သျှမ်းပြည်မြောက်ပိုင်း မိုးမိတ်မြို့နယ် အတွင်းတွင် စစ်ဘေးရှောင် ၃၀၀ ကျော်တို့သည် တစ်လ နီးပါးကြာသည် အထိ နေရပ်မပြန်နိုင်သေးသည့်အတွက် စားနပ်ရိက္ခာ နှင့် အဝတ်အထည်များ အကူအညီ လိုအပ်နေကြောင်း သတင်း သိရသည်။
အဆိုပါ စစ်ရှောင် ၃၀၀ ကျော်များအနက် ၁၀ နှစ်အောက် ကလေးငယ်များပါဝင်ပြီး သက်ကြီးရွယ်အိုများလည်း ပါဝင်ရာ လက်ရှိတွင် အနွေးထည် နှင့် စောင်များ အရေးပေါ် အကူအညီ လိုအပ်နေကြောင်း မိုးမိတ်မြို့မှ အမည် မဖော်လိုသူ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“စစ်ရှောင်လာတာ တစ်လ နီးပါး ရှိနေပြီ၊ စစ ရောက်တုန်းကတော့ အလှူရှင်တွေ ရှိပါတယ်၊ ဒါပေမဲ့ ဒီတစ်ပတ်ထဲမှာတော့ အလှူရှင်တွေ ရောက်မလာဘူး၊ ဒါကြောင့် စားနပ်ရိက္ခာတွေက ခက်ခဲလာတယ်၊ ရာသီဥတုလည်း ပိုအေးလာတော့ အနွေးထည်တွေ စောင်တွေလည်း မလုံလောက်ဘူး၊ စစ်ရှောင်အားလုံးပေါင်းရင် ၃၀၀ ကျော်ရှိတယ်” ဟု အထက်ပါ အမျိုးသား က ပြောသည်။
မိုးမိတ်မြို့ နယ် နမ့်ရှီးရွာ နှင့် နမ့်ပုတ်ရွာ အနီးပတ်ဝန်းကျင်မှ ဒေသခံများ ဖြစ်ကြပြီး ပြီးခဲ့သည့် နိုဝင်ဘာလ ၂၈ ရက် တွင် ဖြစ်ပွားသည့် အာဏာသိမ်း စစ်ကောင်စီ နှင့် ကချင်လွတ်မြောက်ရေး တပ်မတော် KIA ပူးပေါင်းတပ်ဖွဲ့ PDF တို့ တိုက်ပွဲကြောင့် ထွက်ပြေးလာရသည့် ဒေသခံ ပြည်သူများ ဖြစ်ကြောင်း သိရသည်။
လက်ရှိ စစ်ရှောင်များသည် မိုးမိတ်မြို့ရှိ မြို့မ နှစ်ခြင်းကျောင်း နှင့် ဓမ္မာရုံတွင် ရောက်ရှိခိုလှုံ နေကြခြင်းဖြစ်ပြီး ယခုအချိန်အထိ စစ်ရေးတင်းမာမှု ရှိနေမှုကြောင့် နေရပ်မပြန်နိုင်သေးကြောင်း အထက်ပါ ပုဂ္ဂိုလ်က ဆက်ပြောသည်။
“အခုချိန်မှာတော့ တိုက်ပွဲထပ်ဖြစ်တာ မရှိပါဘူး၊ ဒါပေမဲ့ သူတို့ရွာဘက်မှာက စစ်သားတွေ ရှိနေသေးတာနဲ့ မပြန်ရဲကြသေးဘူးတဲ့၊ အခု စစ်ရှောင်ရှိနေတဲ့ ကျောင်းနားမှာလည်း ရဲစခန်းနဲ့လည်း နီးနေတယ်၊ အဲ့ကြောင့် အခြေအနေတွေကို စောင့်ကြည့်နေရသေးတယ် ” ဟု အထက်ပါ ပုဂ္ဂိုလ်ကပြောသည်။
ပြီးခဲ့သည့် နိုဝင်ဘာလ အတွင်းသည် တိုင်းရင်းသား လက်နက်ကိုင် တပ်ဖွဲ့တို့နှင့် စစ်ကောင်စီတပ်တို့ ထိတွေ့တိုက်ပွဲ ပြင်းထန်စွာ ဖြစ်ပွားခဲ့ပြီး စစ်ကောင်စီဘက် က အသေအကျ များခဲ့သည်။
မိုးမိတ်မြို့နယ်အတွင်း တိုင်းရင်းသားလက်နက်ကိုင်တပ်ဖွဲ့တို့နှင့် တိုက်ပွဲဖြစ်ပွားသည့် အာဏာသိမ်း စစ်ကောင်စီ တပ်ဖွဲ့သည် မိုးမိတ်မြို့ အခြေစိုက် စစ်ကောင်စီ တပ်လက်အောက်ခံ ခလရ (၂၂၃)၊ (၂၇၆) နှင့် ခမရ (၃၄၈) တို့ ဖြစ်ကြောင်း သိရသည်။
