သျှမ်းပြည် မိုးမိတ်မြို့နယ် မြစ်ဆုံကျေးရွာတွင် အမျိုးသား ၁ ဦးကို အမည်မသိ အုပ်စုတဖွဲ့က ဓားဖြင့် ခုတ်သွားသဖြင့် ဘယ်လက်တဖက်ပြတ်သွားကြောင်း ဒေသခံများက ပြောသည်။
ဖြစ်စဉ်မှာ စက်တင်ဘာလ ၆ ရက် ည ၇ နာရီတွင် မိုးမိတ်မြို့နယ် မြစ်ဆုံကျေးရွာနေ အသက် (၃၃) နှစ်အရွယ် ကိုသီဟသည် အလုပ်အပြန်တွင် အမည်မသိ အုပ်စုက ဓားဖြင့်ဝိုင်းခုတ်ခဲ့သဖြင့် ဘယ်လက်တစ်ဖက် ပြတ်သွားခဲ့ကြောင်း ဖြစ်စဉ်ကိုသိရှိသူ ဒေသခံအမျိုးသမီးတစ်ဦးက ပြောသည်။
“ဆိုင်ကယ်ရပ်တဲ့အချိန်မှာ ဝင်ခုတ်တာ။ ကျမတို့ဘက်ကလည်း လေးယောက်၊ သူတို့ဘက်ကလည်း လေးယောက်။ အဲ့လေးယောက်ထဲမှာမှ ညမတို့ အစ်ကို့ကိုပဲ ဝင်လုံးပြီးတော့ ဓားနဲ့ခုတ်သွားတာ၊ လက်တစ်ဖက် ပြတ်သွားတယ်။ လက်ကို သုံးချက်ခုတ်တယ်၊ လည်ပင်းကိုလည်း ဆင့်ခုတ်တယ်။ လည်ပင်းက မပြတ်ရုံတစ်မယ်ပဲ၊ မသေရုံတစ်မယ်ပဲ” ဟု ကိုယ်တိုင် ကြုံတွေ့ရသည့် အမျိုးသမီးက သျှမ်းသံတော်ဆင့်ကို ပြောသည်။
ဓားခုတ်ခံရသည့် ကိုသီဟသည် ဘယ်လက်တစ်ဖက်ပြတ်သွားသည့်အပြင် လည်ပင်းတွင်လည်း ပြတ်ရှဒဏ်ရာရရှိခဲ့ပြီး၊ လက်ရှိတွင် ဒဏ်ရာပြင်းထန်ကာ ဆေးရုံတွင် ဆေးဝါးကုသခံနေကြောင်း သိရဿည်။
သို့သော် ဓားခုတ်မှုကျူးလွန်သည့် တရားခံများသည် ယနေ့ အချိန်ထိ ထွက်ပြေးလွတ်မြောက်နေဆဲဖြစ်ကြောင်း မိုးမိတ်မြို့ဒေသခံ အမျိုးသားတစ်ဦးက ပြောသည်။
“အဖွဲ့အစည်းအမည်နဲ့ အသုံးချပြီး လုပ်နေတာ၊ ခုတ်တာက တစ်ကြိမ်မကတော့ဘူး။ ငါးကြိမ်၊ ခြောက်ကြိမ်လောက် ရှိပြီ။ အခုခုတ်ခံရတဲ့သူနဲ့လည်း ဘာမှမဆိုင်ဘူး၊ ရန်ငြိုးလည်း မရှိဘူး။ လည်ပင်းပါခုတ်တာ၊ နောက်မှ လူမှားတာတဲ့။ အခု ခုတ်တဲ့ကလေးတွေ ထွက်ပြေးနေတယ်” ဟု ၎င်းကပြောသည်။
ဓားခုတ်မှုကျူးလွန်သူ တရားခံများအနက် တစ်ဦးသည် မိုးမိတ်မြို့နယ် အုန်းကြောရွာရှိ မြဓာတ်ဆီဆိုင်ရှင်၏ သားဖြစ်ကြောင်း ဒေသခံများက ပြောသည်။
မြစ်ဆုံရွာသည် မိုးမိတ်မြို့နှင့် ၁၇ မိုင်ခန့်ကွာဝေးပြီး ထိုကျေးရွာတွင် တအာင်းတပ်ဖွဲ့ (TNLA)၊ ကချင်တပ်ဖွဲ့ (KIA)၊ ရခိုင်တပ်ဖွဲ့ (AA)နှင့် ပြည်သူ့ကာကွယ်ရေးတပ် (PDF) စသည့် လက်နက်ကိုင်အဖွဲ့အစည်းများ လှုပ်ရှားနေကြောင်း ဒေသခံများက ပြောသည်။
Leave a Comments