သျှမ်းပြည် ကွန်ဟိန်းမြို့နယ် တာကော်ကျေးရွာအနီးတွင် မော်တော်ယာဉ် တစ်စီးကို ရပ်တန့်စစ်ဆေးရှာဖွေခဲ့ရာ ယာဉ်ပေါ်မှ ဘိန်းဖြူ အလေးချိန် ၂.၆၄ ကီလို (ဒေသကာလ ပေါက်ဈေးတန်ဖိုး ငွေကျပ် ၃၁၆.၈ သိန်း) ကို ယာဉ်မောင်း တစ်ဦးနှင့်အတူ ဖမ်းဆီးရမိကြောင်း စစ်ကော်မရှင်လက်အောက်ခံ မူးယစ်/ ရဲတပ်ဖွဲ့က ယမန်နေ့တွင် သတင်းထုတ်ပြန်သည်။
အဆိုပါဘိန်းဖြူများကို စက်တင်ဘာလ ၁၆ ရက်က ကွန်ဟိန်းမြို့နယ် တာကော်ကျေးရွာအနီးတွင် ဖမ်းဆီးရမိခြင်း ဖြစ်ပြီး ယာဉ်မောင်းသူ အသက် (၂၂) နှစ်အရွယ် ကျော်ဝေလွင် (ခ) ကိုကြင်ကို ကာလိနယ်မြေရဲစခန်းတွင် မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာဥပဒေအရ အမူဖွင့်အရေးယူထားကြောင်း သိရသည်။
အလားတူ စက်တင်ဘာလ ၁၆ ရက်တွင်လည်း မူးယစ်ဆေးဝါး တားဆီးနှိမ်နင်းရေးရဲတပ်ဖွဲ့နှင့် ပူးပေါင်းအဖွဲ့သည် သတင်းအရ သက်သေများနှင့်အတူ တာချီလိတ်မြို့နယ် လွယ်စီတုံ (အောက်) ကျေးရွာနေ မအားမီ၏ နေအိမ်ကို ဝင်ရောက်ရှာဖွေရာ နေအိမ်အတွင်းမှ စိတ်ကြွရူးသွပ်ဆေးပြား ၃၀,၀၀၀ ပြား (ဒေသကာလပေါက်ဈေး တန်ဖိုးငွေကျပ်သိန်း ၁၂၀) သိမ်းဆည်းရမိကြောင်း သိရသည်။
Leave a Comments