ထိုင်း-မြန်မာနယ်စပ်ဒေသ တာချီလိတ်မြို့ရှိ မယ်ဆိုင်ချောင်းရေသည် ယနေ့ (အောက်တိုဘာ ၁)ရက် နံနက် ၈ နာရီအချိန်မှစ၍ စိုးရိမ်ရေမှတ် အထက်သို့ ကျော်လွန်လာသဖြင့် မြို့ပေါ် ရပ်ကွက်နှင့် လမ်းမပေါ်တွင် ရေကြီးရေလျှံမှု ဖြစ်ပွားနေကြောင်း သိရသည်။
မယ်ဆိုင်ချောင်းရေ မြင့်တက်မှုကြောင့် တာချီလိတ်မြို့ပေါ် တာလော့ ရပ်ကွက်၊ ပုန်းထွန် ရပ်ကွက်၊ မကာဟိုခမ်း ရပ်ကွက်၊ ဆန်ဆိုင်း (က) နှင့် ဆန်ဆိုင်း (ခ) တို့ရှိ လမ်းမနှင့် နေအိမ်များတွင် ရေများဝင်ရောက်နေခြင်း ဖြစ်သည်။
“ရေကတော့ အခုတက်နေတုန်းပဲ၊ ခါးလောက်ရှိတယ်။ အခု ဆန်ဆိုင်း (ခ) ရပ်ကွက် သင်္ဘောဟိုတယ်အနီးမှာ စပိတ်ဘုတ်နဲ့ ကျောင်းကြိုပို့နေတယ်” ဟု တာချီလိတ်မြို့ ဆန်ဆိုင်း (ခ) ရပ်ကွက်တွင် နေထိုင်သူမြို့ခံတစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် ရက်ပိုင်းက တာချီလိတ်မြို့နယ်အတွင်း မိုးအဆက်မပြတ်ရွာသွန်းခြင်းကြောင့် တောင်ကျ ချောင်းရေများစီးဆင်းလာသဖြင့် မယ်ဆိုင်ချောင်းရေ မြင့်တက်လာခြင်းဖြစ်ကြောင်း ၎င်းက ပြောသည်။
အဆိုပါမယ်ဆိုင်ချောင်းရေသည် နောက် ၁ ရက်အတွင်း ၃ ပေခန့် မြင့်တက်လာနိုင်ကြောင်း မိုးလေဝသနှင့် ဇလဗေဒက ယနေ့တွင် အသိပေးထုတ်ပြန်ကြေညာထားသည်။
ပင်လယ်ရေ မျက်နှာပြင် အမြင့်ပေ ၁,၂၀၀ ကျော်တွင်ရှိသော တာချီလိတ်မြို့တွင် မိုးအဆက်မပြတ် ရွာသွန်းမှုကြောင့် နှစ်စဉ်နှစ်တိုင်း ရေလွှမ်းမိုးခံရလေ့ရှိသော်လည်း ယခုနောက်ပိုင်းတွင် မြစ်အထက်ပိုင်း ရွေတူးဖော်မှုများကြောင့် ပိုမိုဆိုးရွားလာနေကြောင်း ဒေသခံများက ပြောသည်။
ထိုင်းနိုင်ငံ သဘာဝရင်းမြစ်ဌာန၏ ၂၀၂၄ ခုနှစ် အောက်တိုဘာလအတွင်း လေ့လာချက်အရ ထိုင်းနိုင်ငံ မယ်ဆိုင်မြို့မြောက်ပိုင်း နယ်စပ်ဒေသတလျှောက် ရေကြီးရေလျှံမှုမှ နုန်းတင်မှုအဆိုးဆုံးကြုံရသည်မှာ သျှမ်းပြည် မိုင်းဆတ်မြို့အရှေ့ပိုင်း ဝပြည်သွေးစည်းညီညွတ်ရေးတပ်မတော် (UWSA) လက်အောက်ခံ ဒေသများ၌ ရွေအကြီးစားတူးဖော်မှုများကြောင့် ဖြစ်ကြောင်း ရှမ်းလူ့အခွင့်အရေးမဏ္ဍိုင်က ၂၀၂၄ နိုဝင်ဘာလ ၂၇ ရက်တွင် ထုတ်ပြန်ထားသည်။
ထိုင်းအစိုးရ၏ လေ့လာချက်များအရ မယ်ဆိုင်မြစ်၏ ရေကြောင်းတလျှောက် မျောပါလာသော နုန်းများတွင် အာဆင်းနစ်၊ နီကယ်လ်နှင့် ဇင့် ပါဝင်မှုအများဆုံးဖြစ်ပြီး ဇင့်ပါဝင်မှုမှာ သတ်မှတ်ထားသည့် ပမာဏထက် ၁၈ ဆပိုများနေကြောင်းလည်း ထုတ်ပြန်ချက်တွင် ဖော်ပြသည်။
Leave a Comments