ထိုင်း-မြန်မာနယ်စပ် တာချီလိတ်မြို့ လူငယ်တစ်ဦး တစ်ပတ်ကျော်ကြာ ပျောက်ဆုံးနေပြီး အထင်မှားဖမ်းဆီးခံရမည်ကို စိုးရိမ်နေရကြောင်း မိသားစုဝင်များက ပြောသည်။
ဖြစ်စဉ်မှာ ဇန်နဝါရီလ ၂၄ ရက်ကတည်းက အသက် ၂၉ နှစ်အရွယ်ရှိ စိုင်းမောင်သိန်းလှိုင်ဆိုသူသည် ခဏအပြင်ထွက်လည်မည်ဟုဆိုကာ နေအိမ်မှထွက်သွားပြီးနောက် ယနေ့အချိန်ထိ အိမ်သို့ပြန်ရောက်လာခြင်းမရှိဘဲ ပျောက်ဆုံးနေခြင်းဖြစ်ကြောင်း သိရသည်။
၎င်းသည် စိတ်ကျရောဂါ (Depression) ဝေဒနာကို ခံစားနေရသူဖြစ်ပြီး ပုံမှန်ဆေးသောက်ရန် လိုအပ်သူလည်း ဖြစ်ကြောင်း ပျောက်ဆုံးနေသူ စိုင်းမောင်သိန်းလှိုင်၏ အစ်ကိုဖြစ်သူက သျှမ်းသံတော်ဆင့်ကို ပြောသည်။
“ဒီနေ့ထိ ပြန်မတွေ့သေးဘူး၊ ဘာသတင်းမှလည်း မကြားရသေးဘူး။ ကျနော် ညီလေးကလည်း စိတ်သိပ်မနှံ့ဘူး။ သူများ ခေါ်သွားတာလား၊ သူကိုယ်တိုင်ပဲ ထွက်ပြေးသွားတာလား မသိဘူး။ အခုချိန်မှာ သူဆေးမသောက်ရရင် သူ့ရောဂါပြန်ထမှာကို စိုးရိမ်နေရတာ” ဟု ၎င်းက ပြောသည်။
အဆိုပါပျောက်ဆုံးနေသူမှာ စိတ်ကျရောဂါခံစားနေရသဖြင့် အစစ်အဆေး၊ အမေးအမြန်းများနှင့် ကြုံတွေ့ရပါက ကြောက်ရွံ့ပြီး စကားပြန်မပြောနိုင်ခြင်း၊ ထွက်ပြေးခြင်းများ ပြုလုပ်နိုင်သောကြောင့် ရာဇဝတ်သားတစ်ဦးအဖြစ် အထင်မှားကာ ဖမ်းဆီးခေါ်ဆောင်သွားမည်ကို မိသားစုဝင်များက စိုးရိမ်နေရသည်။
ပြီးခဲ့သည့် ဇန်နဝါရီလ ၂၄ ရက်နေ့ကလည်း တာချီလိတ်မြို့ ဆန်ဆိုင်း (က) ရပ်ကွက်တွင် အမျိုးသမီးတစ်ဦး ပြန်ပေးဆွဲခံရသည့် ဖြစ်စဉ်တစ်ခုလည်း ဖြစ်ပွားခဲ့သည်။
ထို့ကြောင့် ပျောက်ဆုံးနေသည့် စိုင်းမောင်သိန်းလှိုင်အား ပြန်ပေးဆွဲခံရမည်ကို စိုးရိမ်နေရသလို တစ်ဖက်မှာလည်း အာဏာပိုင်းများမှ တရားခံအဖြစ် ဖမ်းဆီးနှိပ်စက်မည်ကို စိုးရိမ်နေရကြောင်း မိသားစုဝင်များက ပြောသည်။
ပြည်သူများနှင့် သက်ဆိုင်ရာ လုံခြုံရေးအဖွဲ့အစည်းများအနေဖြင့် ပျောက်ဆုံးနေသည့် စိုင်းမောင်သိန်းလှိုင်ကို တွေ့ရှိပါက ရာဇဝတ်သားတစ်ဦးအဖြစ် သဘောမထားဘဲ ၎င်း၏ ကျန်းမာရေး အခြေအနေကို ထည့်သွင်းစဉ်းစားကာ မိသားစုထံ အမြန်ဆုံး အကြောင်းကြားပေးရန် သို့မဟုတ် လူသားချင်းစာနာမှုဖြင့် ကူညီပေးပါရန် မိသားစုဝင်များက အထူးမေတ္တာရပ်ခံ တောင်းဆိုထားပါသည်။
အကယ်၍ စိုင်းမောင်သိန်းလှိုင်ကို တွေ့ရှိပါက ဖုန်းနံပါတ် – 09421217627 သို့ အကြောင်းကြားပေးပါရန် မိသားစုဝင်များက တောင်းဆိုထားသည်။
Leave a Comments