သျှမ်းပြည်တောင်ပိုင်း၊ ကလောမြို့တွင် နေထိုင်သည့် အသက် ၁၆ နှစ်အရွယ်ရှိ မိန်းကလေးငယ်တစ်ဉီး သုံးရက်ကြာ ပျောက်ဆုံးနေကြောင်း စုံစမ်းသိရသည်။

ကလောမြို့ ရပ်ကွက် (၁)တွင် နေထိုင်သည့် အသက် ၁၆ နှစ်အရွယ် မယွန်းအိထွေးသည် ပြီးခဲ့သည့် စက်တင်ဘာ ၇ ရက် နေ့လယ် ၂ နာရီခန့်တွင် ရပ်ကွက်(၁၀)ဘက် အဘွားအိမ်သို့ သွားနေစဉ် လမ်း၌ ပျောက်ဆုံးသွားကာ ယနေ့ (စက်တင်ဘာ ၁၀ ရက်)အထိ အဆက်အသွယ် မရရှိသေးခြင်းကြောင့် စိုးရိမ်ပူပန်နေရကြောင်း မိသားစုဝင်နှင့်နီးစပ်သူ တစ်ဉီးက သျှမ်းသံတော်ဆင့်ကို ပြောသည်။

“အဘွားအိမ် သွားမယ်ဆိုပြီး လမ်းမှာ ပျောက်သွားတာ၊ သုံးရက်ရှိပြီ အဆက်အသွယ် မရသေးဘူး။ သမီးက အခုမှ အသက် ၁၆ နှစ်ပဲ ရှိသေးတာ။ ကောင်လေးနောက် လိုက်မယ်ဆိုရင် မှတ်ပုံတင်တွေ တခြား သူလိုအပ်တာတွေ ကြိုပြင်ဆင်ပြီး ယူသွားမှာ၊ အခုတော့ သူ့မှာ ဖုန်းလေးတစ်လုံးပဲ ပါသွားတာ။ ကောင်လေးနောက် လိုက်သွားတာတော့ မဟုတ်လောက်ဘူး။ တစ်ယောက်ယောက်က အတင်းခေါ်သွားတာလား မသိဘူး” ဟု အဆိုပါ မိသားစုဝင် တစ်ဦးက ပြောသည်။

သုံးရက်ကြာ အဆက်အသွယ်မရဘဲ ပျောက်ဆုံးနေသည့် မယွန်းအိထွေးသည် ကလောမြို့၌ ဘာသာရေးကျောင်း တက်နေသူဖြစ်ပြီး အနေအေးသူလည်း ဖြစ်ကာ ယခုကဲ့သို့ ရုတ်တရက် ပျောက်ဆုံးသွားမှုကြောင့် မိဘများက စိုးရိမ်နေကြပြီး ကလောမြို့ရဲစခန်းနှင့် အောင်ပန်းမြို့ ရဲစခန်းတွင် အမှုဖွင့် တိုင်ကြားထားကြောင်း ၎င်းက ဆိုသည်။

ထိုသို့ ကလေးများနှင့် အမျိုးသမီးငယ်များ မကြာခဏ ပျောက်ဆုံးမှုများ ရှိနေပြီး ကလေးများကို သေချာဂရုစိုက်သင့်ကြောင်း၊ ပြန်ပေးဆွဲသူများအပြင် ပေါ်တာဆွဲမှုများပါ ရှိလာနေကြောင်း ကလောဒေသခံ အသက် ၂၅ နှစ် ကျော်အရွယ် အမျိုးသမီးက ပြောသည်။

“နိုင်ငံရေးကလည်း မတည်ငြိမ်တော့ ကလေးတွေလည်း မလုံခြုံဘူး။ ကလေးမှမဟုတ်ဘူး လူကြီးတွေအစ အသွားအလာ အမြဲဂရုစိုက်ရတယ်။ တစ်ခုခုဖြစ်ရင် ဘယ်သူမှ တာဝန်ယူ ဖြေရှင်းပေးတာမျိုး မရှိဘူး၊ ဘယ်နေရာမှ တိုင်မရဘူး။ ခုက မိန်းကလေးတွေကိုလည်း ပေါ်တာဆွဲတယ် ကြားတော့ ပိုစိတ်ပူရတယ်”ဟု ၎င်း အမျိုးသမီးက ပြောသည်။

အလားတူ ဩဂုတ်လ ၂၇ ရက်တွင် တောင်ကြီးမြို့သို့ အလုပ်လာလုပ်သည့် အင်းလေးဒေသမှ အမျိုးသမီးတစ်ဦးလည်း တစ်ပတ်ခန့် ပျောက်ဆုံးသွားပြီး မိသားစုဝင်များ လိုက်လံရှာဖွေခဲ့ရာ ယောကျ်ားနောက် ခိုးရာလိုက်ပြေးကြောင်း ကြားသိခဲ့ရပြီး အဆက်အသွယ် ပြန်လည်ရရှိခဲ့သည်ဟု ဆိုသည်။

ယမန်နှစ် ၂၀၂၄ ဩဂုတ်လမှ စတင်ပြီး သိန္နီမြို့ဒေသခံနှင့် ကျောက်မဲမြို့ဒေသခံ အသက် ၂၅ ဝန်းကျင်ရှိ စိုင်းတုမ်လိန်ခမ်း နှင့် အသက် ၃၀ အရွယ် စိုင်းကျော်မြင့်တို့သည် ဟိုပုံးမြို့နယ် အတွင်း ခရီးထွက်ရာမှ လမ်းတွင် ပျောက်ဆုံးသွားခဲ့ပြီး တစ်နှစ်ကျော်ကြာ ယနေ့အထိ အဆက်အသွယ် မရသေးကြောင်း သိရသည်။