သျှမ်းပြည်တောင်ပိုင်း ကလောမြို့နယ် အောင်ပန်းမြို့တွင် အမျိုးသားနှစ်ဦး နွားပွဲစားအချင်းချင်း ရန်ဖြစ် စကားများရာမှ ကားဖြင့် တိုက်သတ်မှု ဖြစ်ပွားခဲ့ကြောင်း စုံစမ်းသိရသည်။
ယနေ့ (စက်တင်ဘာလ ၈ ရက်) နံနက် ၁ နာရီဝန်းကျင်တွင် အောင်ပန်းမြို့ ညောင်ပင်ထောင်ရပ်ကွက်တွင် အမျိုးသားနှစ်ဦး နွားပွဲစား အချင်းချင်း ရန်ဖြစ် စကားများခဲ့ကြရာ အမျိုးသားတစ်ဦး ကားပေါ်မှ ဆင်းသွားစဉ် ကားမောင်းသူ အမျိုးသားတစ်ဦးက ကားမောင်းတိုက်ခဲ့ခြင်းကြောင့် ပွဲခြင်းပြီး သေဆုံးခဲ့ကြောင်း အောင်ပန်းမြို့ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ကားတစ်စီးထဲ တူတူလာတဲ့လူပဲ၊ နှစ်ယောက်လုံး ပျော်ဘွယ်က။ သူတို့က မူးနေတာ၊ စကားများပြီး တစ်ယောက်က ကားပေါ်ကနေ ဆင်းသွားချိန်မှာ အနောက်ကနေ ဝင်ကြိတ်လိုက်တာ။ သူကိုယ်တိုင် ကားနဲ့တိုက်ပြီး သူကိုယ်တိုင် သေတဲ့လူကို ဆေးရုံ ခေါ်သွားတာ”ဟု ဖြစ်စဉ်သိရှိသူ အောင်ပန်းမြို့ဒေသခံ ၎င်းအမျိုးသားက ပြောသည်။
ထိုသို့ ကားဖြင့် တိုက်သတ်ခံရပြီး သေဆုံးသွားသည့် အမျိုးသား၏ ရုပ်အလောင်းကို ယနေ့တွင် ပျော်ဘွယ်မြို့သို့ သယ်ဆောင်သွားကြောင်း သိရသည်။
ကားနှင့် တိုက်သတ်ခဲ့သည့် ပြစ်မှုကျူးလွန်သူကို အမှုဖွင့် အရေးယူနိုင်ရန် အောင်ပန်းမြို့ ရဲစခန်းတွင် ဖမ်းဆီးထိန်းသိမ်းထားကြောင်း သိရသည်။
Leave a Comments