ထိုင်းနိုင်ငံမြောက်ပိုင်း ချင်းမိုင်ခရိုင် ဖန်မြို့နယ်အတွင်းရှိ ရွာသားတစ်ဦး၏ ခြံအနီးတွင် စွန့်ပစ်ထားသော ကားတစ်စီးထဲ စိတ်ကြွဆေးပြား ခုနှစ်သိန်း တွေ့ရှိခဲ့ကြောင်း ထိုင်းနိုင်ငံမြောက်ပိုင်း မူးယစ်ဆေးဝါး သတင်းဌာနက ယမန်နေ့တွင် ရေးသားဖော်ပြသည်။
အဆိုပါစိတ်ကြွဆေးပြားများကို ယမန်နေ့ (စက်တင်ဘာလ ၉ ရက်) နံနက် ၇ နာရီအချိန်တွင် တွေ့ရှိခဲ့ပြီး စွန့်ပစ်ထားသော ကားတစ်စီး၏ နောက်ဖုံးတွင် စိတ်ကြွဆေးပြား စုစုပေါင်း ခုနှစ်သိန်းခန့် ပါဝင်သည့် ကောက်ရိုးအိတ် ၃ အိတ်ကို တွေ့ရှိခဲ့ခြင်း ဖြစ်ကြောင်း ရေးသားဖော်ပြထားသည်။
ထို ကားပိုင်ရှင်သည် မူဆာဆိုသည့် ထိုင်းနိုင်ငံသားအဖြစ် ခံယူထားသော လားဟူလူမျိုး အမျိုးသားတစ်ဦးဖြစ်ပြီး၊ ကားသည် ချင်းမိုင်ခရိုင်လိုင်စင်ဖြစ်နေကြောင်း ၎င်းကို ထိုင်းအာဏာပိုင်များက လိုက်လံရှာဖွေနေဆဲဖြစ်ကြောင်း သိရသည်။
Leave a Comments