သျှမ်းပြည် လားရှိုးမြို့ရောက် စစ်ဘေးရှောင်များအတွက် သျှမ်းပြည်ဝန်ကြီးချုပ် လှူဒါန်းခဲ့သည့် ဆန်အိတ်နှင့် ဆီပုံးများကို စစ်ကော်မရှင်လက်အောက်ခံ ဌာနဆိုင်ရာများက ပြန်သယ်ယူသွားခဲ့ကြောင်း စုံစမ်းသိရသည်။

ယမန်နေ့ (စက်တင်ဘာလ ၁၆ ရက်) တွင် လားရှိုးမြို့ပေါ်သို့ ထွက်ပြေးတိမ်းရှောင်လာသည့် စစ်ဘေးရှောင်များအတွက် စစ်ကော်မရှင်ခန့် သျှမ်းပြည်ဝန်ကြီးချုပ် ဦးအောင်အောင် လှူဒါန်းခဲ့သည့် ဆန်အိတ် (၁၄၀) ထဲမှ (၂၀) အိတ်သာ ချန်ထားပြီး ကျန် (၁၂၀) အိတ်ကို ၎င်းလက်အောက်ခံ ဌာနဆိုင်ရာများက ပြန်သယ်ယူသွားခဲ့ကြောင်း လားရှိုးရောက်စစ်ဘေးရှောင်များက ပြောသည်။

“ဖော်ရှိုးလုပ်ပြသွားပြီး လှူထားတာကို မထိနဲ့လို့ ပြောတာ၊ မနေ့က လာလှူထားတဲ့ဟာကို ပြန်လာယူသွားတယ်။ လာလှူတုန်းက ၁၄၈ သိန်းဖိုးလို့ ကြေညာတယ်၊ မနေ့က ဆန်အိတ် ၂၀ ချန်ထားပြီး ၁၂၀ ပြန်သယ်သွားတယ်။ စားဆီလည်း အထဲက ဆီတွေကို သွန်ခဲ့ပြီး ဗူးခွံပြန်ယူသွားတာ။ ဆန်ဂိုထောင်ကတောင် အလုပ်သမား တင်ခချခ ၁၀ သိန်းကျော် ကုန်လို့ ဘယ်သူ့ဆီ ပြန်တောင်းရမလဲ မသိဘူး”ဟု လားရှိုးရောက် စစ်ရှောင်အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် စက်တင်ဘာလ (၁၀) ရက်တွင် လားရှိုးမြို့သို့ ရောက်လာသည့် စစ်ကော်မရှင်ခန့် သျှမ်းပြည်နယ်ဝန်ကြီးချုပ် ဦးအောင်အောင် သည် သျှမ်းစာပေနှင့် ယဉ်ကျေးမှုခန်းမ၌ စစ်ဘေးရှောင်များအတွက် ဆန် (၁၄၀) အိတ်၊ စားသုံးဆီ (၇၀) ပိဿာ၊ ခေါက်ဆွဲ (၄၅) ဖာနှင့် ကြက်ဥ (၄၅) ကဒ် ထောက်ပံ့ပေးခဲ့ကြောင်း ဆိုသည်။

သို့သော် အဆိုပါပစ္စည်းများကို ယူငင်အသုံးပြုခြင်း မပြုလုပ်ရန် မှာထားခဲ့ပြီး ယမန်နေ့တွင် စစ်ကော်မရှင်လက်အောက်ခံ ဌာနဆိုင်ရာဝန်ထမ်းများမှ ဆန်အိတ် (၁၂၀) နှင့် ဆီပုံးခွံများကို ပြန်လည်သယ်ယူသွားခဲ့ပြီး အမှန်တကယ် ထောက်ပံ့ခြင်း မရှိကြောင်း စစ်ဘေးရှောင်များက ပြောသည်။

ကျောက်မဲမြို့နယ် နောင်ပိန်တိုက်နယ်အတွင်း ဖြစ်ပွားနေသည့် TNLA ပူးပေါင်းတပ်နှင့် စစ်ကော်မရှင်တပ်ကြား မြေပြင်တိုက်ပွဲများအပြင် လေကြောင်းအန္တရာယ် စိုးရိမ်ရသည့် ကျောက်မဲနှင့် သီပေါမြို့ဒေသခံများသည် စစ်ကော်မရှင်တပ် ပြန်လည်ထိန်းချုပ်ထားသည့် လားရှိုးမြို့ဘက်သို့ ထွက်ပြေးတိမ်းရှောင်နေကြသည်။

လက်ရှိတွင် လားရှိုးမြို့ပေါ်၌ သျှမ်းစာပေနှင့်ယဉ်ကျေးမှုခန်းမ၊ အထက်မန်အိုင် ဘုန်းကြီးကျောင်း၊ မေတ္တာအောင်ကျောင်းတိုက်၊ မန်ဆူ(ဗမာ)ကျောင်း၊ အထက(၃) စာသင်ကျောင်းတို့တွင် စစ်ဘေးရှောင် (၁၀၀၀) ကျော် လက်ခံထားပြီး စားနပ်ရိက္ခာ အကူအညီများ လိုအပ်နေကြောင်း စစ်ရှောင်ကူညီသူများထံမှ သိရသည်။