သျှမ်းပြည် နမ့်လန်မြို့နှင့် မိုင်းကိုင်မြို့ကြားရှိ စစ်ကော်မရှင် လက်အောက်ခံ စစ်ဆေးရေးဂိတ်များတွင် စစ်‌ဆေးမှု တင်းကြပ်နေကြောင်း သတင်းရရှိသည်။

စက်တင်ဘာလ ပထမပတ်မှ စတင်ပြီး သီပေါမြို့နယ် နမ့်လန်မြို့နှင့် မိုင်းကိုင်မြို့ ကြားရှိ စစ်ကော်မရှင်၏ ခြေမြန်တပ်ရင်း (ခမရ – ၅၀၆) စစ်ဆေးရေးဂိတ်တွင် ဖြတ်သန်းသွားလာနေသော လိုင်းကား၊ ကုန်တင်ယာဉ်များကို စစ်ဆေးမှု တင်းကြပ်နေကြောင်း ကိုယ်တိုင်ကြုံတွေ့ခဲ့သည့် အမျိုးသားတစ်ဦးက သျှမ်းသံတော်ဆင့်ကို ပြောသည်။

“နမ့်လန်မြို့က အဝင်အထွက် ဂိတ်တွေမှာလည်း သူတို့ ပေးဖြတ်ချင်ရင် ပေးဖြတ်တယ်၊ မပေးဖြတ်ချင်ရင် ရစ်တယ်။ ဆန်အိတ်နဲ့ ဆေးပါတာတောင် သူတို့က ဂိတ်ကနေ ပေးတောင် မဖြတ်ဘူး။ လိုင်းကားတွေ အိမ်စီးကားတွေလည်း ပေးမဖြတ်ဘူး”ဟု ကိုယ်တိုင်ကြုံတွေ့ခဲ့သူ ခရီးသွား အမျိုးသားတစ်ဦးက ပြောသည်။

အလားတူ မိုင်းကိုင်မြို့နှင့် လဲချားမြို့ ကြားတွင်လည်း စစ်ကော်မရှင် လက်အောက်ခံ စစ်ဆေးရေး ဂိတ်များတွင် စစ်ဆေးမှုတင်းကြပ်နေပြီး သျှမ်းပြည်မြောက်ပိုင်းမှ တင်ဆောင်လာသည့် တရုတ်နိုင်ငံထုတ် ကုန်ပစ္စည်းများကို ဖြတ်သန်းသွားလာခွင့် မပြုခြင်းကြောင့် ဆုံးရှုံးနစ်နာမှုများ ကြုံတွေ့နေရကြောင်း မိုင်းကိုင်မြို့ ဒေသခံ အမျိုးသားတစ်ဦးက ထပ်လောင်းပြောသည်။

“တရုတ်ဘက်ကနေ တင်လာတဲ့ အာလူးကားတွေ တောင်ကြီးကို သွားမလို့၊ ဂိတ်က ပေးမဖြတ်လို့ မိုင်းကိုင်ထဲမှာပဲ လာပိတ်မိနေတာ ၃ ရက်လောက် ရှိပြီ။ လားရှိုးဘက်ကနေ တရုတ်ကုန် တင်လာတဲ့ ကားတော်တော်များများ မိုင်းကိုင်မှာ လာပြီး သောင်တင်နေကြတယ်။ တချို့က အာလူးတွေတောင် ပုပ်နေပြီ” ဟု မိုင်းကိုင်မြို့ ဒေသခံ အမျိုးသားတစ်ဦးက ပြောသည်။

မိုင်းကိုင်မြို့အဝင်ရှိ စစ်ကော်မရှင် စစ်ဆေးရေးဂိတ်တွင်လည်း ကုန်တင်ကားများကို စစ်ဆေးတင်းကြပ်ပြီး ဆန်၊ ဆီ၊ ဆား နှင့် တရုတ်စားသောက်ကုန်ပစ္စည်းများကို တားမြစ်ထားကြောင်း သိရသည်။

ပြီးခဲ့သည့် ၂၀၂၅ ဇွန်လဆန်းပိုင်းမှ စတင်ပြီး သျှမ်းပြည်မြောက်ပိုင်းနှင့် အရှေ့ပိုင်းတို့မှ သျှမ်းပြည် တောင်ပိုင်းသို့ တင်ပို့သည့် ထိုင်းနိုင်ငံနှင့် တရုတ်နိုင်ငံထုတ် စားသောက်ကုန်ပစ္စည်းများကို အဓိကထားပြီး စစ်ကော်မရှင်ဘက်က တင်သွင်းခွင့် ပိတ်ပင်ထားခဲ့ကြောင်း သိရသည်။

ယခုကဲ့သို့ စစ်ကော်မရှင်ဘက်မှ ကုန်သွယ်ရေး လမ်းကြောင်းများကို ပိတ်ပင်လိုက်ခြင်းကြောင့် ဒေသထွက်ကုန် ဖြစ်သည့် ဆန်စပါး များပါ အခြားမြို့သို့ သွားရောက် ရောင်းချရန် ခက်ခဲလာကြောင်း မိုင်းကိုင်မြို့ ဒေသခံများက ပြောသည်။

ပြီးခဲ့သည့် ၂၀၂၄ နိုဝင်ဘာလတွင်လည်း မိုင်းကိုင်မြို့ မွေတော်ဘုရား မြောက်ဘက် လွယ်မော်ကျေးရွာအနီး တည်ရှိသည့် စစ်ကော်မရှင် စစ်ဆေးရေးဂိတ်သည် သျှမ်းပြည်မြောက်ပိုင်း နမ့်လန်၊ မိုင်းရယ်ဘက်သို့ ဆန်နှင့် စက်သုံးဆီ အပါအဝင် စားနပ်ရိက္ခာ သယ်ယူမည့် ကုန်တင်ကားများကို ဖြတ်သန်းခွင့် တားမြစ်ခဲ့ကြောင်း သိရသည်။