သျှမ်းပြည် တောင်ကြီးမြို့တွင် လူတစ်စုက ရွှေဘုန်းပွင့်ဘုရားဖူးပြီး ပြန်လာသည့် ‌ကားရှေ့တွင် ပိတ်ရပ်ပြီး ယာဉ်မောင်းသူ အမျိုးသားကို ချောင်ပိတ် ရိုက်နှက်ခဲ့ကြောင်း စုံစမ်းသိရသည်။

ပြီးခဲ့သည့် စက်တင်ဘာလ ၅ ရက် ညနေ ၅ နာရီဝန်းကျင်တွင် တောင်ကြီးမြို့ မြစိမ်းတောင်ပေါ်ရှိ ရွှေဘုန်းပွင့်ဘုရားသွားဖူးပြီး ပြန်လာသည့် မိသားစု၏ ကားတစ်စီး ရှေ့ကို (၅)ဦးပါ လူတစ်စုက PNO ပြည်သူ့စစ်အယောင်ဆောင် အုပ်စုဖွဲ့၍ ကားပိတ်ရပ်ပြီး ယာဉ်မောင်း အမျိုးသားဖြစ်သူကို ထိုးကြိတ် ရိုက်နှက်ကာ ဓားဖြင့် ခြိမ်းခြောက်မှုများ ပြုလုပ်ခဲ့ကြောင်း ဘုရားဖူးသွားသည့် မျက်မြင်သက်သေတစ်ဦးက သျှမ်းသံတော်ဆင့်ကို ပြောသည်။

“အရှေ့ပိတ်ရပ်ထားတဲ့ ကားတစ်စီးမှာ လူ ၅ ယောက် ပါတယ်၊ အနောက်က ပိတ်ရပ်ခံထားရတဲ့ ကားတစ်စီးမှာ ပါလာတဲ့ အမျိုးသားကို ဆွဲချပြီး ရိုက်နှက်နေတာ။ ပြီးတော့ ငါတို့က ပြည်သူ့စစ် PNO ကွ ဘာမှတ်နေတုန်းလို့လည်း အော်နေတာ ကြားလိုက်တယ်” ဟု ဘုရားဖူးသွားသည့် မျက်မြင်သက်သေ တစ်ဦးက ပြောသည်။

ထိုအမျိုးသားတစ်ဦးကို လူတစ်စုက ထိုးကြိတ်ရိုက်နှက်နေကြပြီး လက်ထဲတွင် ဓားကိုင်ထားသည့်အတွက် လမ်းသွားလမ်းလာ ပြည်သူများလည်း တားဆီးမှု မလုပ်ရဲခဲ့ကြောင်း ၎င်းက ဆက်ပြောသည်။

“အရက်တွေတော့ မူးနေလောက်တယ်၊ ၅ယောက်လုံးက အရပ်ဝတ်နဲ့ပါပဲ။ ဓားတွေနဲ့ပါ ခြိမ်းခြောက်ပြီး အော်ပြောနေတော့ လမ်းသွားလမ်းလာတွေလည်း မြင်တော့ မြင်တယ် ဘာမှ မလုပ်ရဲကြဘူး” ဟု ဘုရားသွားသည့် မျက်မြင်သက်သေတစ်ဦးက ပြောသည်။

ထိုသို့ ထိုးကြိတ်ခံရသည့် အမျိုးသား၏ ကားပေါ်တွင် ၎င်း၏ အမျိုးသမီးဖြစနှင့် ကလေး ၂ ဦးတို့ လိုက်ပါလာကြောင်း သိရသည်။

အမျိုးသားတစ်ဦးကို အုပ်စုဖွဲ့ကာ ဝိုင်းဝန်းရိုက်နှက်ခဲ့သည့် အဆိုပါ လူ ၅ ဦးသည် အသက် ၃၅ နှစ်မှ ၄၀ နှစ်ဝန်းကျင်ခန့် ရှိကြောင်း တောင်ကြီးဒေသခံ အမျိုးသားတစ်ဦးက ဆက်ပြောသည်။

သျှမ်းပြည် တောင်ကြီးမြို့ပေါ်တွင် စစ်ကော်မရှင် လက်အောက်ခံ PNO ပြည်သူ့စစ်များ သွားလာ လှုပ်ရှားမှုများ ရှိသလို မြို့အနီးအနားရှိ ကျေးရွာများတွင် တပ်သားစုဆောင်းမှု၊ အခွန်ကောက်ခံမှု များလည်း မကြာခဏ ပြုလုပ်မှုရှိနေကြောင်း သိရသည်။