ကိုးကန့် တပ် (MNDAA) ထိန်းချုပ်သည့် သိန္နီမြို့တွင် လောင်းကစားဝိုင်းများ ပြန်လည် ဖွင့်လှစ်နေကြောင်း သတင်းရရှိသည်။

ယခု စက်တင်ဘာလဆန်းပိုင်းတွင် စစ်ကော်မရှင် လက်အောက်ခံ ဌာနဆိုင်ရာဝန်ထမ်းများသည် သိန္နီမြို့သို့ ပြန်ဝင်လာမည်ဟု သတင်းထွက်ပေါ်လာသေးသည်။

ထိုသတင်းထွက်ပေါ်လာပြီးသည့်နောက်ပိုင်း စက်တင်ဘာလ ၁၄ ရက်မှ စတင်ပြီး သိန္နီမြို့ ရပ်ကွက် (၃) အတွင်းရှိ တပေါင်းပွဲခင်းထဲတွင် လောင်းကစားဝိုင်းများ ပြန်လည်ဖွင့်လှစ်ခဲ့ခြင်းဖြစ်ပြီး ခြောက်ကောက်ဂျင် လောင်းကစားဝိုင်းများ ထည့်သွင်းထားကြောင်း သိန္နီမြို့ခံ အမျိုးသမီးတစ်ဦးက ပြောသည်။

“သိန္နီမြို့အခြေအနေက ကောင်းတယ်လို့ဆိုရမလား၊ ဆိုးတယ်လို့ပြောရမလား။ လောင်းကစားရုံတွေ ပြန်ဖွင့်ပြီ။ ပွဲကတော့မရှိဘူး၊ လောင်းကစားဝိုင်းပဲဖွင့်တာ။ စစ်သားတွေလည်း သွားဆော့နေတာတွေ့တယ်။ အခုလောလောဆယ်တော့ ခြောက်ကောင်ဂျင် ၂ ခုံ ဖွင့်ထားတာ တွေ့တယ်။ ဒီလကုန်ရင် အများကြီး ထပ်ဝင်လာမယ်လို့ ပြောတယ်” ဟု သိန္နီမြို့ခံ အမျိုးသမီးတစ်ဦးက ပြောသည်။

အဆိုပါလောင်းကစားဝိုင်းကို ကိုးကန့်တပ်ဖွဲ့ MNDAA နှင့် စီးပွားရေးလုပ်ငန်းရှင်များ ပူးပေါင်း၍ ဖွင့်လှစ်နေကြောင်း သိရပြီး လောင်းကစားလုပ်ငန်း လုပ်ကိုင်သူအတွက် တစ်ဦး နှစ်သောင်း (၂၀,၀၀၀) ကျပ်ပေးကာ လူခေါ်ယူနေကြောင်းလည်း ၎င်းကပြောသည်။

သို့သော် ကိုးကန့်တပ်ဖွဲ့ MNDAA နှင့် စီးပွားရေးလုပ်ငန်းရှင်များအကြား အကျိုးတူ ပူးပေါင်းဆောင်ရွက်မှုဆိုင်ရာ သဘောတူညီချက်များကိုတော့ အသေးစိတ် မသိရပေ။

“အရင်တုန်းကတော့ တပေါင်းပွဲခင်းထဲမှာ ကိုးကန့်စစ်သားတွေဆီ တရုတ်သူဌေးတွေက လာပြီးကန်ထရိုက်ဆွဲပြီး လောင်းကစားဖွင့်တာ။ အခုလည်း ကိုးကန့်စစ်သားနဲ့ တရုတ်သူဌေးပေါင်းပြီး တပေါင်းပွဲခင်းထဲမှာ လောင်းကစားဝိုင်း ပြန်ဖွင့်နေတယ်လို့ ပြောတယ်” ဟု သိန္နီမြို့ဒေသခံ အသက် (၃၀) ကျော် အမျိုးသမီးတစ်ဦးက ပြောသည်။

သိန္နီမြို့ကို ၂၀၂၄ ခုနှစ် ဇန်နဝါရီလအတွင်း ကိုးကန့်တပ်ဖွဲ့ MNDAA နှင့် ပူးပေါင်းတပ်များက သိမ်းပိုက်ပြီး ကိုးကန့်အထူးဒေသ (၁) အတွင်း ထည့်သွင်းထားပြီးနောက် လောင်းကစားဝိုင်းများကို စီးပွားရေးလုပ်ငန်းရှင်နှင့် ပူးပေါင်းကာ ယခုနှစ် ဧပြီလအထိ ဖွင့်လှစ်ခဲ့ကြောင်း ဒေသခံများကပြောသည်။

ယခုကဲ့သို့ လောင်းကစားဝိုင်းများ ပြန်လည်ဖွင့်လှစ်လာခြင်းကြောင့် နောက်အကျိုးဆက်အနေဖြင့် ခိုးဆိုးလုယက်များ၊ ဓားပြတိုက်မှုများ တိုးမြှင့်လာမည်ကို စိုးရိမ်နေကြောင်း ပြောသည်။

“သိန္နီမှာက ဘာအလုပ်မှမရှိဘူး၊ အလုပ်အကိုင်တွေရှားတော့ ရရာအလုပ်ကို လုပ်နေကြရတာ။ လုပ်ကိုင်စားသောက်ရတာလည်း အရမ်းခက်တယ်၊ လုံခြုံမှုလည်း မရှိ။ အခုလို လောင်းကစားဝိုင်းတွေ ပြန်ဖွင့်လာတော့ ပိုဆိုးတာပေါ့၊ လမ်းသွားလမ်းလာရင်း လုယက်ခံရမှာကို ကြောက်နေရတယ်” ဟု သိန္နီမြို့ခံ အမျိုးသမီးတစ်ဦးက ထပ်လောင်းပြောသည်။

ထို့ပြင် ယမန်နေ့ (စက်တင်ဘာလ ၁၅ ရက်)တွင်လည်း သိန္နီမြို့ ရပ်ကွက် (၂) အတွင်း နေထိုင်သူ အမျိုးသားတစ်ဦးသည် ဆိုင်ကယ်အငှားလိုက်ရင်း ကွတ်ခိုင်မြို့နယ် မန်ပိန်းရွာအနီးတွင် လုယက်ခံရပြီး ဖုန်းနှင့် ဆိုင်ကယ်ဦးထုပ် ပါသွားကြောင်း ၎င်းကပြောသည်။

ကိုးကန့်တပ် MNDAA အခိုင်အမာ ပြင်ဆင်တည်ဆောက်ထားသည့် သိန္နီမြို့ကို ပြန်ပေးရန် စစ်ကော်မရှင်ဘက်u တောင်းဆိုနေလျက်ရှိရာ ယခုစက်တင်ဘာလ ၁၉ ရက်နေ့မှ စ၍ သိန္နီမြို့ထဲ စစ်ကော်မရှင်လက်အောက်ခံ ဌာနဆိုင်ရာ ဝန်ထမ်းများ ပြန်ဝင်လာတော့မည်ဟုလည်း ဒေသခံများက ပြောသည်။