သျှမ်းပြည် တောင်ကြီးမြို့တွင် တရားမဝင် လိုင်စင်မဲ့ကားများကို ဖမ်းဆီးစစ်ဆေးမှု ထပ်မံလုပ်ဆောင်လာပြီး စစ်ကော်မရှင်နှင့် နီးစပ်သူများသာ ဖမ်းခံရသည့် ကား၊ ဆိုင်ကယ်များကို ပြန်လည် ရွေးထုတ်ခွင့်ရကြောင်း သတင်းရရှိသည်။

ယမန်နေ့ (စက်တင်ဘာလ ၃၀ ရက်) တွင် တောင်ကြီးမြို့ အရှေ့မြို့ပတ်လမ်းနှင့် သစ်တောရပ်ကွက်၊ ဝါးပြားလမ်းဆုံ၊ ဧရာဝတီ ကဖေးအနီးနှင့် နီလာရိုးမ ဓာတ်ဆီဆိုင် လမ်းဆုံအနီး (၅) နေရာတွင် စစ်ကော်မရှင် လက်အောက်ခံ ယာဉ်ထိန်းရဲများက လိုင်စင်မဲ့ ကားများကို ဆက်တိုက်ဖမ်းဆီးခဲ့ပြီး လိုင်စင်မဲ့ကား အစီးရေ (၈၀) ကျော် ဖမ်းဆီးရမိခဲ့ကြောင်း နီးစပ်သူများထံမှ သိရသည်။

“သူတို့က လူတွေ မေ့လောက်ပြီဆို ထဖမ်းပြီ။ အထူးသဖြင့် တန်ဆောင်တိုင်နီးတာနဲ့ ခရီးသွားရာသီလည်း ဖြစ်တော့ လိုင်စင်မရှိတဲ့ ကားတွေ ဆိုင်ကယ်တွေ အကုန်ဖမ်းတယ်။ မနေ့က ဖမ်းခံရတဲ့သူတစ်ချို့က စစ်ကော်မရှင်နဲ့ နီးစပ်တဲ့သူဆို ပြန်ရွေးခွင့်ပေးတယ်၊ ဘယ်လောက်နဲ့ ရွေးခဲ့ရလဲတော့ မသိဘူး။ ဘာအသိအကျွမ်း နောက်ခံမှ မရှိရင် ရွေးခွင့်မပေးဘူး”ဟု သတင်းရင်းမြစ် အမျိုးသားတစ်ဦးက သျှမ်းသံတော်ဆင့်ကို ပြောသည်။

ထိုသို့ ဖမ်းဆီးခံခဲ့ရသည့် ကားများသည် မြို့တွင်းသို့ ခရီးသွား အလည်အပတ် ဝင်လာသည့် ကားများ၊ မြို့ခံပြည်သူများ၏ Toyota နှင့် Honda ထုတ် အိမ်စီးကားများ၊ Hijet ကဲ့သို့ ယာဉ်အမျိုးအစားများ ဖြစ်ကြောင်း ၎င်းအမျိုးသားက ဆက်ပြောသည်။

ထို့အပြင် တောင်ကြီးမြို့တွင်း လိုင်စင်ရှိ ဆိုင်ကယ်ဖြင့် သွားလာသော်လည်း ယာဉ်ထိန်းရဲများမှ အပြစ်ရှာ ဖမ်းဆီးငွေညှစ်ခြင်းများ ရှိနေပြီး ၎င်းတို့ကို ကွေ့ဝိုက်ရှောင်ရှား သွားလာနေရသောကြောင့် ခရီးလမ်း ကြန့်ကြာနေရကြောင်း ဒေသခံ အမျိုးသမီးတစ်ဦးက ပြောသည်။

“ကားရှိပြီး ကားမစီးရတဲ့ဘဝ ဖြစ်နေတာ။ မိုးရွာလို့ ပစ္စည်းတင်စရာ များလို့ ကားလေးနဲ့ သွားမယ်ဆိုရင် လိုင်စင်မရှိတော့ မသွားရဘူး။ ဆိုင်ကယ်က လိုင်စင်တော့ ရှိတယ်၊ ယာဉ်ထိန်းရဲတွေက တစ်ခုမဟုတ် တစ်ခုစစ်ပြီး ငွေညှစ်နေတာ။ တခြားလမ်းကနေ ကွေ့ဝိုက်သွားရတော့ ပိုဝေးသွားတာပေါ့”ဟု အဆိုပါ အမျိုးသမီးက ပြောသည်။

စစ်ကော်မရှင် ထုတ်ပေးသည့် ကားလိုင်စင် ပြုလုပ်မည်ဆိုပါက ကားဈေးထက် လိုင်စင်ဈေး နှစ်ဆ ဖြစ်နေသောကြောင့် လိုင်စင်ပြုလုပ်ရန် မတတ်နိုင်ကြကြောင်း၊ ထိုသို့ လိုင်စင်မရှိသည်ကို အခွင့်ကောင်းယူ၍ နေ့ထူးနေ့မြတ် ရက်များနှင့် အရာရှိကြီးများ လာလျှင်လည်း လမ်းကြုံအနေဖြင့် ဖမ်းဆီးမှုများ ပြုလုပ်နေကြောင်း ၎င်းက ဆက်ပြောသည်။

တောင်ကြီး တန်ဆောင်တိုင် ပွဲတော် နီးကပ်လာသည်နှင့်အမျှ လိုင်စင်မဲ့ ယာဉ်များ ဖမ်းဆီးမှု စတင်လာပြီး ဖမ်းဆီးခံရသည့် ဆိုင်ကယ်များမှာ လိုင်စင်ရှိပြီး ဘက်မှန်နှင့် ဦးထုပ် မပါလျှင် ငွေကျပ် ငါးသောင်းမှ တစ်သိန်းအထိ ဒဏ်ကြေး ပေးဆောင်ရခြင်းကြောင့် ယာဉ်စည်းကမ်း လမ်းစည်းကမ်း လိုက်နာရန် အရေးကြီးကြောင်း ဒေသခံများက ပြောသည်။

လက်ရှိ တောင်ကြီးမြို့တွင် အဝေးသင်တက္ကသိုလ် လာတက်သည့် ကျောင်းသူများကို ဦးတည်ကာ အုပ်စုဖွဲ့ ဆိုင်ကယ်လုယက်ခြင်း၊ ဆိုင်ကယ်မောင်းလာသူများကို တားကာ ဖုန်းနှင့် လက်ဝတ်ရတနာ လုယက်မှုများ မကြာခဏ ဖြစ်နေသည်ကို စစ်ကော်မရှင် လက်အောက်ခံ ရဲတပ်ဖွဲ့က တာဝန်ယူ ဖြေရှင်းပေးမှု မရှိဘဲ သွားရောက်တိုင်တန်းလျှင် စုံစမ်းပေးမည်ဟုဆိုကာ ငွေများ ကောက်ခံသောကြောင့် မတိုင်ကြားရဲကြောင်း ဒေသခံများထံမှ သိရသည်။