်အား (၅၀) ခန့် လာရောက်တပ်စွဲခဲ့ကြောင်း ဒေသခံများထံမှ သိရသည်။

ထို့နောက် မိုင်းတင်းရွာဒေသခံများမှ လေကြောင်းအန္တရာယ် စိုးရိမ်မှုကြောင့် TNLA တပ်သားများ စာသင်ကျောင်းမှ ထွက်ခွာပေးရန် သွားရောက် ဆန္ဒထုတ်ဖော် တောင်းဆိုခဲ့ရာ စက်တင်ဘာလ (၂၈) ရက် နံနက် ၁၀ နာရီခွဲခန့်တွင် အဆိုပါ TNLA တပ်ဖွဲ့ဝင်များ ပြန်လည်ထွက်ခွာသွားခဲ့ပြီး မိုင်းတင်းရွာနှင့် ပြိန်းခါးရွာကြားရှိ TNLA စစ်ဆေးရေးဂိတ်ကိုလည်း ဖယ်ရှားလိုက်ကြောင်း ဒေသခံများက ပြောဆိုသည်။

“ရွာသားတွေ ပလောင်စစ်သားကို ဆန္ဒပြတာလည်း သျှမ်းတပ်က အစည်းအဝေးခေါ်ပြီး သွားခိုင်းတာ မဟုတ်ဘူး။ မိုင်းတင်းက ပြည်သူတွေ TNLA စစ်သားတွေကို သွားပြီးမှ မောင်းထုတ်တယ်လို့ ပြောနေကြတာ အဲ့လိုမဟုတ်ဘူး။ သံဃာတော်နဲ့ ရွာသားတွေက စစ်တပ် လေယာဉ်နဲ့ ဗုံးလာကြဲမှာကြောက်လို့ သူတို့ပြန်ထွက်ပေးဖို့ တောင်းဆိုတာပါ မောင်းထုတ်တာ မဟုတ်ပါဘူး”ဟု မိုင်းတင်းရွာဒေသခံ အဆိုပါအမျိုးသားက ဆက်ပြောသည်။

အခြားတစ်ဘက်တွင် မိုင်းတင်းကျေးရွာနှင့် ပိန်းခါးရွာကြားရှိ TNLA စစ်ဆေးရေးဂိတ်ကို ရွာသားများ ဖယ်ရှားနေသည့် ရုပ်သံများ ဖေ့စ်ဘုတ်လူမှုကွန်ရက်ပေါ် ပျံ့နှံ့ခဲ့ရာ ၎င်းတို့ကို အသုံးချပြီး သျှမ်းနှင့် တအာင်း(ပလောင်) အကြား လူမျိုးရေး သွေးခွဲလှုံ့ဆောင်မှုများလည်း ကျယ်ကျယ်ပြန့်ပြန့် ထွက်ပေါ်လာခြင်းကြောင့် စိုးရိမ်စရာဖြစ်နေကြောင်း ဒေသခံများက ပြောဆိုသည်။

“TNLA ဂိတ်ကို မဖျက်ခင်ကတည်းက သူတို့ဆီကို တောင်းပန်ပြီးပြီ၊ နောက်တစ်ရက် TNLA စစ်သားတွေ ထွက်သွားတော့မှ ပြဿနာ မရှိအောင် ဆိုပြီးတော့ ရွာသားတွေက ဖျက်လိုက်တာ။ ဒီကိစ္စ ဖြစ်သွားတာလည်း ဘယ်သူက ဦးဆောင်တယ်ဆိုတာ ပြောဖို့ခက်တယ်။ ဆိုရှယ်မီဒီယာ ပေါ်မှာ ကိုယ်ပိုင်စိတ်ခံစားချက်နဲ့ မျှဝေကြတော့ ကိစ္စအသေးကနေ အကြီးကြီး ဖြစ်ကုန်တာ၊ လူမျိုးရေး ဖြစ်သွားမှာ စိုးရိမ်စရာပေါ့” ဟု ကျောက်မဲမြို့မှ မြို့မိမြို့ဖ တစ်ဦးက သျှမ်းသံတော်ဆင့်ကို ပြောသည်။

ကျောက်မဲမြို့နယ် မိုင်းတင်းကျေးရွာအုပ်စုတွင် မိုင်းတင်းရွာမ၊ မန်စန်း၊ လွယ်အွယ်၊ ဝေဘူ၊ ပြိန်းခါး၊ နမ့်ဆော့၊ ပင်တီးနှင့် နားမွန်းကျေးရွာတို့ ပါဝင်ပြီး ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) လည်း သွားလာလှုပ်ရှားနေသည်။

ပုံစာ – မိုင်းတင်းရွာနှင့် ပြိန်းခါးရွာကြားရှိ TNLA စစ်ဆေးရေးဂိတ်ကို ရွာသားများ ဖယ်ရှားနေစဉ် (ဓာတ်ပုံ-ဒေသခံ)