သျှမ်းပြည်တောင်ပိုင်း၊ ဟဲဟိုးမြို့တွင် ချောင်းရေကြီးမှုကြောင့် နေအိမ်ထဲ ရေဝင်ပြီး အုတ်တံတိုင်းများ ပျက်စီးသွားကြောင်း သတင်းရရှိသည်။
ပြီးခဲ့သည့် စက်တင်ဘာလ ၁၀ ရက်တွင် မိုးသည်းထန်စွာ ရွာသွန်းမှုကြောင့် ဟဲဟိုးမြို့အနီးရှိ နဂါးချောင်း ရေလျှံလာပြီး လူနေရပ်ကွက်အချို့၊ သျှမ်းရွာရပ်ကွက်ရှိ လမ်းနှင့် နေအိမ်များတွင် ရေများဝင်ရောက်ပြီး အုတ်တံတိုင်းပြိုကျကာ ယနေ့ (စက်တင်ဘာ ၁၂)ရက်အထိ ရေမကျသေးကြောင်း ဒေသခံများထံမှ သိရသည်။
“ခုထိ ကျနော်တို့ အိမ်ကရေမကျသေးဘူး။ အိမ်ထဲမှာ ရေဝပ်နေတုန်း။ တချို့အိမ်တွေတော့ အုတ်တံတိုင်း တွေ တံခါးတွေ ကျိုးပဲ့ပျက်စီးကုန်တာ။ ချောင်းရေကြီးလို့ဖြစ်တာ။ အရင်က ဒါမျိုး မဖြစ်ဖူးဘူး။ အုတ်တံတိုင်းတွေကတော့ ငါးအိမ်လောက် ပျက်စီးသွားတယ်။”ဟု ဟဲဟိုးမြို့ခံ အမျိုးသားတစ်ဦးက ပြောသည်။
ရေကြီးရေလျှံမှုကြောင့် ရပ်ကွက်လမ်းများ သွားလာရခက်ခဲနေပြီး နေအိမ်အတွင်း ရွှံနွံများ ကျန်ခဲ့သောကြောင့် နေထိုင်ရခက်ခဲနေပြီး အကူညီလိုအပ်နေကြောင်း ၎င်းက ဆက်ပြောသည်။
အလားတူ ရွာငံမြို့နယ် သိမ်ကုန်းကျေးရွာ အုပ်စုတွင်လည်း ယမန်နေ့ စက်တင်ဘာလ ၁၁ ရက်တွင် မိုးသည်းထန်စွာရွာပြီး ရေကြီးရေလျှံမှုကြောင့် စာသင်ကျောင်းအုတ် တံတိုင်းပြိုကျပျက်စီးသွားပြီး သီးနှံပင်များလည်း ရေမြုပ်သွားကြောင်း သိရသည်။
“မနေ့က မိုးအရမ်းကြီးတယ်။ ခြံထဲမှာက ရေထွက်သေးသေးလေးပဲ တစ်ခုရှိတာ။ အဲဒါက ရုတ်တရက်ရေတွေ လျှံလာပြီး ခြံထဲမှာ ရေတွေ အပြည့်ဖြစ်သွားတာ။ စိုက်ထားတဲ့ အပင်တွေဆို အကုန်ရေလွှမ်းသွားတာ။ ရေက စာသင်ကျောင်းဖက်ကို စီးတော့ စာသင်ကျောင်းအုတ်တံတိုင်း ပြိုကျသွားတာ။”ဟု ရွာငံဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် စက်တင်ဘာ ၁၀ ရက်နေ့တွင်လည်း တောင်ကြီးမြို့နယ် ကျောက်နီကျေးရွာနှင့် တောင်နီကျေးရွာတို့တွင် မိုးများသောကြောင့် တောင်ကျရေများစီးဆင်းကာ လမ်းများပျက်စီးခြင်း၊ နေအိမ်အုတ်တံတိုင်းများ ပြိုကျပျက်စီးခြင်းတို့ ဖြစ်ပေါ်ခဲ့သည်။
Leave a Comments