သျှမ်းပြည်တောင်ပိုင်း ညောင်ရွှေမြို့နယ် အင်းလေးဒေသ မကျီးဆိပ်ကျေးရွာနေ ရွာသားတစ်ဦးကို စစ်ကော်မရှင်လက်အောက်ခံ ပအိုဝ်းပြည်သူ့စစ် PNO တပ်ဖွဲ့ဝင်များက အသက် သေဆုံးသည်အထိ ရိုက်နှက်ခဲ့ကြောင်း သတင်းရရှိသည်။

ဖြစ်စဉ်မှာ ပြီးခဲ့သည့် စက်တင်ဘာလ ၂ ရက် ည ၁၁ နာရီအချိန်တွင် ညောင်ရွှေမြို့နယ် မကျီးဆိပ်ကျေးရွာမှ အသက် (၄၂) အရွယ် ကိုအောင်မျိုးဝင်းသည် ပိန္နဲကုန်းကျေးရွာသို့ သွားရောက်စဉ် စစ်ကော်မရှင်လက်အောက်ခံ PNO ပြည်သူ့စစ်တပ်ဖွဲ့ဝင်များ၏ ဖမ်းဆီးခြင်းခံရပြီး မိသားစုဝင်များကို ငွေကျပ် သိန်း ၁၀၀ ဖြင့် ပြန်လာရွေးခိုင်းရာ မိသားစုမှ သွားရောက်ခေါ်စဉ် ပြင်းထန်ဒဏ်ရာ ရရှိထားပြီး ဆေးရုံရောက်ချိန် သေဆုံးခဲ့ကြောင်း ဖြစ်စဉ်သိရှိသူ အမျိုးသားတစ်ဦးက သျှမ်းသံတော်ဆင့်ကို ပြောသည်။

“စစချင်း သိန်းတစ်ရာနဲ့ ရွေးခိုင်းတာ၊ ငွေက အဲ့လောက်မရှိတော့ ဆယ်သိန်း အရင်ပေးပြီး ခေါ်လာတာ။ သူ့ပေါင်တွေဆို ဓားနဲ့ ထိုးထားတာ ရစရာကို မရှိဘူး၊ ခြေဖနောင့်ကြောတွေ ဆိုလည်း အဖြတ်ခံထားရတာ။ နှိပ်စက်ထားတာ ရစရာကို မရှိဘူး၊ ဆိုင်ကယ်ပေါ် တင်ပြန်လာတာတောင် ဆိုင်ကယ်မှာ သွေးတွေချည်းပဲ။ ဆေးရုံရောက်တော့ ဆုံးသွားတာ”ဟု အဆိုပါ သတင်းရင်းမြစ် အမျိုးသားက ပြောသည်။

ရိုက်နှက်ဒဏ်ရာများဖြင့် သေဆုံးသွားသည့် ကိုအောင်မျိုးဝင်း ဆိုသူနှင့် PNO အဖွဲ့ကြားတွင် အချိတ်အဆက် ရှိနိုင်ပြီး ပိန္နဲကုန်းရွာဘက်သို့လည်း မကြာခဏ သွားရောက်နေသူဖြစ်ကြောင်း ဒေသခံများက ပြောသည်။

ထို့အပြင် ရိုက်နှက်ခံရပြီး သေဆုံးသွားသူ ကိုအောင်မျိုးဝင်းတွင် ဇနီးနှင့် သားသမီးနှစ်ယောက် ကျန်ရှိခဲ့ကြောင်း သိရသည်။

ပအိုဝ်းပြည်သူ့စစ် PNO အဖွဲ့၏ လုပ်ရပ်သည် လူမျိုးရေးပြဿနာ ဖြစ်လာနိုင်ပြီး လူတစ်ယောက်ကို ယခုကဲ့သို့ သေဆုံးသည်အထိ မနှိပ်စက်သင့်ကြောင်း အင်းလေးဒေသခံ အသက် ၃၀ ဝန်းကျင် အမျိုးသားတစ်ဦးက ပြောသည်။

“ရွာသားတွေရော ကာယကံရှင် မိသားစုနဲ့ ပေါင်းပြီး အမှုတော့ ဖွင့်ထားတယ်။ ဒါက လူမျိုးရေး ဖြစ်လာတယ်ကော။ ဒီတိုင်းထားရင် တစ်ယောက်ပြီးတစ်ယောက် ဖြစ်လာတတ်လို့လေ။ လက်လွန်ပြီး ဆုံးသွားတာပေါ့။ အမှန်ဆို အပြစ်ရှိရင် ဒီလောက်ထိ မလုပ်သင့်ဘူး။ လုပ်တာလည်း တအားလွန်တယ်၊ သေသွားတာက အင်းသားလူမျိုးဆိုတော့ လူမျိုးရေးပြဿနာ ဖြစ်လာနိုင်တယ်”ဟု အင်းလေးဒေသခံ ၎င်းအမျိုးသားက ဆိုသည်။

ထို့အပြင် စစ်ကော်မရှင်လက်အောက်ခံ PNO ပြည်သူ့စစ်အဖွဲ့သည် မကျီးဆိပ်ရွာဘက်တွင် ညဘက် ကင်းလှည့်နေပြီး ညဘက်တွင် အပြင်ထွက်လာသူများကို ဖမ်းဆီးမှုများ ပြုလုပ်နေကြောင်း ၎င်းအမျိုးသားက ဆက်ပြောသည်။

ယခုလက်ရှိ အင်းလေးဒေသတွင် စစ်ကော်မရှင်လက်အောက်ခံ ပအိုဝ်းပြည်သူ့စစ် PNO က နယ်မြေစိုးမိုးထားပြီး ၎င်းတို့တပ်စွဲထားသည့် ကျေးရွာများတွင် ပိုက်ဆံကောက်ခြင်း၊ ထမင်းထုတ်ပို့ခိုင်းခြင်းများ လုပ်ဆောင်နေကြောင်း ဒေသခံပြောပြချက်အရ သိရသည်။

ပြီးခဲ့သည့် စက်တင်ဘာလ ၅ ရက်နေ့တွင်လည်း တောင်ကြီးမြို့ မြစိမ်းတောင်ပေါ်ရှိ ရွှေဘုန်းပွင့် ဘုရားဖူးပြီး ပြန်လာသည့် မိသားစု၏ ကားတစ်စီးရှေ့ကို PNO ပြည်သူ့စစ် အယောင်ဆောင် အုပ်စုဖွဲ့၍ ကားပိတ်ရပ်ပြီး အမျိုးသားဖြစ်သူကို ထိုးကြိတ်ရိုက်နှက်ကာ ဓားဖြင့် ခြိမ်းခြောက်မှုများ ပြုလုပ်ခဲ့ကြောင်း သိရသည်။