ထိုင်းနိုင်ငံမြောက်ပိုင်း ချင်းရိုင်ခရိုင် Wiang Kaen မြို့နယ်နှင့် Chiang Khong မြို့နယ်ရှိ မဲခေါင်မြစ်မှတစ်ဆင့် ချင်းမိုင်ခရိုင်သို့ တင်ပို့မည့် စိတ်ကြွဆေးပြား ခြောက်သန်းကို ထိုင်းအာဏာပိုင်များက ဖမ်းဆီးရမိကြောင်း ထိုင်းသတင်းဌာနက ဖော်ပြသည်။

အဆိုပါမူးယစ်ဆေးဝါးများကို (စက်တင်ဘာလ ၁၂ ရက်)က ချင်းရိုင်ခရိုင် Chiang Khong မြို့နယ်တွင် ဖမ်းဆီးရမိပြီး မူးယစ်ဆေးဝါးနှင့်အတူ ကား ၂ စီးနှင့် မူးယစ်မှောင်ခိုသမား ၃ ဦးကိုလည်း ဖမ်းဆီးရမိကြောင်း သိရသည်။

ဖမ်းဆီးရမိသည့် ၃ ဦးအနက် ၂ ဦးမှာ မယ်ဟောင်ဆောင်ခရိုင် Mae La Noi မြို့နယ်မှဖြစ်ကာ အခြားတစ်ဦးသည် ချင်းမိုင်ခရိုင် Samoeng မြို့နယ်မှ ဖြစ်ကြောင်း သိရသည်။

၎င်းတို့သည် ချင်းမိုင်ခရိုင်အတွင်းရှိ မူးယစ်ဆေးဝါး သယ်ယူပို့ဆောင်ရေးကွန်ရက်နှင့် ပတ်သက်ဆက်နွယ် နေသူများဖြစ်ပြီး မူးယစ်ဆေးဝါးများကို ကားဖြင့်သယ်ဆောင်လာကာ ကား၏နောက်ခန်းတွင် ကောက်ရိုးအိတ် ၂၄ အိတ်ကို တွေ့ရှိခဲ့ပြီး တစ်အိတ်လျှင် စိတ်ကြွဆေးပြား ၂၅၀,၀၀၀ ခန့်ရှိကြောင်း ရဲတပ်ဖွဲ့ကပြောသည်ဟု ထိုင်းသတင်းဌာနတွင် ရေးသားဖော်ပြထားသည်။

ထိုမူးယစ်ဆေးဝါးများကို ချင်းရိုင်ခရိုင် Wiang Kaen မြို့နယ်နှင့် Chiang Khong မြို့နယ်ရှိ မဲခေါင်မြစ်မှတစ်ဆင့် သယ်ဆောင်လာကာ ချင်းမိုင်ခရိုင်သို့ ပို့ဆောင်သည်။ ထိုမှတစ်ဆင့် ထိုင်းနိုင်ငံအတွင်းသို့ ဆက်လက် သယ်ဆောင်ရန် ပြင်ဆင်နေကြောင်း သိရသည်။

ပြီးခဲ့သည့် စက်တင်ဘာလ ၈ ရက်နေ့တွင်လည်း မြန်မာ-လာအိုနယ်စပ် မဲခေါင်မြစ်ကြောင်းမှတစ်ဆင့် တာချီလိတ်မြို့နယ်အတွင်းသို့ တရားမဝင် တင်သွင်းလာသည့် ကဖင်း ၂ ဒသမ ၅ တန် (ဒေသတန်ဖိုးငွေကျပ်သိန်း နှစ်ထောင်)ကိုလည်း တရားခံ ၅ ဦးနှင့်အတူ ဖမ်းဆီးရမိကြောင်း စစ်ကော်မရှင် လက်အောက်ခံ မူးယစ်/ ရဲတပ်ဖွဲ့က စက်တင်ဘာလ ၁၂ ရက်နေ့တွင် သတင်းထုတ်ပြန်သည်။

အလားတူ စက်တင်ဘာလ ၁၁ ရက်တွင်လည်း တာချီလိတ်မြို့ ဆန်ဆိုင်း (ခ) ရပ်ကွက်တွင် အားဆို မောင်းနှင်ပြီး အားချူ (ခ) ကျဂျူး လိုက်ပါလာသည့် မော်တော်ဆိုင်ကယ်နှင့် လော်ညီး (ခ) အားဂါ မောင်းနှင်ပြီး အိုက်ခမ်းမွေ လိုက်ပါလာသည့် မောင်တော်ဆိုင်ကယ်တို့အား ရပ်တန့်စစ်ဆေးရှာဖွေရာ ၎င်းတို့ထံမှ စိတ်ကြွရူးသွပ်ဆေးပြား တစ်သိန်း (၁၀၀,၀၀၀) ပြား သိမ်းဆည်းရမိကြောင်း သိရသည်။